Read Iloko 1 Samuel 11 Bible Online

1 Samuel 11 - Iloko bible

1 Samuel 11

¹Kalpasanna, napan rinaut ni Naas nga ari ti Ammon ken ti armadana ti ili ti Jabes iti sakup ti Galaad. Idi mapalawlawan ti ili, napan dagiti taga-Jabes ken ni Naas ket imbagada kenkuana, “Mangaramidka iti pagtutulagantayo ket awatendakanto a mangituray kadakami.”

²Insungbat ni Naas, “Makikappiaak kadakayo iti maysa a kondision: Suatek ti kannawan a mata ti tunggal maysa tapno ikkak ti pakaibabainan ti amin nga Israel.”

³Kinuna dagiti pangulo ti Jabes, “Ikkannakami iti pito nga aldaw a pawayway ta mangibaonkami kadagiti mapan dumawat iti tulong iti entero nga Israel. No awan ti umay, sumukokaminto kenka.”

⁴Dimteng dagiti naibaon idiay Gabaa a pagnaedan ni Saul. Ket nagsasangit dagiti tattao idi mangngegda ti damag.

⁵Apag-isu met a simmangpet ni Saul; naggapu iti talon ket sarsarunoenna dagiti bakana. “Ania ti napasamak?” sinaludsodna. “Apay nga agsasangitkayo amin?” Imbagada kenkuana ti impakaammo dagiti naibaon a naggapu idiay Jabes.

⁶Idi mangngeg daytoy ni Saul, inturayan ti espiritu ti Dios ket nagpungtot iti napalalo.

⁷Nangala iti dua a baka sana rinangrangkay ket pinaipanna dagiti narangrangkay a paset iti amin a sakup ti Israel. Impakaammona: “Kastoyto ti mapasamak iti baka ti siasinoman a di sumurot kada Saul ken Samuel iti paggugubatan!” Kasta unay ti buteng dagiti Israelita iti aramiden ni Yahweh, isut' gapuna a sangsangkamaysada a simmurot.

⁸Inummong ni Saul ida idiay Bezek: 300,000 a tattao ti naggapu iti Israel; 30,000 ti naggapu iti Juda.

⁹Kinunada kadagiti naibaon a taga-Jabes, “Ibagayo kadagiti tattaoyo a maispaldanton sakbay a dumteng ti tengnga ti aldaw inton bigat.” Nakaragragsak dagiti taga-Jabes a nakaawat iti damag.

¹⁰Kinunada ken ni Naas, “Sumukokaminto kenka inton bigat, ket mabalinmonton nga aramiden ti kaykayatmo kadakami.”

¹¹Iti sumaruno nga aldaw, biningay ni Saul dagiti tattaona iti tallo a bunggoy. Iti parbangon iti dayta met la nga aldaw, simrekda iti kampo dagiti Ammonita ket nagpapatayda kadakuada agingga iti agmatuon. Nagwawara dagiti nakalasat. Sabasabali ti tinurong ti tunggal maysa a mangisalakan iti bagina.

¹²Kalpasanna, kinuna dagiti Israelita ken ni Samuel, “Siasino dagiti nagkuna a saan a rumbeng a ni Saul ti mangituray kadakami? Yegyo dagitoy a tattao ta patayenmi ida.”

¹³Ngem kinuna ni Saul, “Awan ti mapapatay ita nga aldaw, agsipud ta ita nga aldaw, insalakan ti Apo ti Israel.”

¹⁴Kinuna ni Samuel kadakuada, “Intay idiay Gilgal ket ipakdaartayo manen ni Saul nga aritayo.”

¹⁵Napanda ngarud amin idiay Gilgal, ket sadiay, iti imatang ni Yahweh, impakdaarda ni Saul a kas ari. Nagidatagda kadagiti daton a pakikappia ket nagrambak da Saul ken ti amin nga Israelita.