Read Iloko 1 Samuel 12 Bible Online

1 Samuel 12 - Iloko bible

1 Samuel 12

¹Kinuna ni Samuel kadagiti Israelita: “Impangagko ti amin a kiniddawyo kaniak ket nangisaadak iti ari a mangituray kadakayo.

²Ita, adda ariyon a mangidalan kadakayo. No siak, lakay ken ubananakon, ket adda dagiti annakko iti dennayo. Nagserbiak a panguloyo manipud kinaagtutubok agingga ita.

³Sitatakderak ita iti sangoyo. No adda naaramidko a dakes, idarumdak iti imatang ti Apo ken iti ari a pinilina. Adda kadi baka wenno asno nga innalak iti siasinoman? Adda kadi sinaur wenno indadanesko? Nagawatak kadi kadagiti pasuksok tapno ikidemko dagiti matak? No adda inaramidko kadagitoy, bayadak ti aniaman nga innalak.”

⁴“Saannakami a sinaur wenno indadanes,” insungbat dagiti tattao. “Awan ti uray ania nga innalam a kukua ti siasinoman.”

⁵Insungbat ni Samuel, “Saksian ti Apo ken ti pinilina nga ari nga awan a pulos ti inaramidko a dakes kadakayo.” “Wen, ti Apo ti saksimi,” inyanamongda.

⁶Intuloy ni Samuel, “Ti Apo ti nangpili kada Moises ken Aaron, ken nangiruar kadagidi kapuonanyo idiay Egipto.

⁷Ngarud, agtakderkayo iti ayanyo ket aglilinnawagtayo iti Apo babaen iti panangipalagipko kadakayo kadagiti amin a naindaklan nga inaramidna tapno isalakannakayo ken dagiti kapuonanyo.

⁸Idi napan ni Jacob ken ti familiana idiay Egipto, ket indadanes ida dagiti Egipcio, immasug dagidi kapuonanyo iti Apo. Imbaonna da Moises ken Aaron a nangiruar kadakuada idiay Egipto ket pinagnaedna ida iti daytoy a daga.

⁹Ngem nalipatanda ti Apo a Diosda. Daytoy ti gapuna a pinalubosanna dagiti Filisteo ken ti ari ti Moab ken ni Sisera nga ofisial ti armada ti siudad ti Hasor a manggubat ken mangparmek kadakuada.

¹⁰Kalpasanna, nagpatulongda manen iti Apo. Kinunada, ‘Nagbasolkami, gapu ta tinallikudandaka, O Apo, ket nagdaydayawkami kadagiti imahen da didiosen a Baal ken Astarte. Ispalennakami kadagiti kabusormi, ket agdaydayawkaminto kenka!’

¹¹“Imbaon ngarud ti Apo da Gideon, Barac, Jefte; kamaudianna, siak met ti imbaonna. Tunggal maysa kadakami ti nangisalakan kadakayo kadagiti kabusoryo ket agbiagkayo a sitatalged.

¹²Ngem idi nakitayo ni Naas nga ari ti Ammon nga umay mangraut kadakayo, linaksidyo ti Apo a kas ariyo ket kinunayo kaniak, ‘Kayatmi ti maaddaan iti ari a mangituray kadakami.’

¹³“Ita, imatanganyo ti ari a piniliyo. Dinawatyo ket inted ti Apo a mangituray kadakayo.

¹⁴Awanto ti mapagtengyo a dakes no la ket agbutengkayo iti Apo a Diosyo, agserbikayo kenkuana, ipangagyo ket tungpalenyo dagiti bilinna ken no la ket sumurotkayo kenkuana, dakayo agraman ti ari a mangituray kadakayo.

¹⁵Nupay kasta, no diyo ipangag ti Apo ket sukirenyo dagiti bilinna, busorennakayto ken ti ariyo.

¹⁶Ngarud, agtalinaedkayo iti yanyo ket maimatanganyo ti naindaklan nga aramiden ita ti Apo.

¹⁷Saan a panagtutudo ita. Ngem agkararagak, ket mangyeg ti Apo iti gurruod ken tudo. No mapasamak daytoy, mabigbigyonto a nakaro ti basolyo idi kiniddawyo iti Apo nga ikkannakayo iti ari.”

¹⁸Nagkararag ngarud ni Samuel, ket naggurruod ken nagtudo iti dayta met la nga aldaw. Nagbuteng dagiti tattao ken ni Yahweh. Nagbutengda met ken ni Samuel.

¹⁹Kinunada ken ni Samuel, “Apo, pangngaasim ta ikararagannakami iti Apo a Diosyo tapno saankami a matay. Mabigbigmin a malaksid ti dadduma a basolmi, nagbasolkami pay gapu iti panagkiddawmi iti maysa nga ari.”

²⁰“Dikay agbuteng,” insungbat ni Samuel. “Uray nakaaramidkayo iti kasta a kinadakes, diyo tallikudan ti Apo ngem agserbikayo ketdi kenkuana iti amin a pusoyo.

²¹Idianyo ti agdaydayaw kadagiti didiosen; didakayo matulongan wenno maisalakan, agsipud ta awan serserbida.

²²Dinakayo baybay-an ti Dios, ta dayta ti kari a sinapataanna ket inkeddengna a pagbalinennakayo a tattaona.

²³No maipapan kaniak, adayo nga agbasolak iti Apo babaen iti panagsardengko a mangikarkararag kadakayo. Ngem isurokayo ketdi iti nasayaat ken nalinteg a dalan.

²⁴Agbutengkayo iti Apo ket agserbikayo a sipupudno kenkuana iti amin a pusoyo. Lagipenyo dagiti naindaklan a banag nga impaayna kadakayo.

²⁵Ngem no itultuloyyo ti agbasol, madadaelkayto ken ti ariyo.”