Read Iloko 1 Samuel 13 Bible Online

1 Samuel 13 - Iloko bible

1 Samuel 13

¹(…ti tawen ni Saul idi maisaad nga ari, ket dua a tawen nga inturayanna ti Israel.)

²Nangpili ni Saul iti 3,000 nga Israelita. Inkuyogna ti 2,000 idiay Micmas iti katurturodan ti Betel idinto a 1,000 kadakuada ti imbaonna ken ni Jonatan nga anakna idiay Gabaa iti sakup ti tribu ni Benjamin. Pinagawidna dagiti dadduma.

³Pinatay ni Jonatan ti kapitan dagiti Filisteo idiay Gabaa ket nadamag amin a Filisteo. Kalpasanna, nangibaon ni Saul kadagiti tattao a mangayab kadagiti Hebreo a makigubat babaen iti panagpagunida kadagiti trumpeta iti entero a pagilian.

⁴Naammoan dagiti Israelita a pinatay ni Saul ti kapitan dagiti Filisteo ket kagura dagiti Filisteo ida. Impangag ngarud dagiti tattao ti awag a tumiponda ken ni Saul idiay Gilgal.

⁵Naguummong dagiti Filisteo tapno gubatenda dagiti Israelita. Adda 30,000 a luganda a pakigubat, 6,000 a nagkabalio ken adu a mannakigubat a kas iti kaadu ti darat iti igid ti baybay. Napanda nagkampo idiay Micmas a dayaen ti Bet-aven.

⁶Nakita dagiti Israelita ti napeggad a kasasaadda. Adda dagiti naglemmeng kadagiti rukib ken kadagiti abut, kadagiti kabatoan, kadagiti tanem ken kadagiti bubon.

⁷Binallasiw dagiti dadduma ti Karayan Jordan ket napanda kadagiti sakup ti Gad ken Galaad. Adda pay laeng ni Saul idiay Gilgal, ket agtigtigerger iti buteng dagiti tattao a simmurot kenkuana.

⁸Pito nga aldaw nga inuray ni Saul ni Samuel, ngem saan a simmangpet ni Samuel iti aldaw a kinunana a yaayna. Ngarud, nangrugi ti panangpanaw dagiti tattao ken ni Saul.

⁹Iti kasta, kinunana, “Yegyo dagiti daton a mapuoran ken dagiti daton a pakikappia.” Indatagna ti daton a mapuoran.

¹⁰Apaman a nalpas ti panagidatonna, simmangpet ni Samuel. Sinabat ni Saul tapno kablaawanna,

¹¹ngem kinuna ni Samuel, “Apay a kasta ti inaramidmo?” “Makitak a mawaran ti armada ket mangrugin a panawandakon dagiti tattao,” insungbat ni Saul. “Dika met simmangpet iti aldaw nga imbagam nga isasangpetmo idinto nga aguummong dagiti Filisteo idiay Micmas.

¹²Isut' gapuna a kinunak iti bagik, ‘Rautendakon dagiti Filisteo ditoy Gilgal, ket diak pay nagdawat iti panangngaasi ti Apo.’ Daytoy ti gapuna nga inkeddengko ti mangidatag iti daton.”

¹³“Minamaag dayta nga aramid,” kinuna ni Samuel. “Dimo impangag ti imbilin kenka ti Apo a Diosmo. No impangagmo ti imbilinna kenka, pinagturaynaka koma ken dagiti kaputotam iti agnanayon.

¹⁴Ngem ita, aggibusen ti panagturaymo. Agsipud ta dimo tinungpal ti Apo, nagbirok iti lalaki a natulnog ket insaadna a mangituray kadagiti tattaona.”

¹⁵Pimmanaw ni Samuel idiay Gilgal ket intuloyna ti panagdaliasatna. Napan met ni Saul idiay Gabaa iti sakup ti Benjamin tapno tumipon kadagiti mannakigubat. Simmurot kenkuana dagiti nabati a tattao ket nagrubbuatda idiay Gilgal. Kinita ni Saul ti kasasaad dagiti buyotna nga aganay nga 600 a lallaki.

¹⁶Nagtalinaed da Saul ken ni anakna a Jonatan ken dagiti tattaoda idiay Geba iti sakup dagiti Benjamita. Adda ti kampo dagiti Filisteo idiay Micmas.

¹⁷Tallo a bunggoy dagiti mannakigubat a Filisteo ti rimmuar iti kampoda tapno rautenda dagiti Israelita. Maysa a grupo ti nagturong idiay Ofra iti sakup ti Sual;

¹⁸napan iti Bet-horon ti maikadua, ket ti maikatlo iti beddeng a tumannawag iti Tanap ti Seboim ken iti let-ang.

¹⁹Awan ti mammanday a masarakan idi iti entero nga Israel ta saan a kayat dagiti Filisteo nga agaramid dagiti Hebreo kadagiti kampilan ken gayang. (

²⁰Masapul a mapan dagiti Israelita kadagiti Filisteo tapno paasada dagiti arado, gabion, wasay, ken kumpayda.

²¹Maysa a bassit a plata ti ibayadda iti panangpaasada iti wasay ken panagpatarimaanda iti pagtugkik, ket dua met a plata iti panangpaasada iti arado wenno gabion.)

²²Daytoy ti gapuna nga idi bumtak ti gubat, awan ti kampilan wenno gayang dagiti mannakigubat nga Israelita. Ni la Saul ken ni anakna a Jonatan ti adda armasna.

²³Adda bunggoy dagiti Filisteo a naibaon a mangguardia iti Bessang ti Micmas.