Read Iloko 1 Samuel 14 Bible Online

1 Samuel 14 - Iloko bible

1 Samuel 14

¹Iti maysa nga aldaw, kinuna ni Jonatan iti agtutubo a para-awit kadagiti armasna, “Umayka, ta inta iti kampo dagiti Filisteo idiay bangir.” Ngem saan nga imbaga ni Jonatan ken ni tatangna ti papananna.

²Adda ti kampo ni Saul iti sirok ti kayo a granada idiay Migron a saan unay nga adayo idiay Gabaa. Agarup nga 600 a tattao ti kaduana.

³(Ni Ahija a padi nga anak ni Ahitob ti mangaw-awit iti efod. Agkabsat da Ahitob ken Icabod nga annak ni Finees ken appoko ni Eli a padi ni Yahweh idiay Silo.) Saan nga ammo dagiti soldado a pimmanaw ni Jonatan.

⁴Iti agsumbangir ti Bessang ti Micmas, adda dua a dadakkel ken natadem a bato a masapul a lasaten da Jonatan iti ipapanda iti kampo dagiti Filisteo. Maaw-awagan iti Boses ti maysa kadagitoy a bato ket Sene met ti sabali.

⁵Maysa ti adda iti amianan a bangir ti bessang a sumango iti Micmas. Adda iti abagatan a bangir ti sabali a bato a sumango met iti Geba.

⁶“Bumallasiwta a mapan kadagita saan a nakugit a Filisteo,” kinuna ni Jonatan iti agtutubo. “Nalabit a tulongannata ti Apo. No tulongannata, awan ti makalapped kenkuana a mangted kadatayo iti balligi, uray no bassittayo.”

⁷“Aramidem ti aniaman a kayatmo,” insungbat ti agtutubo. “Sitatallugodak a sumurot kenka.”

⁸“Ala wen,” kinuna ni Jonatan. “Bumallasiwta ket agpakitata kadagiti Filisteo.

⁹No ibagada nga urayenta ida, agtalinaedta iti yanta.

¹⁰Ngem no ibagada a mapanta iti yanda, mapanta ta daytanto ti pagilasinan nga inteden ti Apo ti balligi ket naparmekdan.”

¹¹Nagpakitada ngarud kadagiti Filisteo. Kinuna dagiti Filisteo, “Kitaenyo! Adda sumagmamano a Hebreo a rimmuar kadagiti abut a paglemlemmenganda!”

¹²Ket impukkawda ken ni Jonatan ken ti agtutubo, “Umaykay ditoy ta adda ibagami kadakayo!” “Surotennak,” kinuna ni Jonatan iti agtutubo. “Naparmekdan, ta inteden ti Apo ti balligi iti Israel.”

¹³Kimmalay-at ni Jonatan ket simmurot kenkuana ti agtutubo. Dinarup ni Jonatan dagiti Filisteo. Mapadso ti tunggal karangetna ket ituloy met a patayen ti agtutubo.

¹⁴Iti dayta umuna a panagpapatay, inuloyan ni Jonatan ken ti agtutubo ti agarup 20 a lallaki iti nagrarangetanda nga aglawa iti agarup 50 a metro kuadrado.

¹⁵Nakigtot dagiti amin a Filisteo iti away. Nagpigerger iti buteng dagiti kameng ti bunggoy a para-raut ken dagiti soldado iti kampo. Nagkintayeg ti daga ket nagsaknap ti panagbuteng.

¹⁶Nakita dagiti soldado ni Saul nga agwanwanawan idiay Geba iti sakup ti Benjamin a nawarawaran dagiti Filisteo ket dida ammo ti turturongenda.

¹⁷Isut' gapuna a kinuna ni Saul kadagiti buyotna, “Bilangenyo dagiti mannakigubat ket ammoenyo no sinno ti awan.” Nagtungpalda ket nasarakanda nga awan ni Jonatan ken ti agtutubo a para-awit kadagiti igamna.

¹⁸Kinuna ni Saul ken ni Ahija a padi, “Yegmo ditoy ti nasantoan nga efod.” (Iti dayta met la nga aldaw, aw-awiten ni Ahija ti lakasa iti sangoanan dagiti Israelita.)

¹⁹Bayat ti pannakisao ni Saul iti padi, immad-adda ti riribuk iti kampo dagiti Filisteo, isut' gapuna a kinunana kenkuana, “Awanen ti tiempo ti pannakiuman iti Apo!”

²⁰Nagsagana ni Saul ken dagiti tattaona tapno makirangetda kadagiti Filisteo. Gapu ta kasta unayen ti pannakariribuk dagiti Filisteo, isudan a mismo ti aggugubat.

²¹Immalsa dagiti Hebreo a kadua dagiti Filisteo ken kimmuyog idi kadakuada a napan iti kampo ket timmiponda kadagiti Israelita nga impanguloan da Saul ken Jonatan.

²²Nadamag met dagiti dadduma nga Israelita nga aglemlemmeng kadagiti turod ti Efraim nga agtatarayen dagiti Filisteo. Timmiponda met ket dinarupda dagiti Filisteo.

²³Dimmanon ti gubat iti labes ti Bet-aven. Iti dayta nga aldaw, insalakan ni Yahweh ti Israel.

²⁴Iti dayta nga aldaw, agkakapsut dagiti Israelita gapu iti bisinda. Adda ngamin bilin nga impaulog ken sinapataan ni Saul a mailunod ti siasinoman kadakuada a mangan iti dayta nga aldaw sakbay a balsenna dagiti kabusorna. Isut' gapuna a pulos nga awan ti nangan iti dayta nga aldaw.

²⁵Dimtengda amin iti maysa a kabakiran nga aglablabonan iti diro.

²⁶Adu ti diro iti dayta a disso, ngem awan ti nangan kadakuada agsipud ta mabutengda iti lunod ni Saul.

²⁷Nupay kasta, saan nga ammo ni Jonatan ti pangta ni tatangna a mailunod dagiti tattao. Inggaw-atna ti kayo nga iggemna; intanebna iti diro ket nangan. Simmayaat a dagus ti rikna ni Jonatan.

²⁸Ngem kinuna ti maysa kadagiti tattao, “Agkakapsutkami amin gapu iti bisinmi, ngem impangtanakami ni tatangmo idi kinunana, ‘Mailunod ti siasinoman a mangan ita nga aldaw.’”

²⁹“Nakaaramid ni tatang iti nakaal-alliaw a banag kadagiti tattaotayo,” insungbat ni Jonatan. “Kitaenyo, simmayaat ti riknak gapu ta nanganak iti diro!

³⁰Maysa pay, saan aya a nasaysayaat koma ti napasamak ita nga aldaw no nangan dagiti tattaotayo kadagiti taraon a sinamsamda kadagiti kabusor? Panunotenyo no mano pay koma a Filisteo ti napapatayda!”

³¹Iti dayta nga aldaw, pinarmek dagiti Israelita dagiti Filisteo; nagrarangetda manipud Micmas agingga idiay Aijalon. Agkakapsuten dagiti Israelita gapu iti bisin,

³²isut' gapuna a dinagdagusda ti nagtiliw kadagiti animal dagiti kabusor. Nagpartida kadagiti karnero, baka, urbon ti baka, ket gapu iti bisinda, saandan nga inikkat ti darada sakbay a kinnanda.

³³Naibaga ken ni Saul, “Kitaem, agbasbasol dagiti tattao iti Apo iti pannanganda iti karne nga adda pay laeng darana.” “Mangliliputkayo!” inyikkis ni Saul. “Mangitulidkayo iti dakkel a bato ditoy yanko.”

³⁴Kalpasanna, imbilinna, “Ibagayo kadagiti tattao a yegda ditoy dagiti baka ken karneroda. Ditoy ti pagpartian ken pangananda tapno dida agbasol iti Apo gapu iti pannanganda iti karne nga adda pay la darana.” Iti dayta a rabii, inyegda amin a bakada ket pinartida sadiay.

³⁵Nangbangon ni Saul iti maysa nga altar a maipaay ken ni Yahweh. Daytoy ti umuna nga altar a binangonna.

³⁶Kinuna ni Saul kadagiti tattaona, “Ita a rabii, rautentayo dagiti Filisteo ket agsamsamtayo agingga iti parbangon. Patayentayo amin ida.” “Aramidem ti ammom a kasayaatan,” insungbatda. Ngem kinuna ti padi, “Makiumantayo pay nga umuna iti Dios.”

³⁷Sinaludsod ngarud ni Saul iti Dios, “Rautek kadi dagiti Filisteo? Pagballigiennakami kadi?” Ngem saan a simmungbat ti Dios iti dayta nga aldaw.

³⁸Kinuna ni Saul kadagiti pangulo dagiti tattao, “Umaykay ditoy ta usigentayo no ania ti basol a naaramid ita nga aldaw.

³⁹Ikarik iti nagan ti Apo a mangisalakan iti Israel, a mapapatay ti siasinoman a matakuatan a nagbasol, uray ni Jonatan nga anakko.” Ngem awan ti uray maysa a nagtagari.

⁴⁰Kinuna ni Saul kadakuada, “Agtakderkay amin sadiay ket agtakderkami met ken Jonatan ditoy.” “Aramidem ti ammom a naimbag,” insungbatda.

⁴¹Kinuna ni Saul ken ni Yahweh a Dios ti Israel, “O Apo, apay a dinak sinungbatan ita nga aldaw. Apo a Dios ti Israel, sungbatannak koma babaen kadagiti nasagradoan a bato. No ni Jonatan ti nakabasol wenno siak, sungbatannak babaen ti Urim. Ngem no dagiti tattaom nga Israelita ti nagbasol, sumungbatka babaen iti Tummim.” Rimmuar ti nagan da Jonatan ken Saul; awan ti masapul a sungbatan dagiti tattao.

⁴²Kinuna ni Saul, “Ikeddengmo no siasino kadakami ken ni Jonatan ti nagbasol.” Rimmuar ti nagan ni Jonatan.

⁴³Ket sinaludsod ni Saul ken ni Jonatan, “Ania ngamin ti inaramidmo?” “Nanganak iti sangkabassit a diro,” insungbat ni Jonatan. “Adtoyak, sisasaganaak a matay.”

⁴⁴Kinuna ni Saul kenkuana, “Aramiden ti Dios ti rumbeng kenka, kasta met kaniak. Masapul a mapapatayka, Jonatan.”

⁴⁵Ngem kinuna dagiti tattao ken ni Saul, “Rumbeng kadi a mapapatay ni Jonatan a nanggun-od iti daytoy naindaklan a balligi ti Israel? Saan! Ikarimi iti nagan ti sibibiag nga Apo a saan a maan-ano ti uray maysa la a buok ni Jonatan. Ti inaramidna ita nga aldaw, naaramid babaen ti tulong ti Dios.” Saan ngarud nga impalubos dagiti tattao a mapapatay ni Jonatan.

⁴⁶Insardeng ni Saul ti panangsunsonna kadagiti Filisteo, ket nagsubli dagiti Filisteo iti bukodda a daga.

⁴⁷Kalpasan ti pannakaisaad ni Saul nga ari ti Israel, ginubatna ti amin a kabusorna iti amin a lugar: dagiti Moabita, Edomita ken Ammonita, dagiti ari ti Soba ken dagiti Filisteo. Nagballigi iti sadinoman a disso a nakirangetanna.

⁴⁸Simamaingel a nakigubat, ket pinarmekna pay dagiti tattao ti Amalec. Insalakanna dagiti Israelita tunggal marautda.

⁴⁹Da Jonatan, Isvi ken Malkisua dagiti lallaki nga annak ni Saul. Ni Merab ti inauna nga anakna a babai ket ni Mical ti inaudi.

⁵⁰Ni Ahinoam nga anak ni Ahimaaz ti asawana. Ni Abner a kasinsinna nga anak ni ulitegna a Ner ti pangulo ti armadana.

⁵¹Annak ni Abiel ni Kis nga ama ni Saul ken ni Ner nga ama ni Abner.

⁵²Sipipinget a nakigubat ni Saul kadagiti Filisteo iti unos ti panagbiagna. No adda idi masarakanna a lalaki a napigsa wenno natured, pagkamengenna iti armadana.