Read Iloko 1 Samuel 16 Bible Online

1 Samuel 16 - Iloko bible

1 Samuel 16

¹Kinuna ni Yahweh ken ni Samuel, “Dimo ladingiten unay ti napasamak gapu iti panangikkatko ken ni Saul nga ari ti Israel. Mangalaka iti lana ti olibo ket inka idiay Betlehem. Inka iti maysa a tao nga agnagan iti Jesse agsipud ta pinilik nga agari ti maysa kadagiti annakna.”

²Ngem insungbat ni Samuel, “Mabutengak. Patayennak la ketdi ni Saul no maammoanna a mapanak sadiay!” “Mangitugotka iti urbon ti baka ket ibagam a mangidatagka iti Apo iti daton a mapuoran,” insungbat ni Yahweh.

³“Awisem ni Jesse a dumar-ay iti panagidatonmo. Ibagakto kenka no ania ti aramidem ken no siasino ti ikonsagrarmonto nga ari.”

⁴Tinungpal ni Samuel ti imbaga kenkuana ni Yahweh. Napan idiay Betlehem. Agtigtigerger dagiti pangulo ti siudad a simmabat kenkuana ket sinaludsodda, “Pagimbagan kadi ti inayam?”

⁵“Wen,” insungbat ni Samuel. “Addaak ditoy tapno mangidatagak iti daton a mapuoran iti Apo. Dalusanyo dagiti bagbagiyo ket kumuyogkayo kaniak.” Pinadalusanna met ni Jesse ken dagiti annakna, ket inimbitaranna ida a dumar-ay iti panagidaton.

⁶Idi sumangpetda, nakita ni Samuel ni Eliab nga anak ni Jesse ket kinunana iti nakemna, “Awan duadua a daytoy a lalaki a sitatakder iti imatang ti Apo ti tao a pinilina.”

⁷Ngem kinuna ni Yahweh kenkuana, “Dimo kitaen ti kinaguapo ken kinatayagna. Saan nga isu ti pinilik. Ti pagbatayak ket saan a ti pagbatayan ti tao. Kitaen ti tao ti akinruar a langa, ngem siak, kitaek ti puso.”

⁸Kalpasanna, inayaban ni Jesse ni Abinadab ket indatagna ken ni Samuel. Ngem kinuna ni Samuel, “Saan nga isu ti pinili ti Apo.”

⁹Imparang ni Jesse ni Samma. “Uray daytoy, saan nga isu ti pinili ti Apo,” kinuna ni Samuel.

¹⁰Sinaggaysa ni Jesse nga imparang dagiti pito nga annakna; ngem kinuna ni Samuel, “Awan kadakuada ti pinili ti Apo.”

¹¹Ket sinaludsodna, “Adda kadi pay anakmo a lalaki?” “Adda pay maysa, ti buridek,” insungbat ni Jesse, “ngem adda idiay away a mangipaspastor kadagiti karnero.” “Paayabam,” kinuna ni Samuel. “Dimi puoran ti daton agingga a makasangpet.”

¹²Pinaala ngarud ni Jesse ti kaubingan. Naguapo ken napuner nga agtutubo ni David. Rumimatrimat dagiti matana. Kinuna ni Yahweh ken ni Samuel, “Isu daytoy ti pinilik. Ikonsagrarmo!”

¹³Innala ni Samuel ti lana ti olibo ket inkonsagrarna ni David iti imatang dagiti kakabsatna. Manipud iti dayta nga aldaw, nagtaeng kenkuana ti espiritu ni Yahweh. Kalpasanna, nagsubli ni Samuel idiay Rama.

¹⁴Pinanawan ti espiritu ni Yahweh ni Saul, ket adda dakes nga espiritu nga imbaonna a nangtutuok kenkuana.

¹⁵Kinuna kenkuana dagiti babaonenna, “Ammomi nga adda dakes nga espiritu nga imbaon ti Dios a mangtutuok kadakayo.

¹⁶No kayatyo, inkami sumapul iti lalaki a makaammo nga agtokar iti arpa. Iti kasta, no luganannakayo ti dakes nga espiritu, agtokar ti lalaki iti arpana ket sumayaat manen ti riknayo.”

¹⁷Imbilin ngarud ni Saul kadakuada, “Sige, isapulandak iti nalaing nga agtokar, ket yegyo kaniak.”

¹⁸“Adda anak ni Jesse a taga-Betlehem,” kinuna ti maysa kadakuada. “Nalaing nga agtokar. Natured pay a mannakigubat. Nalaing nga agsarita ken naguapo. Maysa pay, adda kenkuana ti Apo.”

¹⁹Nangibaon ngarud ni Saul kadagiti tattao a mapan ken ni Jesse ket dinawatna kenkuana nga ibaonna ni David nga anakna nga agay-aywan kadagiti karnero.

²⁰Imbaon ni Jesse ni David ken ni Saul. Pinabalonanna iti supot a lalat a napno iti arak, maysa nga urbon a kalding ken asno a nagkarga iti tinapay.

²¹Dimteng ni David ket inrugina ti panagserbina ken ni Saul. Magustoan unay ni Saul ni David, isu a pinagbalinna a para-awit iti armasna.

²²Kalpasanna, pinaibaga ni Saul ken ni Jesse, “Magustoak ni David. Bay-am nga agyan kaniakon.”

²³Manipud idin, tunggal maluganan ni Saul iti dakes nga espiritu nga ibaon ti Dios, liwliwaen ni David babaen iti panagtokarna iti arpana. Pumanaw ti dakes nga espiritu, ket mabang-aran ken sumayaat manen ti rikna ni Saul.