Read Iloko 1 Samuel 17 Bible Online

1 Samuel 17 - Iloko bible

1 Samuel 17

¹Nagtitipon dagiti Filisteo idiay Soco, maysa nga ili ti Juda, tapno agsaganada a makigubat. Nagkampoda iti maysa a disso a maaw-awagan iti Efes Dammim iti nagbaetan ti Soco ken Azeca.

²Naguummong met da Saul ken dagiti Israelita ket nagkampoda iti Tanap ti Ela. Ditoy ti nagsaganaanda a makigubat kadagiti Filisteo.

³Nagsango dagiti dua a bunggoy. Adda dagiti Filisteo iti maysa a turod ket adda met dagiti Israelita iti sabali; adda tanap iti baetda.

⁴Maysa a nalaing a mannakigubat ti rimmuar iti kampo dagiti Filisteo tapno karitenna dagiti Israelita. Isu ni Goliat a taga-Gat. Nasurok a siam a kadapan ti katayagna,

⁵ket nakakalasag iti bronse nga agdagsen iti agarup 75 a kilo. Bronse ti helmetna.

⁶Nakapulinas iti bronse dagiti sakana. Nakabaklay iti atiddog a pika a bronse.

⁷Napuskol ti gayangna, kas iti kapuskol ti kayo ti pagablan, ket agarup 10 a kilo ti dagsen ti tademna. Adda soldado a magmagna iti sangona a para-awit iti kalasagna.

⁸Nagtakder ni Goliat ket impukkawna kadagiti Israelita, “Apay pay laeng nga agsagsaganakayo a makigubat? Maysaak a Filisteo, dakayo a tagabu ni Saul! Pumilikayo laengen iti maysa kadagiti tattaoyo a makiranget kaniak.

⁹No mapataynak, mangabak ket agbalinkamto a tagabuyo; ngem no mapatayko mangabakak, ket dakayonto ti agbalin a tagabumi.

¹⁰Karitek ita met laeng ti armada ti Israel. Mangpilikayo iti makiranget kaniak!”

¹¹Nagbuteng ni Saul ken dagiti Israelita a nakangngeg iti daytoy.

¹²Anak ni Jesse ni David. Maysa nga Efrateo ni Jesse a taga-Betlehem idiay Juda. Walo ti annakna, ket lakay unayen idi panawen ti panagturay ni Saul.

¹³Kumuykuyogen dagiti tallo nga inauna nga annakna ken ni Saul iti paggugubatan. Eliab ti nagan ti inauna, Abinadab ti maikadua, ket Samma ti maikatlo.

¹⁴Ni David ti kaubingan. No kumuyog dagiti tallo a kabsatna ken ni Saul iti paggugubatan,

¹⁵masansan nga agawid ni David idiay Betlehem tapno aywananna dagiti karnero ni tatangna.

¹⁶Iti unos ti 40 nga aldaw, binigat ken minalem a kariten ni Goliat dagiti Israelita.

¹⁷Iti maysa nga aldaw, kinuna ni Jesse ken ni David, “Darasem a mapan ipan daytoy sangasalup nga iniruban ken dagitoy sangapulo a tinapay, kadagiti kakabsatmo iti kampoda.

¹⁸Itedmo met dagitoy sangapulo a keso iti kapitan ti buyot. Ammoem ti kasasaad dagiti kakabsatmo ket mangyawidka iti pakakitaan a nakitam ida a nasalun-at.

¹⁹Adda idiay Tanap ti Ela ni Ari Saul, dagiti kakabsatmo ken dagiti dadduma nga Israelita a makigubgubat kadagiti Filisteo.”

²⁰Kabigatanna, nasapa a bimmangon ni David. Impaaywanna dagiti karnero iti sabali nga agpaspastor sana innala dagiti makan ket napan iti nangibaonan ni amana. Idi sumangpet iti kampo, apag-isu a rummuar dagiti Israelita a mapan iti puestoda iti paggugubatan. Yik-ikkisda ti pakdaar ti gubat.

²¹Naguurnos dagiti buyot dagiti Filisteo ken dagiti Israelita iti bukodda a puesto; nagsinnango dagiti dua nga armada.

²²Imbati ni David ti intugotna a makan iti para-aywan kadagiti gargaret sa nagtaray a nagturong iti paggugubatan. Napan kadagiti kakabsatna ket sinaludsodna no kasano ti kasasaadda.

²³Bayat ti pannakisarsaritana kadakuada, nagpasango ni Goliat sana kinarit manen dagiti Israelita. Nangngeg ni David ti panangkaritna kadakuada.

²⁴Nagtaray dagiti Israelita a kasta unay ti butengda idi makitada ni Goliat.

²⁵“Kitaenyo!” kinunada iti tunggal maysa. “Denggenyo ti karitna. Gunggonaan ti ari ti siasinoman a makapatay iti dayta a tao. Yasawana ti anakna kenkuana ket dina pagbuisen ti familia ni tatangna.”

²⁶Sinaludsod ni David kadagiti soldado nga adda iti asidegna, “Ania ti gunggona ti mangpatay iti daytoy a Filisteo tapno ikkatenna daytoy a pannakaibabain ti Israel? Siasino met la aya daytoy saan a nakugit a Filisteo a mangkarit iti armada ti sibibiag a Dios?”

²⁷Imbagada kenkuana ti gunggona nga awaten ti makapatay ken ni Goliat.

²⁸Nangngeg ni Eliab a kabsat ni David ti pannakisarsarita ti adingna kadagiti tattao. Nakapungtot ken ni David ket kinunana, “Apay nga addaka ditoy? Siasino itan ti mangay-aywan kadagiti karnero idiay let-ang? Kaska la kalaingan. Immayka laeng tapno umaymo buyaen ti gubat!”

²⁹“Ania kadi ti inaramidko?” sinaludsod ni David. “Nagsaludsodak laeng.”

³⁰Pinanawan ni David ti kabsatna tapno agsaludsod manen iti sabali. Tunggal tao a pagsaludsodanna, agpapada ti isungbatda kenkuana.

³¹Adda dagiti nakangngeg iti sao ni David ket imbagada ken ni Saul. Pinaayaban ngarud ni Saul ni David.

³²Kinuna ni David kenkuana, “Natan-ok nga Ari, awan koma ti agbuteng iti daytoy a Filisteo. Siak ti mapan makiranget kenkuana.”

³³“Saan,” insungbat ni Saul. “Dimo kabaelan ti makiranget kenkuana. Ubingka pay laeng idinto a soldadon manipud kinaagtutubona!”

³⁴“Natan-ok nga Ari,” kinuna ni David, “siak ti agay-aywan kadagiti karnero ni tatangko. No adda leon wenno oso a mangitaray iti urbon,

³⁵kamatek sako rugmaan ket isalakanko ti urbon. No sangoennak ti leon wenno oso, bekkelek agingga a matay.

³⁶Adun ti napatayko a leon ken oso ket kasta met ti aramidek iti daytoy saan a nakugit a Filisteo a nangkarit iti armada ti sibibiag a Dios.

³⁷Ti Apo a nangisalakan kaniak kadagiti leon ken oso, ti mangisalakan met kaniak iti daytoy a Filisteo.” Kinuna ni Saul, “Inka ngarud ket sapay koma ta tulongannaka ti Apo.”

³⁸Inted ni Saul ti bukodna a kalasag ken ni David. Inikkanna iti bronse a helmet ken iti kabal a pagan-anayna.

³⁹Inyarruat ni David ti kabal sana imbarikes ti kampilan ni Saul. Ngem dandani saan a makapagna ni David agsipud ta saan a naruam nga agaramat kadagitoy. Kinunana ken ni Saul, “Diak mabalin ti makiranget a siaarmas kadagitoy. Diak pay napadasan ti nagaramat kadagitoy.” Inikkatna ngarud ida.

⁴⁰Innalana ti sarukodna nga agpaspastor. Pimmidut iti lima a nalinis a bato iti waig sana inkarga iti supotna. Insaganana ti pallatibongna ket napanna sinango ni Goliat.

⁴¹Nagna ni Goliat nga agturong ken ni David. Magmagna iti sangona ti para-awit iti kalasagna. Umasideg nga umasideg ti Filisteo

⁴²ket idi makitana a naimbag ni David, napalalo ti panangumsina kenkuana, agsipud ta maysa laeng nga ubing a naguapo ken nataer.

⁴³Kinunana ken ni David, “Ania ti ipagarupmo? Aso kadi ti karangetmo ta sarukod laeng ti armasmo?” Ket inlunodna ni David iti nagan dagiti diosna

⁴⁴sana inkarit, “Ala, umasidegka ngarud ta ipakanko ti bangkaymo kadagiti tumatayab ken ayup.”

⁴⁵“Umayka makiranget kaniak a sikakampilan, sigagayang ken sipipika,” insungbat ni David, “ngem sangoenka iti nagan ti Apo a Mannakabalin-amin a Dios ti armada ti Israel a kinaritmo.

⁴⁶Ita met la nga aldaw, yawatnaka ti Apo iti pannakabalinko. Patayenka ket putolanka, sakonto met ipakan kadagiti tumatayab ken ayup ti bangkay dagiti mannakigubat a Filisteo. Maammoanto ti entero a pagilian nga adda Dios ti Israel,

⁴⁷ket makitanto dagiti amin a naummong ditoy a dina masapul ti kampilan wenno gayang a pangisalakan kadagiti tattaona. Agballigi ti Apo iti gubat ket yawatnakayo amin iti pannakabalinmi.”

⁴⁸Intuloy ni Goliat ti immasideg. Nagtaray met ni David a simmabat kenkuana.

⁴⁹Kinautna ti supotna ket nangiruar iti maysa a bato nga impallatibongna ken ni Goliat. Napuntaan ti muging ni Goliat ket limmumlom ti bato. Natuang a napakleb ni Goliat iti daga.

⁵⁰Nagballigi ni David. Uray awan ti kampilanna, pinarmekna ni Goliat babaen iti pallatibong ken maysa a bato.

⁵¹Nagtaray a napan iti yan ni Goliat ket nagtakder iti bangkayna. Inasutna ti kampilan ni Goliat ket pinutolanna. Nagtataray dagiti Filisteo idi nakitada a natayen ti maingelda.

⁵²Um-umkis dagiti tattao ti Israel ken Juda a nangsunson kadakuada. Kinamatda ida agingga iti dalan nga agpa-Gat ken kadagiti ruangan ti Ekron. Agkaiwara dagiti nasugatan a Filisteo iti dalan nga agpa-Saaraim agingga idiay Gat ken Ekron.

⁵³Idi nagsubli dagiti Israelita iti panangkamatda kadagiti Filisteo, nagsamsamda iti kampo dagiti kabusorda.

⁵⁴Inyawid ni David ti ulo ni Goliat sana impan idiay Jerusalem, ngem indulinna dagiti armas ni Goliat iti bukodna a tolda.

⁵⁵Nakita idi ni Saul ti pannakiranget ni David ken ni Goliat, ket sinaludsodna ken ni Abner a pangulo ti armadana, “Abner, siasino ti ama dayta nga ubing?” “Diak ammo, Natan-ok nga Ari,” insungbat ni Abner.

⁵⁶“Inka ngarud ammoen,” kinuna ni Saul.

⁵⁷Isut' gapuna nga idi agsubli ni David iti kampo kalpasan ti panangpapatayna ken ni Goliat, inayaban ni Abner ket indatagna ken ni Saul. Ig-iggaman pay laeng ni David ti ulo ni Goliat.

⁵⁸Sinaludsod ni Saul, “Agtutubo, siasino kadi ti akin-anak kenka?” “Siak ti anak ni Jesse nga adipenmo a taga-Betlehem,” insungbat ni David.