Read Iloko 1 Samuel 18 Bible Online

1 Samuel 18 - Iloko bible

1 Samuel 18

¹Nalpas ti panagsarita da Saul ken David. Naragsakan ni Jonatan nga anak ni Saul ken ni David ket manipud idin, nasursurona nga impateg a kas iti panangipategna iti bagina.

²Pinagnaed ni Saul ni David iti sidongna ket dina pinalubosanen nga agawid.

³Gapu iti panangipateg unay ni Jonatan ken ni David, nagtulagda nga aggayyemda iti agnanayon. Sinapataanda ti nagtulaganda.

⁴Inuksob ni Jonatan ti kagayna ket intedna ken ni David. Intedna pay ti kalasag ken ti kampilanna, ti bai ti panana ken ti barikesna.

⁵Nagballigi ni David iti amin a nangibaonan ni Saul kenkuana isut' gapuna a pinagbalin ti ari a maysa nga ofisial iti armadana. Gapu iti pannakaital-o ni David, naragsakan dagiti amin a tattao ni Saul ken dagiti ofisialesna kenkuana.

⁶Kalpasan ti panangpatay ni David ken ni Goliat, nagawid ni Ari Saul ken dagiti tattaona. Tunggal ili a malabasanda, sabten ida dagiti babbai nga agsasala ken agkakanta bayat ti panagtokarda kadagiti pandereta ken lira.

⁷Kastoy ti ikankantada: “Rinibu ti pinatay ni Saul, ngem pinullo ribu ti pinatay ni David.”

⁸Nasair ti rikna ni Saul iti daytoy a kanta ket kasta unay ti pungtotna. “Pinullo ribu ti kunada a pinatay ni David idinto a rinibu laeng ti ibagada a pinatayko,” kinunana. “Awan duadua nga isarunodanto a pagbalinen nga ari.”

⁹Manipud idin, napalalo ti apasna ken ni David.

¹⁰Iti sumuno nga aldaw, bayat ti kaadda ni Saul iti balayna, adda dakes nga espiritu a naggapu iti Dios a nangituray kenkuana. Kasla agmauyong a nagsaosao ni Saul idinto nga agtuktokar ni David iti arpa a kas iti ar-aramidenna iti inaldaw. Siiiggem met ni Saul iti gayang,

¹¹ket kinunana iti bagina, “Gayangek ni David agingga a masalput ti bagina, ket maipideg iti diding.” Namindua a ginayangna ngem nakalisi ni David.

¹²Nagbuteng ni Saul ken ni David, ta ammona nga adda ni Yahweh ken ni David ngem awan ni Yahweh kenkuana.

¹³Pinapanawna ngarud ni David ket pinagbalinna a pangulo iti 1,000 a soldado. Impanguloan ni David dagiti tattaona iti paggugubatan.

¹⁴Nagballigi iti amin nga aramidna agsipud ta adda kenkuana ni Yahweh.

¹⁵Immad-adda ti panagbuteng ni Saul ken ni David idi makitana ti balligina.

¹⁶Nupay kasta, inay-ayat dagiti amin nga Israelita ken taga-Juda ni David, ta impanguloanna ida iti amin a pakigubatanda.

¹⁷Kinuna ni Saul ken ni David, “Yasawak kenka ni Merab nga inauna nga anakko no agserbika kaniak a kas natured a soldado a makiranget kadagiti gubat ni Yahweh. (Napanunot ni Saul nga iti kastoy a pamuspusan, dagiti Filisteo ti mangpatay ken ni David a saan nga isu.)

¹⁸“Siasinoak ken ania ti familiak tapno maikariak nga agbalin a manugang ti ari?” insungbat ni David.

¹⁹Ngem idi dumteng ti tiempo a pannakayasawa ni Merab ken ni David, naited ketdi iti lalaki nga agnagan iti Adriel a taga-Mehola.

²⁰Nupay kasta, agayat ken ni David ni Mical a sabali nga anak ni Saul, ket naragsakan ni Saul idi maammoanna daytoy.

²¹Kinunana iti nakemna, “Itedko ni Mical ken ni David. Isut' usarek a mangipalab-og ken ni David tapno patayen dagiti Filisteo.” Ngarud, iti maikadua a daras, kinuna ni Saul ken ni David, “Agbalinka a manugangko.”

²²Binilinna dagiti ofisialesna a kasaoda ni David iti nalimed tapno ibagada, “Maay-ayo kenka ti ari, kasta met dagiti amin nga ofisialesna. Daytoyen ti napintas a gundawaymo a mangasawa iti anakna.”

²³Impakaammoda daytoy ken ni David ket insungbatna, “Dakkel a pakaidayawan ti panagbalin a manugang ti ari. Maysaak laeng a napanglaw ken nanumo a tao.”

²⁴Imbaga dagiti ofisiales ken ni Saul ti kinuna ni David.

²⁵Binilin ni Saul ida a kastoy ti ibagada kenkuana: “Awan ti sab-ong a kalikaguman ti ari no di laeng dagiti mageppas a kudil iti murdong ti mabagbagi dagiti 100 a natay a Filisteo, kas panagibalesna kadagiti kabusorna.” (Kastoy ti panangplano ni Saul iti pannakapapatay ni David iti ima dagiti Filisteo.)

²⁶Imbaga dagiti ofisiales ken ni David ti kinuna ni Saul. Naragsakan ni David iti panagbalinna a manugang ti ari. Sakbay ti naituding nga aldaw ti kasar,

²⁷rimmuar ni David ken dagiti tattaona ket nangpatayda iti 200 a Filisteo. Impanna dagiti nageppas a kudilda iti ari ket binilangna ida iti sangona tapno maawat a kas manugangna. Inyasawa ngarud ni Saul ni Mical ken ni David.

²⁸Nalawag ti pannakabigbig ni Saul nga adda ni Yahweh ken ni David ken ay-ayaten met ni Mical nga anakna.

²⁹Daytoy ti gapuna nga ad-adda manen ti panagbutengna ken ni David ket binusorna iti unos ti panagbiagna.

³⁰Masansan a rumaut dagiti buyot dagiti Filisteo tapno makigubatda, ngem tunggal umayda, ad-adda ti panagballigi ni David ngem dagiti dadduma nga ofisiales ni Saul. Daytoy ti gapuna a nagdindinamag ni David.