Read Iloko 1 Samuel 2 Bible Online

1 Samuel 2 - Iloko bible

1 Samuel 2

¹Inkararag ni Ana: “Pinunno ti Apo toy pusok iti rag-o; gapu iti inaramidna, anian a ragsakko. Katawaak dagiti kabusorko; wen, maragsakanak ta tinulongannak ti Dios!

²“Awan ti nasantoan a kas iti Apo; awan ti kas kenkuana; awan ti bato a kas iti Diostayo.

³Isardengyo ti panagpaspasindayagyo, ket isardengyon ti panagpalangguadyo. Ta ti Apo ket Dios a makaammo iti amin, ukomenna ti aramid ti tao.

⁴Matukkol ti pana dagiti maingel a soldado, ngem pumigsa dagiti nakapuy.

⁵Dagiti aglaplapusanan idi iti taraon, manggeddan tapno adda kanenda ngem dinton agbisin dagiti nabisinan. Pito ti annak ti babai a saan idi nga aganak, ngem awanen ti nabati nga anak ti adu ti anakna.

⁶Mangpapatay ti Apo ken mangted iti biag; ipanna ti tao iti lubong dagiti natay, pagungarenna ti natay.

⁷Adda dagiti pagpanglawenna ket pabaknangenna ti dadduma. Adda dagiti ipababana, ket ti dadduma itan-okna.

⁸Manipud iti tapok, bangonenna ti nakurapay ket ti napanglaw aonenna iti kasasaad a nakaay-ay-ay. Ikkanna ida iti lugar iti ayan dagiti prinsipe, ket isaadna ida iti natan-ok a pagtugawan. Kukua ti Apo dagiti fondasion ti daga; binangonna ti lubong iti rabawda.

⁹“Salaknibanna ti biag dagiti napudno a tattaona, ngem mapukaw ti managdakdakes iti kasipngetan; saan nga agballigi ti tao babaen iti bukodna a pigsa.

¹⁰Madadaelto dagiti kabusor ti Apo inton gurruodanna ida manipud langit. Ukomento ti Apo ti entero a lubong; ikkannanto ti arina iti pannakabalin, ket pagballigiennanto ti ari a pinilina.”

¹¹Nagawid da Elcana idiay Rama. Ngem nabati ni ubing a Samuel idiay Silo ket nagserbi ken ni Yahweh iti babaen ni Eli a padi.

¹²Rinuker dagiti annak ni Eli. Saanda nga ikankano ni Yahweh

¹³ken dagiti alagaden maipapan kadagiti it-ited dagiti tattao kadagiti papadi. Kastoy ngamin ti ugali dagiti papadi: No adda mangidatag iti datonna, umay ti adipen ti padi a nakaiggem iti tenedor a tallo ti pagtudokna. Bayat ti pannakalutluto ti karne,

¹⁴idugsolna ti tenedor iti paglutoan, ket kukua ti padi ti aniaman a maala ti tenedor. Kastoy ti ar-aramidenda idiay Silo kadagiti daton dagiti amin nga Israelita a mapan sadiay.

¹⁵Maysa pay, sakbay a mailasin ti taba tapno mapuoran, umay ti adipen ti padi ket kunana iti tao a madama nga agidatdaton, “Ikkannak iti karne a tunoen ti padi. Dina awaten ti naanger a karne nga itedmo. Sadiwa laeng ti kayatna.”

¹⁶No kuna dagiti tattao nga agidatdaton, “Bay-am ta mapuoran pay nga umuna ti taba kas kadawyan samonto alaen ti kaykayatmo,” kuna met ti adipen ti padi, “Saan! Itedmo kaniakon! No madika, agawek!”

¹⁷Iti imatang ni Yahweh, nadagsen unay daytoy a basol dagiti annak ni Eli gapu ta awan panagraemda kadagiti maidaton kenkuana.

¹⁸Kabayatanna, intultuloy ni ubing a Samuel ti panagserbina ken ni Yahweh. Nagarruat iti nasagradoan nga apron a naaramid iti linen.

¹⁹Tinawen nga yaramidan ni nanangna iti bassit a kagay, ket ipanna kenkuana no kumuyog iti asawana a mapan mangidatag iti daton.

²⁰Bendisionan ni Eli da Elcana ken ti asawana, ket kunana iti lalaki, “Sapay koma ta ikkannakayo pay ti Apo iti sabali nga annak a mangala iti lugar ti ubing nga indatonyo kenkuana.” Kalpasanna, agawid dagiti agassawa idiay Rama.

²¹Binendisionan ni Yahweh ni Ana, ket naganak pay iti tallo a lallaki ken dua a babbai. Dimmakkel ni ubing a Samuel bayat ti panagserbina ken ni Yahweh.

²²Lakay unayen ni Eli. Kanayon a madamagna ti amin nga ar-aramiden dagiti annakna kadagiti Israelita. Naammoanna pay ti pannakikakaiddada kadagiti babbai nga agserserbi iti ruangan ti Tolda ti Dios.

²³Iti kasta, kinunana kadakuada, “Apay nga ar-aramidenyo dagitoy? Ibagbaga ti amin kaniak ti dakes nga ar-aramidenyo.

²⁴Isardengyo, annakko! Nakarimrimon dagitoy nga iwarwaras dagiti tattao ti Apo.

²⁵No agbasol ti tao iti padana a tao, salakniban ti Dios. Ngem siasino ti makasalaknib iti tao nga agbasol iti Dios?” Ngem dida impangag ti amada, ta inkeddengen ni Yahweh a patayenna ida.

²⁶Bayat ti idadakkel ni Samuel, immad-adda ti pannakaitan-okna iti imatang ni Yahweh ken iti tao.

²⁷Adda profeta a napan ken ni Eli, ket imbagana daytoy a mensahe ni Yahweh: “Idi tagabu ti ari ti Egipto ni kapuonam nga Aaron ken ti familiana, imparangarangko ti bagik ken ni Aaron.

²⁸Pinilik ida kadagiti amin a tribu ti Israel tapno agbalinda a papadi nga agserbi kaniak iti altar, agpuor iti insenso ken agaruat iti efod a makiuman kaniak. Inikkak ida iti kalintegan a makibingay kadagiti daton a mapuoran iti altar.

²⁹Ita, apay nga agumanyo dagiti sakrifisio ken daton nga imbilinko nga ited dagiti tattaok? Eli, apay nga ad-adda a padayawam dagiti annakmo ngem iti siak? Apay nga ipalubosmo a palpalukmegenda dagiti bagbagida kadagiti kasayaatan a paset ti amin a daton nga idatag dagiti tattaok kaniak?

³⁰Siak, ni Yahweh a Dios ti Israel, ti nangikari idi iti familiam ken iti kaputotam nga agserbida kaniak a padi iti agnanayon. Ngem ita, ibabawikon! Ta raemek laeng dagiti agraem kaniak, ket umsiek met dagiti mangumsi kaniak.

³¹Denggem, umayen ti tiempo a patayek dagiti amin nga agtutubo a lallaki iti familiam ken iti kaputotam ket awanton ti malakayan iti familiam.

³²Mariribukkanto, ket apalamto ti amin a parabur nga itedko iti Israel, ngem pulos nga awanton malakayan wenno mabaketan iti familiam iti agnanayon.

³³Nupay kasta, pagtalinaedekto a sibibiag ti maysa kadagiti kaputotam, ket agserbinto kaniak a kas padi. Ngem agbulsekto ket mapukawnanto amin a namnamana. Nadawelto ti ipapatay dagiti dadduma a kaputotam.

³⁴Inton aggiddan a matay dagiti dua nga annakmo, da Ofni ken Finees, isunton ti pagilasinam a matungpal ti imbagak.

³⁵Mangpiliakto iti padi a napudno kaniak ket tungpalenna ti amin nga ibagak nga aramidenna. Ikkakto kadagiti kaputotan a kanayon nga agserbi iti pinilik nga ari.

³⁶Kasapulan a dumatagto iti pinilik ti amin a makalasat a kaputotam ket dumawatdanto kenkuana iti kuarta ken makan. Agpakpakaasidanto kenkuana a mapalubosanda koma a tumulong kadagiti papadi tapno adda kanenda.”