Read Iloko 1 Samuel 20 Bible Online

1 Samuel 20 - Iloko bible

1 Samuel 20

¹Nagtalaw ni David idiay Najot a sakup ti Rama ket napan ken ni Jonatan. Sinaludsodna ken ni Jonatan, “Ania ti inaramidko? Adda kadi krimen nga inaramidko? Ania aya ti basolko ken ni tatangmo ta kayatnak a patayen?”

²“Adayo a kasta ti mapasamak,” insungbat ni Jonatan. “Awan ti aramiden ni tatang a dina ipakaammo kaniak, nasken man wenno saan. Diak patien a kayatnaka a patayen!”

³Ngem simmungbat ni David, “Ammo unay ni tatangmo no kasano ti panangipategmo kaniak, ket napanunotna a dina ipalgak kenka ti panggepna nga aramiden amangan no agsakit ti nakemmo. Isapatak kenka a maysa laengen nga addang ti baetmi ken patay!”

⁴“Aramidek ti aniaman a tarigagayam,” kinuna ni Jonatan.

⁵Insungbat ni David, “Fiesta ti Lutuad inton bigat, ket masapul a makilanglangakto iti ari. Ngem palubosannak koma a mapan aglemmeng iti away agingga iti rabii iti sumaruno nga aldaw.

⁶No madlawto ni tatangmo nga awanak iti panganan, ibagam kenkuana nga inyunay-unayko kenka a palubosannak nga agawid a dagus idiay Betlehem, agsipud ta idaton ti entero a familiak ti tinawen a sakrifisio.

⁷No kunana, ‘Ala, wen,’ awanto ti pakaan-anoak. Ngem no makapungtot isunto ti pakaammoam a pudno a kayatnak a patayen.

⁸Pangngaasim ta ipaaymo a naimbag a nakem, ket tungpalem daytoy nasagradoan a karim kaniak. Ngem no nagbasolak, sika a mismo ti mangpatay kaniak. Apay nga ipalubosmo a ni tatangmo ti mangpatay kaniak?”

⁹“Dimo panunoten dayta,” insungbat ni Jonatan. “No maammoak a pudno a dangrannaka ni tatang, ibagak nga ibaga kenka.”

¹⁰“Siasinonto ti mangipakaammo kaniak no sungbatannaka a sipupungtot ni tatangmo?” sinaludsod ni David.

¹¹“Inta idiay away,” insungbat ni Jonatan. Napanda ngarud iti away,

¹²ket kinuna ni Jonatan ken ni David, “Ti koma Apo a Dios ti Israel ti agpaay a saksita. Iti kastoy nga oras inton bigat ken iti sumaruno nga aldaw, pagsaludsodakto ni tatang. No nasayaat ti riknana kenka, pakaammoankanto.

¹³No panggepnaka a dangran, patayennak koma ti Apo no dika pakaammoan ket pumanawka nga awan ti pakaan-anoam. Sapay koma ta adda kenka ti Apo a kas iti kaaddana idi ken ni tatangko.

¹⁴Ita, no sibibiagak pay met laeng, salimetmetam koma ti nasagradoan a kari ket agtalinaedka a napudno kaniak. Ngem no matayak,

¹⁵aywanamto koma iti agnanayon ti familiak. Ket kalpasan ti panangdadael a mamimpinsan ti Apo iti amin a kabusormo,

¹⁶sapay koma ta dinto mawaswas ti nagtulaganta. No masalungasing, dusaennakanto ti Apo.”

¹⁷Pinagkari manen ni Jonatan ni David a taginayonenna ti panangipategna kenkuana ta ipatpateg unay ni David a kas iti panangipateg iti bagina. Nagkari ni David.

¹⁸Kalpasanna, kinuna ni Jonatan ken ni David, “Fiesta ti Lutuad inton bigat, ket no awanka iti panganan, madlawto ti kaawanmo.

¹⁹Iti sumuno nga aldaw, nalaklakanton a madlaw ti kaawanmo. Inka ngarud iti disso a naglemmengam idi, ket aglemmengka iti likudan ti nabunton a bato sadiay.

²⁰Mangibiatakto iti tallo a pana iti nabunton a bato a kasla isu ti puntaak.

²¹Ibagakto a mapan biroken ti adipenko. No kunak kenkuana, ‘Adda dagiti pana dita sikigam; alaem ida,’ kaipapananna nga awan ti pakaan-anoam ket mabalinmo ti rummuar. Isapatak iti nagan ti sibibiag nga Apo nga awanto ti pagpeggadam.

²²Ngem no ibagak kenkuana, ‘Adda dagiti pana iti labesmo,’ pumanawkan, agsipud ta papanawennaka ti Apo.

²³No maipapan iti nagtulaganta, ti Apo ti saksita tapno agtalinaed daytoy a kari iti agnanayon.”

²⁴Naglemmeng ngarud ni David iti away. Iti Fiesta ti Lutuad, simmango ni Saul iti lamisaan ket

²⁵nagtugaw iti masansan a pagtugtugawanna iti asideg ti diding. Nagtugaw ni Abner iti abayna. Nagtugaw met ni Jonatan iti bangir ti lamisaan a sumangsango iti ari. Bakante ti tugaw ni David,

²⁶ngem awan ti sinao ni Saul iti dayta nga aldaw, agsipud ta impagarupna nga adda napasamak kenkuana ket saan a nadalus iti imatang ti linteg.

²⁷Iti sumuno nga aldaw kalpasan ti Fiesta ti Lutuad, bakante pay laeng ti tugaw ni David. Sinaludsod ni Saul ken ni Jonatan, “Apay a saan nga immay nangan ni David ita ken idi kalman?”

²⁸“Nagpakpakaasi kaniak a palubosak a mapan idiay Betlehem,” insungbat ni Jonatan.

²⁹“‘Pangngaasim ta palubosannak,’ kinunana, ‘agsipud ta rambakan ti familiak ti fiesta ti daton idiay ilimi, ket imbilin ti kabsatko a lalaki a mapanak sadiay. Ngarud no gayyemnak met laeng, palubosannak a mapan tapno makitak dagiti kabagiak.’ Isut' gapuna nga awan ni David iti tugawna iti panganan.”

³⁰Nakapungtot ni Saul ken ni Jonatan ket kinunana kenkuana, “Sika nga anak ti nasukir ken dakes a babai! Ita, ammokon a kankanunongam ni David ket ibabainmo ti bagim ken dayta nga inam!

³¹Dimo kad ammo a no sibibiag pay met la ni David, pulos a dikanto makapagari iti daytoy a pagilian? Ita, inka alaen ket yegmo ditoy—masapul a matay!”

³²“Apay a rumbeng a matay?” insungbat ni Jonatan. “Ania kadi ti inaramidna?”

³³Gapu iti daytoy, ginayang ni Saul ni Jonatan tapno patayenna ket nabigbig ni Jonatan a pudno a kayat a patayen ni Saul ni David.

³⁴Sipupungtot ni Jonatan a pimmanaw iti panganan; saan a nangan iti dayta nga aldaw—ti maikadua nga aldaw ti Fiesta ti Lutuad. Kasta unay ti pannakariribukna maipuon ken ni David agsipud ta imbabain ni Saul.

³⁵Iti sumuno nga agsapa, napan ni Jonatan iti away tapno agkitada ken ni David a kas nagnumoanda. Nangitugot iti maysa a bumarito.

³⁶“Agtarayka ket sapulem dagiti pana nga ibiatko,” kinunana kenkuana. Nagtaray ti ubing ket nangibiat ni Jonatan iti pana iti labes ti adipenna.

³⁷Idi dumanon ti ubing iti disso a nagdissoan ti pana, impukkaw ni Jonatan kenkuana, “Adda ti pana iti labesmo.

³⁸Darasem a mapan alaen! Dika agtaktak!” Pinidut ti ubing ti pana ket nagsubli iti ayan ti apona.

³⁹Dina ammo no ania ti kaipapanan ti amin. Da Jonatan ken David laeng ti makaammo.

⁴⁰Inted ni Jonatan dagiti igamna iti ubing ket imbagana kenkuana nga isublina iti ili.

⁴¹Kalpasan ti ipapanaw ti ubing, rimmuar ni David iti nabunton a bato, namitlo a nagpakleb iti daga a kas panangipakitana iti panagdayawna. Agsangsangitda ken ni Jonatan bayat ti panaginnagekda. Nakarkaro ti panagladingit ni David ngem ni Jonatan.

⁴²Kinuna ni Jonatan ken ni David, “Dios ti kumuyog kenka. Sapay koma ta tulongannata ti Apo a mangsalimetmet iti karinkarita a nasagradoan ket kasta koma met ti panangsalimetmet dagiti kaputotam ken dagiti kaputotak iti agnanayon.” Pimmanaw ni David, ket nagsubli ni Jonatan iti ili.