Read Iloko 1 Samuel 22 Bible Online

1 Samuel 22 - Iloko bible

1 Samuel 22

¹Naglibas ni David iti siudad ti Gat ket napan iti maysa a rukib iti asideg ti ili ti Adullam. Idi madamag dagiti kakabsatna ken dagiti dadduma a kameng ti familiana nga adda sadiay ni David, napanda timmipon kenkuana.

²Timmipon kenkuana ti amin a maidaddadanes wenno nakautang wenno dagiti adda saksakiten ti nakemda, ket isu ti nagbalin a panguloda. Agarup a 400 a lallaki ti kimmappon kenkuana.

³Manipud sadiay, napan ni David idiay Mizpa nga ili iti Moab, ket kinunana iti ari ti Moab, “Pangngaasim ta ipalubosmo nga agdagus pay la kenka ni tatangko ken ni nanangko agingga a maammoak no ania ti aramiden ti Dios kaniak.”

⁴Imbati ngarud ni David dagiti nagannak kenkuana iti ari ti Moab, ket nagyanda sadiay bayat ti panaglemmengna iti rukib.

⁵Napan ni profeta Gad ken ni David. “Saanka nga agyan ditoy,” kinuna ti profeta. “Inka a dagus idiay Juda.” Pimmanaw ngarud ni David ket napan iti kabakiran ti Heret.

⁶Iti maysa nga aldaw, adda ni Saul idiay Gabaa. Agtugtugaw iti sirok ti maysa a salamagi ket ig-iggamanna ti gayangna. Agtaktakder met iti lawlawna dagiti ofisialesna. Naipadamag kenkuana a nabirokandan ti paglemlemmengan ni David ken dagiti tattaona,

⁷ket kinunana kadagiti ofisialesna, “Dumngegkayo, dakayo a Benjaminita! Namnamaenyo kadi nga ikkannakayo amin ni David iti talon ken kaubasan? Ipagarupyo kadi a pagbalinennakayo nga ofisial iti armadana?

⁸Daytoy kadi ti gapuna nga isiksikatdak? Awan kadakayo ti nangibaga kaniak a nakitulag ti mismo nga anakko ken ni David. Awan ti mangisakit kaniak, wenno mangibaga nga agsapsapul itan ti maysa kadagiti tattaok iti gundawayna a mangpatay kaniak ken sinugsogan ti anakko nga isikatnak!”

⁹Nakatakder met idi ni Doeg nga Edomita iti ayan dagiti ofisiales ni Saul. Kinunana, “Nakitak ni David idiay Nob, idi napan ken Ahimelec nga anak ni Ahitob.

¹⁰Nakiuman ni Ahimelec ken ni Yahweh ket sinaludsodna no ania ti rumbeng nga aramiden ni David. Kalpasanna, inikkanna ni David iti balonna sana inted ti kampilan ni Goliat a Filisteo.”

¹¹Pinaayaban ngarud ni Ari Saul ni Ahimelec a padi ken dagiti amin a kabagianna a papadi met iti Nob ket dimmatagda kenkuana.

¹²“Dumngegka, Ahimelec,” kinuna ni Saul. “Adtoyak a madadaan nga agserbi kadakayo, apo,” insungbatna.

¹³Sinaludsod ni Saul, “Apay nga isiksikatdak—dakayo ken David? Apay nga inikkam ni David iti taraon ken kampilan? Apay a nakiumanka iti Dios maipuon kenkuana? Ita, binusornakon, ket ur-urayenna ti gundawayna a mangpatay kaniak!”

¹⁴Simmungbat ni Ahimelec, “Ni David ti kapudnoan nga ofisialmo! Isu ti mismo a manugangmo, kapitan dagiti guardiam ken raraemen amin nga adda iti palasiom.

¹⁵Wen, nakiumanak iti Dios a maipaay kenkuana ngem saan la a daytoy ti pannakiumanko. No maipapan iti panangisikatko kenka, dinak koma pabasolen ti natan-ok nga ari wenno pabasolen ti siasinoman a kameng ti familiak. Awan ti ammok iti daytoy a banag!”

¹⁶“Ahimelec,” kinuna ti ari, “masapul a mataykayo nga agkakabagian.”

¹⁷Kinunana kadagiti guardia nga agtatakder iti asidegna, “Patayenyo dagiti papadi ti Apo, ta nakikumplotda ken ni David! Dida imbaga kaniak a naglibas ni David uray no ammoda.” Ngem nagkedked dagiti guardia a mangpatay kadagiti papadi ni Yahweh.

¹⁸Isut' gapuna a kinuna ni Saul ken ni Doeg, “Sika ti mangpapatay kadakuada!” Ket pinatay amin ida ni Doeg. Iti dayta nga aldaw, pinatayna ti 85 a papadi a siaarwat iti linen nga efod.

¹⁹Pinapapatay met ni Saul ti dadduma nga agnaed iti Nob a siudad dagiti papadi. Babbai ken lallaki, ubbing ken maladaga, bakbaka ken asno ken karnero—napapatayda amin.

²⁰Ngem nakalibas ni Abiatar a maysa kadagiti annak ni Ahimelec. Napan timmipon ken ni David,

²¹ket imbagana kenkuana a pinapatay ni Saul dagiti papadi ni Yahweh.

²²Kinuna ni David kenkuana, “Idi nakitak ni Doeg sadiay iti dayta nga aldaw, ammok nga agipulong ken ni Saul. Ngarud, siak ti nakaigapuan ti pannakapapatay dagiti amin a kabagiam.

²³Agyanka kaniak ket dika agbutbuteng. Kayatnata a patayen ni Saul, ngem natalgedka ditoy dennak.”