Read Iloko 1 Samuel 25 Bible Online

1 Samuel 25 - Iloko bible

1 Samuel 25

¹Natay ni Samuel, ket naguummong amin dagiti Israelita a mangdung-aw kenkuana. Intanemda iti balayna idiay Rama. Kalpasan daytoy, napan ni David iti let-ang ti Paran.

²Adda idi lalaki nga agnagan iti Nabal a nagtaud iti kapuonan ni Caleb. Taga-Maon ni Nabal. Nakabakbaknang ket adda dagana iti asideg iti ili ti Carmel. Adda 3,000 a karnerona ken 1,000 a kaldingna. Napintas ken nasaririt ni Abigail nga asawana, ngem nasabrak ken dakes ti ugali ni Nabal. Pukpukisan idi ni Nabal dagiti karnerona idiay Carmel.

⁴Adda met idi ni David idiay let-ang ket idi maammoanna daytoy,

⁵nangibaon iti sangapulo nga agtutubo a mapan idiay Carmel. Binilinna ida a birokenda ni Nabal ket idanonda kenkuana ti pakomustana.

⁶Kastoy ti pinaibagana: “Pakomustaannaka ni David; pakomustaanna met ti familiam ken amin nga adda kenka.

⁷Nadamagna a pappapukisam dagiti karnerom, ket kayatna nga ipakaammo kenka nga adda idi dagiti pagpaspastorem iti sakupna ket dida rinangranggasan ida. Pulos nga awan ti natakaw a kukuada bayat ti kaaddada idiay Carmel.

⁸Damagem laeng kadakuada, ket ibagada kenka a pudno daytoy. Dawaten ni David a sangailiennakami ta umaykami iti kaaldawan ti fiesta. Pangngaasim ngarud ta itedmo ti mabalinmo nga ipaay kadakami nga adipenmo ken ni David a napateg a gayyemmo.”

⁹Dimteng dagiti tattao ni David ket indanonda ken ni Nabal ti pinaibaga ni David. Nagur-urayda.

¹⁰Kamaudianna, simmungbat ni Nabal: “David? Siasino dayta a tao? Diak pay nadamag dayta a tao. Kadagitoy nga aldaw, napno ti pagilian iti tagabu a nagtalaw iti balay ti apoda.

¹¹Ha! Kayatyo a sawen nga alaek ti tinapay ken ti arakko ken dagiti animal a pinartik nga agpaay kadagiti agpukpukis kadagiti karnerok ket itedko kadagiti tattao a diak ammo no sadino ti naggapuanda?”

¹²Nagsubli dagiti tattao ni David ket imbagada kenkuana ti sao ni Nabal.

¹³“Ibarikesyo dagiti kampilanyo,” imbilin ni David. Kasta ti inaramidda. Imbarikes met ni David ti kampilanna ket pimmanaw agraman dagiti ag-400 a tattaona. Nagbati ti 200 a tattao a mangbantay kadagiti masapsapulda.

¹⁴Adda maysa kadagiti adipen ni Nabal a napan ken ni Abigail. Kinunana, “Nadamagmo kadin? Adda sumagmamano a tattao ni David nga imbaonna manipud let-ang tapno kablaawanna ti apomi, ngem ininsultona ida.

¹⁵Naimbag unay dagiti tattaona kadakami. Didakam siningsinga ket bayat ti kaaddami kadakuada idiay away, pulos nga awan ti natakaw a kukuami.

¹⁶Aldaw-rabii a sinalaknibandakami bayat ti panangipastormi kadagiti arban iti asidegda.

¹⁷Ita, panunotem a naimbag daytoy ket ikeddengmo no ania ti rumbeng nga aramidem amangan la ketdi no dakes ti mapasamak ti apomi ken ti amin a kameng ti familiana. Nadamsak unay ket pulos nga awan ti makatured a makisao kenkuana!”

¹⁸Nagdardaras ni Abigail a nangala iti 200 a tinapay, dua a supot a lalat a napno iti arak, lima a litson a karnero, dua kasukat nga iniruban a trigo, 100 a karaay nga ubas ken 200 a kankanen a naaramid iti namaga nga igos. Impasakayna dagitoy kadagiti asno.

¹⁹Kinunana kadagiti adipen, “Umunakayon ta sumarunoak.” Ngem dina imbagbaga daytoy iti asawana.

²⁰Sisasakay ni Abigail iti asnona ket agsikko koma iti bakras ti turod a pagpagnaanna idi pagammoan la ta masabatna ni David ken dagiti tattaona.

²¹Kunkuna itay ni David iti bagina, “Dinaddadaelko la ti tiempok iti let-ang a nangsalaknib kadagiti sanikua daytoy a tao. Pulos nga awan ti natakaw a kukuana, ket daytoy ketdin ti pagsupapakna kaniak iti panangtulongko kenkuana!

²²Siak koma ti patayen ti Dios no diak ikisap dagita a tattao sakbay a dumteng ti bigat!”

²³Idi makita ni Abigail ni David, dagus a dimsaag iti asnona ket nagpakleb iti daga,

²⁴iti sakaanan ni David sana kinuna kenkuana, “Pangngaasim ta denggennak, apo. Siak ti mangibaklay iti biddut.

²⁵Dimo ikankano ni Nabal. Awan serserbi dayta a tao! Kasla met laeng iti naganna—maysa a maag! Awanak idi immay dagiti imbaonmo nga adipen, apo.

²⁶Ti Apo ti manglapped kenka nga agibales ken mangpatay kadagiti kabusormo. Ita, isapatak kenka iti nagan ti Apo a sibibiag a madusanto dagiti kabusormo ken dagiti agpanggep a mangranggas kenka a kas iti pannakadusanto ni Nabal.

²⁷Pangngaasim, apo, ta awatem daytoy sagut nga inyegko kenka ket itedmo kadagiti tattaom.

²⁸Pakawanennak, apo, iti aniaman a biddut a naaramidko. Isaadnakanto ti Apo a kas ari, kasta met dagiti kaputotam, agsipud ta makirangrangetka kadagiti gubatna ket dikanto agaramid iti dakes bayat ti panagbiagmo.

²⁹No addanto mangdarup kenka ket kayatnaka a patayen, aywanannakanto ti Apo a Diosmo ket awanto ti pakaan-anoam, kas iti panangaywan ti maysa a tao iti napateg a gameng. Ngem no maipapan kadagiti kabusormo, ipurruaknanto ida a kas iti panangipurruak ti tao iti bato iti pallatibong.

³⁰Ket inton maaramid ti Apo ti amin a naimbag nga inkarina kenka ket isaadnaka a kas ari ti Israel,

³¹awanto ti panagbabawim wenno pannakatuok ti konsensiam iti panagpapataymo nga awan gapgapuna wenno panagibalesmo. Ket inton nabendisionannakan ti Apo, pangngaasim ta dinakto liplipatan.”

³²Kinuna ni David kenkuana, “Madaydayaw ti Apo a Dios ti Israel a nangibaon kenka nga umay mangsabat kaniak ita nga aldaw.

³³Agyamanak iti Dios iti naimbag a panagnaknakemmo ken iti pananglappedmo kaniak nga agibales ken pumatay.

³⁴Saan nga impalubos ti Apo a dangranka. Ket no dika nagdardaras nga immay nangsabat kaniak, isapatak iti Apo a sibibiag a Dios ti Israel a sakbay a dumteng ti bigat, natay koma aminen a tattao ni Nabal!”

³⁵Inawat ni David ti sagut ni Abigail nga inyegna kenkuana sana kinuna, “Agawidkan ket dika agdanag. Patgak ti dawatmo!”

³⁶Idi agawid ni Abigail iti balayda, nadanonna nga adda parambak nga inangay ni Nabal. Kasla parambak ti ari ti inangayna. Nabartek ni Nabal ket kasta unay ti ragsakna, isu a pulos nga awan imbagbaga ni Abigail kenkuana agingga iti bigat.

³⁷Idi maunawanen ni Nabal, imbaga ni Abigail ti amin kenkuana. Naatake ni Nabal iti puso ket naparalitiko a namimpinsan.

³⁸Kalpasan ti 10 nga aldaw, dinissoan manen ni Yahweh ket natay ni Nabal.

³⁹Nadamag ni David ti pannakatay ni Nabal ket kinunana, “Madaydayaw ti Apo! Binalesna ni Nabal gapu iti pananginsultona kaniak. Dinak pinalubosan nga adipenna nga agaramid iti dakes. Dinusana ni Nabal gapu iti kinadakesna.” Nangibaon ni David kadagiti tattaona a mapan ken ni Abigail tapno idanonda ti singasingna a mangasawa kenkuana.

⁴⁰Dimteng dagiti adipenna idiay Carmel ket imbagada ken ni Abigail, “Imbaonnakami ni David a mangala kenka tapno agbalinka nga asawana.”

⁴¹Nagkurno ni Abigail iti daga sana kinuna, “Siak ti adipenna a sisasagana a mangbuggo kadagiti saka dagiti adipen ti apok.”

⁴²Dinagdagusna ti timmakder ket nagsakay iti asnona. Simmurot kadagiti adipen ni David. Kimmuyog kenkuana dagiti lima a babbai a babaonenna. Nagbalin ni Abigail nga asawa ni David.

⁴³Sakbay ti panangasawana ken ni Abigail, inasawa ni David ni Ahinoam a taga-Jezreel.

⁴⁴Kabayatanna, ni Palti nga anak ni Lais a taga-Gallim ti nangyasawaan ni Saul ken ni anakna a Mical, ti asawa idi ni David.