Read Iloko 1 Samuel 26 Bible Online

1 Samuel 26 - Iloko bible

1 Samuel 26

¹Adda lallaki a taga-Sif a napan ken ni Saul idiay Gabaa ket imbagada kenkuana nga aglemlemmeng ni David iti Bantay Hakila iti beddeng ti let-ang ti Juda.

²Dinagdagus ni Saul ti napan idiay let-ang ti Zif. Kinuyog ti 3,000 a kamaingelan a mannakigubat ti Israel tapno birokenda ni David.

³Nagkampo ni Saul iti igid ti dalan iti Bantay Hakila. Adda pay laeng ni David iti let-ang, ket idi naammoanna a simmangpet ni Saul a mangsapsapul kenkuana,

⁴nangibaon kadagiti espia ket napaneknekanda a pudno nga adda sadiay.

⁵Nagdardaras ni David a napan sadiay ket nasarakanna ti nagkampoan ni Saul. Tinannawaganna ti pagturturogan ni Saul ken ni Abner nga anak ni Ner a komander ti buyot ti ari. Naturog ni Saul iti tengnga ti kampo, ket nagyan dagiti soldadona iti lawlawna.

⁶Sinaludsod ni David ken ni Ahimelec a Heteo ken ni Abisai a kabsat ni Joab (annak ida ni Zeruyas), “Siasino kadakayo ti kumuyog kaniak a mapan iti kampo ni Saul?” “Siak,” insungbat ni Abisai.

⁷Ngarud, simrek da David ken Abisai iti kampo ni Saul iti dayta a rabii. Nasarakanda a matmaturog ni Saul iti tengnga ti kampo. Situtugkel iti daga ti gayangna iti asideg iti ulona. Matmaturog ni Abner ken dagiti soldado iti likmutna.

⁸“Ita a rabii,” kinuna ni Abisai ken ni David, “inyawat ti Dios ti kabusormo iti pannakabalinmo. Ipalubosmo nga iduyokko kenkuana ti bukodna a gayang agingga a sumalput iti daga. Maminsan laeng a duyokek, saankon a piduaen!”

⁹Ngem kinuna ni David, “Saanmo a dangran! Awan duadua a dusaen ti Apo ti siasinoman a mangranggas iti pinilina nga ari.

¹⁰Iti nagan ti sibibiag nga Apo,” intuloy ni David, “ammok a tinto Apo a mismo ti mangpatay kenkuana inton umay ti tiempo a pannakatayna wenno inton matay iti paggugubatan.

¹¹Yad-adayo koma ti Dios a dangrak ti ari a pinili ti Apo! Ngem alaenta ti gayang ken ti pagkargaan ti danum ket pumanawta.”

¹²Innala ni David ti gayang ken ti pagkargaan ti danum iti abay ti ulo ni Saul sada pimmanaw ken ni Abisai. Awan ti nakakita iti inaramidda wenno nakaammo iti napasamak wenno nakariing la koma. Nakaturogda amin, agsipud ta pinaturog ida ni Yahweh iti nairut.

¹³Kalpasanna, bimmallasiw ni David iti sabali a bangir ti tanap ket napan iti tapaw ti maysa a turod. Adayo ti baetda ken ni Abner ken dagiti soldado ni Saul.

¹⁴Impukkawna kadakuada, “Abner! Mangngegnak kadi?” “Siasino ti agpukpukkaw ken mangririing iti ari?” sinaludsod ni Abner.

¹⁵Kinuna ni David, “Abner, di met sika aya ti kamainglan iti Israel? Apay a dimo salsalakniban ti apom nga ari? Adda simrek itay iti kampo tapno patayenna ni apom.

¹⁶Nagliwayka iti pagrebbengam, Abner! Iti nagan ti Apo a sibibiag, rumbeng a matayka agsipud ta dimo sinalakniban ti apom nga ari a pinili ti Apo. Ita, kitaem no sadino ti ayan ti gayang ti ari. Sadino ti ayan ti pagkargaan ti danum nga adda iti abay ti ulona?”

¹⁷Nailasin ni Saul ti timek ni David ket sinaludsodna, “David, sika kadi dayta, anakko?” “Wen, siak, Natan-ok nga Ari,” insungbat ni David.

¹⁸Ket innayonna, “Apo, apay kadi a birbirokennak pay laeng nga adipenmo? Ania kadi ti inaramidko? Ania a dakes ti inaramidko?

¹⁹Natan-ok nga Ari, denggem koma ti ibagak. No ti Apo koma ti akin-aramid iti ibubusormo kaniak, awatenna ti maysa a daton tapno baliwanna ti panunotna. Ngem no tao ti akin-aramid, agdissuor koma kadakuada ti lunod ti Apo. Imbagada kaniak nga innak agdaydayaw kadagiti didiosen, ket agpeggad ti kalintegak a makipagtawid iti daga nga inted ti Apo kadagiti tattaona.

²⁰Dimo koma ngarud ipalubos a matayak iti ganggannaet a daga nga adayo iti Apo. Ta rimmuar ti ari tapno patayenna ti maysa a timel a kas kaniak. Apay a nasken nga an-anupennak a kas iti atap a tumatayab?”

²¹Insungbat ni Saul, “Nagbasolak. Agsublika, David nga anakko! Pulos a dikanton dangran, ta inispalmo ti biagko ita a rabii. Talaga a maagak ket naka-aramidak iti nadagsen a biddut!”

²²“Adtoy ti gayangmo, Natan-ok nga Ari,” insungbat ni David. “Mangibaonka iti umay mangala.

²³Gunggonaan ti Apo dagiti tattao a napudno ken nalinteg. Ita nga aldaw, inyawatnaka ti Apo iti pannakabalinko ngem dika rinanggasan, sika a pinilina nga ari.

²⁴Inispalko ti biagmo ita nga aldaw; kasta koma met ti aramiden kaniak ti Apo ket ilisinak iti amin a riribuk!”

²⁵Ngarud, kinuna ni Saul ken ni David, “Bendisionannaka koma ti Dios, anakko! Agballigikanto iti amin nga aramidmo!” Napan ni David iti papananna ket nagawid met ni Saul.