Read Iloko 1 Samuel 27 Bible Online

1 Samuel 27 - Iloko bible

1 Samuel 27

¹“Addanto aldaw a patayennak ni Saul,” kinuna ni David iti bagina. “Nasaysayaat no agkamangak idiay Filistia. Isardengton ni Saul ti panangbirbirokna kaniak iti Israel ket awanton ti pakaan-anoak.”

²Ngarud, nagdardaras ni David ken dagiti 600 a tattaona a napan ken ni Akis nga anak ni Maoc ken ari ti Gat.

³Nagyan ni David ken dagiti tattaona idiay Gat, agraman dagiti familiada. Intugot ni David dagiti dua nga assawana: ni Ahinoam a taga-Jezreel ken ni Abigail a balo ni Nabal a taga-Carmel.

⁴Idi madamag ni Saul a nagkamang ni David idiay Gat, insardengnan ti panangbirbirokna kenkuana.

⁵Kinuna ni David ken ni Akis, “No gayyemnak met laeng, ikkannak koma iti bassit nga ili a pagnaedak. Saan a rumbeng, apo, a makipagyanak kenka iti kangrunaan a siudad.”

⁶Inted ni Akis ken ni David ti ili ti Siklag. Manipud idin, kukua dagiti ari ti Juda ti Siklag.

⁷Makatawen ket uppat a bulan a nagnaed ni David idiay Filistia.

⁸Iti las-ud dayta a panawen, masansan a rauten ni David ken dagiti tattaona dagiti umili iti Gesur, Girzi ken Amalec a nabayagen nga agnanaed iti dayta a daga. Masansan a dumanonda idiay Shur ken Egipto.

⁹Patayenna amin a lallaki ken babbai, ket alaenna dagiti karnero, baka, asno, kamelio agraman dagiti pagan-anay. Kalpasanna, agsubli ken ni Akis,

¹⁰ket saludsoden ti ari, “Sadino ti nagrautanyo ita?” Masansan nga ibaga ni David kenkuana a rinautna ti akin-abagatan a paset ti Juda wenno ti daga a masakupan ti tribu ti Jerameel, wenno ti pagnaedan dagiti Kineo.

¹¹Iti amin a lugar a rautenna, papapatay ni David ti tunggal maysa, lalaki man wenno babai, tapno awan mapan agipulong idiay Gat iti pudno nga ar-aramidenda kadagiti tattaona. Kastoy ti inar-aramid ni David bayat ti panagyanna idiay Filistia.

¹²Ngem nagtalek ni Akis ken ni David. “Awan duadua a guraen unay dagiti Israelita a tattaona,” kinuna ti ari iti bagina, “ket masapul nga agserbi kaniak iti unos ti panagbiagna.”