Read Iloko 1 Samuel 28 Bible Online

1 Samuel 28 - Iloko bible

1 Samuel 28

¹Iti saan a nabayag, inummong dagiti Filisteo dagiti buyotda tapno gubatenda ti Israel. Kinuna ni Akis ken ni David, “Namnamaek a tumiponkay iti armadak, sika ken dagiti tattaom.”

²“Ammok,” insungbat ni David. “Siak ti adipenmo ket paneknekakto kenka no ania ti kabaelak nga aramiden.” “Nasayaat,” kinuna ni Akis. “Pagbalinenka a permanente a badigardko.”

³Natay idin ni Samuel. Dinung-awan dagiti amin nga Israelita ket impumponda idiay Rama nga ilina. Kabayatanna, pinagtalaw ni Saul ti amin a mammadles ken makium-uman kadagiti espiritu ti natay iti Israel.

⁴Naguummong dagiti mannakigubat a Filisteo ket nagkampoda iti asideg ti ili ti Sunem. Inummong met ni Saul dagiti Israelita ket nagkampoda idiay Bantay Gilboa.

⁵Nagbuteng ni Saul idi makitana ti armada dagiti Filisteo.

⁶Sinaludsodna ken ni Yahweh no ania ti aramidenna, ngem pulos a saan a sinungbatan ni Yahweh, iti tagtagainep man wenno iti Urim wenno babaen iti maysa a profeta.

⁷Kalpasanna, imbilin ni Saul kadagiti ofisialesna, “Ibirokandak iti babai a makium-uman iti espiritu a mabalinko a pakiumanan.” Imbagada kenkuana nga adda maysa a babai a makium-uman iti espiritu idiay Endor.

⁸Iti maysa a rabii, nanglimlimo ni Saul. Nagarruat iti sabali a pagan-anay, nangitugot iti dua kadagiti tattaona ket napanna kinita ti babai. “Makiumanka iti natay ket ibagam ti gasatko,” kinuna ni Saul iti babai. “Awagam ti espiritu ti tao nga inaganak.”

⁹Ngem kinuna ti babai, “Awan duadua nga ammom ti inaramid ni Ari Saul. Pinagtalawna ti amin a mammadles ken makium-uman kadagiti espiritu ti natay iti Israel. Apay a mangipakatka iti palab-og a pakatayak?”

¹⁰Nagkari ni Saul. “Iti nagan ti Apo a sibibiag, ikarik a dikanto madusa iti panangaramidmo iti daytoy,” insapatana kenkuana.

¹¹“Siasino ngarud ti awagak?” sinaludsod ti babai. “Ni Samuel,” insungbat ni Saul.

¹²Nagparang ni Samuel ket nagikkis ti babai. Kinunana ken ni Saul, “Apay nga inallilawnak? Sika ni Ari Saul!”

¹³“Dika agbuteng,” imbaga kenkuana ti ari. “Ania ti makitam?” “Makitak ti maysa nga espiritu a rumrummuar iti daga,” insungbatna.

¹⁴“Ania ti langana?” sinaludsod ti ari. “Maysa a lakay a mangin-inut a ngumato iti daga,” insungbatna. “Nakakagay iti atiddog.” Ammon ni Saul nga isu ni Samuel, ket nagkurno iti daga kas panangipakitana iti panagraemna.

¹⁵“Apay a singsingaennak?” kinuna ni Samuel ken ni Saul. “Apay a pinagsublinak?” “Mariribukak unay ngamin!” insungbat ni Saul. “Gubgubatendak dagiti Filisteo ket binaybay-annakon ti Dios. Dinakon sungbatan kadagiti profeta wenno kadagiti tagtagainep. Daytoy ti gapuna nga immawagak kenka tapno ibagam no ania ti rumbeng nga aramidek.”

¹⁶Kinuna ni Samuel, “Apay nga awagannak no binaybay-annakan ti Apo ket nagbalinen a kabusormo?

¹⁷Inaramiden ti Apo kenka ti imbagana kaniak idi: Inikkatna kenka ti pagarian ket intedna ken ni David.

¹⁸Dimo tinungpal ti bilin ti Apo. Dimo ngamin dinadael a namimpinsan dagiti Amalekita ken dagiti amin a kukuada. Daytoy ti gapuna a kastoy ti ar-aramiden kenka ti Apo.

¹⁹Yawatnakanto agraman ti Israel iti pannakabalin dagiti Filisteo. Inton bigat, tumiponkanto kaniak, sika ken dagiti annakmo. Yawatto met ti Apo ti armada ti Israel iti pannakabalin dagiti Filisteo.”

²⁰Nagbuteng ni Saul iti imbaga ni Samuel ket dagus a natuang ken naunnat iti daga. Napakapsutan ta nagmalmalem ken nagpatpatnag nga awan kinnanna.

²¹Napan ti babai iti ayan ni Saul ket idi makitana a kasta unay ti pannakariribuk ti ari, kinunana, “Apo, impustak ti biagko a nangaramid iti dawatmo.

²²Ita, pangngaasim ta aramidem met ti dawatko. Palubosannak koma ta idasaranka iti kanem. Masapul a manganka tapno adda pamigsam nga agbiahe.”

²³Nagkedked ni Saul ket imbagana a pulos a saan a mangan. Ngem pinilit met dagiti ofisialesna a mangan. Impangagna met laeng ti dawatda ket timmakder sa napan nagtugaw iti katre.

²⁴Dinardaras ti babai a pinarti ti urbon ti baka a palpalukmegenna. Nangala iti arina, insaganana ket nangluto iti tinapay nga awan ti lebadurana.

²⁵Impasangona dagiti taraon ken ni Saul ken kadagiti ofisialesna. Nanganda iti naidasar. Kalpasan ti pannanganda, pimmanawda iti dayta met la a rabii.