Read Iloko 1 Samuel 3 Bible Online

1 Samuel 3 - Iloko bible

1 Samuel 3

¹Nagserbi ni ubing a Samuel ken ni Yahweh iti babaen ti panangidalan ni Eli. Kadagidi nga aldaw, manmano ti mensahe nga aggapu ken ni Yahweh. Manmano met ti parmata nga aggapu kenkuana.

²Iti maysa a rabii, matmaturog ni Eli iti kuartona. (Nakapsuten ti panagkita ni Eli.)

³Matmaturog met ni Samuel iti santuario nga ayan ti Lakasa ti Tulag ti Dios. Sisesegged pay laeng ti silaw sadiay.

⁴Inawagan ni Yahweh ni Samuel, “Samuel! Samuel!” “Addaak ditoy, apo,” kinuna ni Samuel,

⁵ket nagtaray a napan ken ni Eli. “Adtoyak, apo, ta inayabannak,” kinunana. Ngem kinuna ni Eli, “Anakko, dika inayaban; agsublika iti iddam.” Nagsubli ngarud a nagidda ni Samuel.

⁶Inawagan manen ni Yahweh ni Samuel. Saan nga ammo ti ubing a ni Yahweh ti umaw-awag gapu ta di pay nagsao idi kenkuana. Bimmangon ngarud a napan ken ni Eli ket kinunana, “Adtoyak, apo, ta inawagannak.” Ngem insungbat ni Eli, “Anakko, saanka nga inayaban; agsublika iti iddam.”

⁸Iti maikatlo a daras, inayaban ni Yahweh ni Samuel. Bimmangon ni Samuel a napan ken ni Eli ket kinunana, “Adtoyak, apo, ta inayabannak.” Ket nabigbig ni Eli a ni Yahweh ti mangaw-awag iti ubing,

⁹isut' gapuna a kinunana kenkuana, “Agsublika iti iddam, ket no awagannaka pay, kunam: ‘Agsaoka, Apo, ta dumdumngeg toy adipenmo.’” Nagsubli ngarud a nagidda ni Samuel.

¹⁰Dimteng ni Yahweh ket nagtakder sana inawagan ni Samuel a kas idi damo, “Samuel! Samuel!” Insungbat ni Samuel, “Agsaoka, Apo. Dumdumngeg toy adipenmo.”

¹¹Imbaga ni Yahweh kenkuana: “Dumtengto ti aldaw nga adda nakaal-alliaw a banag nga aramidek iti Israel, ket makigtotto ti amin a makadamag iti daytoy.

¹²Iti dayta nga aldaw, ibanagkonto ti amin nga insaok a maibusor iti familia ni Eli, manipud idi damo agingga iti panungpalan.

¹³Naibagakon ken ni Eli a dusaek ti familiana, gapu ta nagaramid dagiti annakna iti maibusor kaniak. Ammo ni Eli nga ar-aramidenda daytoy, ngem dina napagsardeng ida.

¹⁴Ngarud, isapatak iti familia ni Eli nga awanto ti sakrifisio wenno daton a makaikkat iti dusa a maipatay gapu iti daytoy nakabutbuteng a basol.”

¹⁵Nagidda ni Samuel agingga iti bigat. Bimmangon ket napanna inlukat dagiti ruangan ti balay ni Yahweh. Mabuteng a mangibaga iti parmata ken ni Eli.

¹⁶Ngem inayaban ni Eli, “Samuel, anakko.” “Adtoyak, apo,” insungbat ni Samuel.

¹⁷“Ania ti imbaga ti Apo kenka?” sinaludsod ni Eli. “Awan koma ti ilimedmo kaniak. Dusaennakanto ti Dios iti nakaro no dimo ibaga kaniak ti amin nga imbagana.”

¹⁸Imbaga ngarud ni Samuel ti amin nga imbaga ti Apo. Awan ti inlimlimedna. Kinuna ni Eli, “Isu ti Apo; aramidennanto ti aniaman nga ammona a naimbag.”

¹⁹Dimmakkel ni Samuel. Adda ni Yahweh kenkuana ket imbanagna ti amin nga impaltiingna ken ni Samuel.

²⁰Iti kasta, naammoan dagiti amin nga Israelita iti entero nga Israel a ni Samuel ket maysa a pudno a profeta ni Yahweh.

²¹Intultuloy ni Yahweh ti panagparangna idiay Silo a nagparanganna ken ni Samuel ket nagsao kenkuana. No agsao ni Samuel, dumngeg amin nga Israel.