Read Iloko 1 Samuel 30 Bible Online

1 Samuel 30 - Iloko bible

1 Samuel 30

¹Dua nga aldaw sakbay a simmangpet ni David ken dagiti tattaona idiay Siklag, rinaut dagiti Amalekita ti abagatan a Juda. Rinautda met ti Siklag sada pinuoran.

²Awan pinatayda ngem tiniliwda dagiti amin a babbai ket innalada ida idi pumanawda.

³Idi sumangpet da David ken dagiti tattaona, nasarakanda a napuoran a namimpinsan ti ilida ket naitalaw dagiti assawada ken dagiti annakda. Nairaman a naitalaw da Ahinoam ken Abigail nga assawa ni David. Nagsangit ni David ken dagiti tattaona agingga a napaksuyanda.

⁶Dakdakkel manen ti parikut ni David. Nasaem unay ti rikna dagiti tattaona gapu iti pannakapukaw dagiti annakda, ket panggepda nga uboren ni David. Ngem pinapigsa ni Yahweh a Diosna.

⁷Kinuna ni David ken ni Abiatar a padi nga anak ni Ahimelec, “Yegmo ditoy ti efod.” Ket napan innala ni Abiatar.

⁸Sinaludsod ni David ken ni Yahweh, “Innak kadi kamaten dagiti rimmaut? Makamakamko ngata ida?” “Wen, inka kamaten ida,” insungbatna. “Awan duadua a makamakammo ida ket ispalem dagiti naitalaw.”

⁹Nagrubbuat ngarud ni David ken dagiti 600 a tattaona. Idi dumtengda iti waig ti Besor, nagbati ti 200 ta nabannogda unayen ket dida kabaelan ti bumallasiw. Intuloy ni David ken dagiti 400 a tattaona ti pannagnada.

¹¹Iti away, adda agtutubo nga Egipcio a nasarakan dagiti tattaona ket indatagda kenkuana. Inikkanda iti kanen ken danum,

¹²sumagmamano a napakebbet nga igos ken dua a karaay nga ubas. Nangan ti agtutubo ket nagsubli ti pigsana. Tallo nga aldaw ken tallo a rabii a pulos a di nangan wenno imminum.

¹³Sinaludsod ni David, “Taga-anoka? Siasino ti apom?” “Maysaak nga Egipcio,” insungbatna. “Tagabunak ti maysa nga Amalekita. Imbatinak ti apok ta nagsakitak. Tallo nga aldawen ti napalabas.

¹⁴Rinautmi ti sakup dagiti Kereteo, ti akin-abagatan a Juda, ti daga a masakupan dagiti kapuonan ni Caleb. Pinuoranmi ti Siklag.”

¹⁵“Kuyogennak man a mapan kadagiti rimmaut?” dinawat ni David. “Kuyogenka no la ket isapatam iti nagan ti Dios a dinakto patayen wenno isubli ken ni apok,” kinunana.

¹⁶Kinuyogna ngarud ni David iti ayan dagiti rimmaut. Sadiay, nawaraswaras dagiti Amalekita. Agpapangan, agiinum ken agrarambakda gapu iti nakaad-adu a sinamsamda idiay Filistia ken Juda.

¹⁷Iti parbangon ti sumuno nga aldaw, rinaut ni David ida ket nakigubat agingga iti sumipnget. Awan ti nakalibas nga Amalekita, malaksid ti 400 nga agtutubo a lallaki a naglibas a nagsakay kadagiti kamelio.

¹⁸Inispal ni David ti amin nga innala dagiti Amalekita agraman dagiti dua nga assawana.

¹⁹Napasublina ti amin, agraman dagiti annak dagiti tattaona ken dagiti amin a sinamsam dagiti rimmaut.

²⁰Napasublina met ti amin a pangen ken arban. Inabog dagiti tattaona dagiti amin nga animal iti sangoananda, ket kinunada, “Kukua dagitoy ni David!”

²¹Kalpasanna, nagsubli ni David kadagiti 200 a tattaona. Dagitoy dagidi nagbati iti waig ti Besor, ta nabannogda unay idin ket didan kabaelan ti kumuyog kenkuana. Sinabatda ni David ken dagiti tattaona. Siraragsak ni David a napan nangkablaaw kadakuada.

²²Ngem nagsao ti sumagmamano a nauyong ken awan serserbina a tattao a kimmuyog idi ken ni David. “Saanda a kimmuyog kadatayo,” kinunada. “Ditay ngarud ibingayan ida kadagiti nasamsam. Mabalinda nga alaen dagiti assawa ken annakda ket pumanawdan.”

²³Ngem kinuna ni David, “Kakabsatko, diyo mabalin nga aramiden daytoy. Bigbigenyo ti impaay ti Apo kadatayo. Sinalaknibannatayo ket inyawatna kadatayo ti bunggoy a nangraut kadatayo.

²⁴Awan ti umanamong iti daytoy a singasingyo. Masapul nga agpapada ti bingay ti tunggal maysa. Agpada ti bingay ti agbati a mangbantay kadagiti alikamen ken ti mapan iti paggugubatan.”

²⁵Manipud idin, daytoy ti impaannurot ni David maipapan iti pannakabingay ti nasamsam ket tinungpal ti entero nga Israel.

²⁶Idi nagsubli ni David idiay Siklag, pinaipanna kadagiti panglakayen ti Juda ti dadduma a nasamsam. Pinaibagana: “Adtoy ti maysa a sagut a naggapu iti nasamsam nga innalami kadagiti kabusor ti Apo.”

²⁷Pinaipanna dagitoy kadagiti agnaed iti Betel; Rama iti abagatan a paset ti Juda, Jattir,

²⁸Aroer, Sifmot, Estemoa,

²⁹Racal, kadagiti kapuonan ni Jerameel, kadagiti Kineo,

³⁰ken kadagiti tattao iti ili ti Horma, Borasan, Atac,

³¹ken Hebron. Pinatulodanna ti amin a lugar a napnapananna ken dagiti tattaona.