Read Iloko 1 Samuel 31 Bible Online

1 Samuel 31 - Iloko bible

1 Samuel 31

¹Sinunson dagiti Filisteo dagiti Israelita idiay Bantay Gilboa. Adu ti natay kadagiti Israelita ket nagtataray dagiti dadduma agraman ni Saul ken dagiti annakna.

²Ngem nakamatan ida dagiti Filisteo ket pinatayda ti tallo kadagiti annakna, da Jonatan, Abinadab ken Malkisua.

³Napinget ti ranget iti likmut ni Saul. Napuntaan kadagiti pana ti kabusor ket nakaro ti sugatna.

⁴Kinunana iti agtutubo a para-awit kadagiti igamna, “Asutem ti kampilanmo ket patayennak tapno didak umay pagang-angawan dagidiay awan diosna a Filisteo.” Ngem kasta unay ti buteng ti agtutubo ket nagkedked a mangtungpal iti naibilin kenkuana. Innala ngarud ni Saul ti bukodna a kampilan sana rinugmaan.

⁵Idi makita ti agtutubo a natayen ni Saul, rinugmaanna met ti bukodna a kampilan ket natay a kas kenkuana.

⁶Iti dayta nga aldaw, natay ni Saul, dagiti tallo nga annakna, ti agtutubo, agraman amin a tattaona.

⁷Idi madamag dagiti Israelita nga agnanaed iti sabali a bangir ti Tanap ti Jezreel ken iti ballasiw ti Karayan Jordan a nagtataray ti armada ti Israel ken natay ni Saul agraman dagiti annakna, binaybay-andan dagiti ilida sada nagtataray. Kalpasanna, simmangpet dagiti Filisteo ket sinakupda dagiti ilida.

⁸Iti sumuno nga aldaw kalpasan ti gubat, idi napan nagsamsam dagiti Filisteo kadagiti napapatay, nasarakanda dagiti bangkay ni Saul ken dagiti tallo nga annakna a naiwalang idiay Bantay Gilboa.

⁹Pinutolanda ni Saul sada innala dagiti igamna. Nangibaonda kadagiti napan iti entero a Filistia a mangipakaammo iti naimbag a damag kadagiti didiosenda ken kadagiti kailianda.

¹⁰Kalpasanna, inkabilda dagiti igam ni Saul iti templo ni Astarte a diosa sada inlansa ti bangkayna iti bakud ti siudad ti Bet-san.

¹¹Nadamag dagiti taga-Jabes, idiay Galaad, ti inaramid dagiti Filisteo iti bangkay ni Saul.

¹²Nagrubbuat dagiti katuturedan kadakuada ket nagpatpatnagda a nagdaliasat. Idi dumtengda idiay Bet-san, imbabada dagiti bangkay ni Saul ken dagiti annakna manipud iti bakud ket inyawidda ida idiay Jabes. Pinuoranda dagiti bangkay,

¹³innalada dagiti tultulang sada inkali ida iti sirok ti salamagi iti ili. Pito nga aldawda a nagayunar.