Read Iloko 1 Samuel 5 Bible Online

1 Samuel 5 - Iloko bible

1 Samuel 5

¹Idi naagaw dagiti Filisteo ti Lakasa ti Tulag, binagkatda manipud Ebenezer sada impan iti siudadda nga Asdod.

²Inserrekda iti templo ni Dagon a didiosenda ket insaadda iti abay ti estatua ni Dagon.

³Iti sumuno nga agsapa, nakita dagiti umili a sipapakleb iti daga ti estatua ni Dagon. Natnag ngamin iti nagsaadanna ket nagdisso iti sango ti Lakasa ti Tulag ni Yahweh. Insublida iti yanna.

⁴Ngem iti agsapa iti kabigatanna, nakitada manen ti estatua a sipapakleb iti sango ti Lakasa ti Tulag ni Yahweh. Naisina ti ulo ken dagiti imana, ket nawarawarada dagitoy iti pagserkan. Ti laeng bagina ti nabati. (

⁵Daytoy ti gapuna nga uray kadagitoy nga aldaw, saan a baddeken dagiti papadi ni Dagon ken dagiti agdaydayaw kenkuana ti pagserkan no dida ket layawen.)

⁶Nakaro ti panangdusa ni Yahweh kadagiti taga-Asdod. Nagbuteng dagiti tattao. Dinusana dagiti umili ken dagiti agnaed iti kabangibangna babaen iti panangparnuayna kadagiti letteg iti bagbagida.

⁷Idi makitada ti mapaspasamak, kinunada, “Dusdusaennatayo ti Dios ti Israel. Dusdusaenna pay ni Dagon a diostayo. Masapul a saanen nga agtalinaed ti Lakasa ti Tulag ditoy ayantayo.”

⁸Pinaayabanda ngarud dagiti amin a lima nga ari a Filisteo, ket idi sumangpetda, sinaludsodda kadakuada, “Ania ti aramidentayo iti Lakasa ti Dios ti Israel?” “Ipanyo idiay Gat,” insungbatda, isu nga impanda ti Lakasa iti dayta a siudad dagiti Filisteo.

⁹Ngem kalpasan ti pannakaipanna sadiay, dinusa ni Yahweh dagiti tattao iti siudad, ket pinataudna ti dakkel a riribuk. Pinarnuayna iti adu a letteg iti bagbagi dagiti tattao, ubing ken nataengan.

¹⁰Ngarud, impanda ti Lakasa ti Tulag idiay siudad ti Ekron. Idi maisangpet sadiay, inyikkis dagiti tattao, “Inyegda ditoy ti Lakasa ti Tulag ti Dios ti Israel tapno patayennatay amin!”

¹¹Ngarud, pinaayabanda manen dagiti lima nga ari a Filisteo ket kinunada, “Ipanawyo ti Lakasa ti Tulag ti Israel. Isubliyo iti sigud a yanna, ta no saan, mataykam agraman dagiti familiami.” Nagsaknap ti buteng iti entero a siudad gapu ta nakaro unay ti panangdusa ti Dios kadagiti tattao.

¹²Uray dagiti saan a natay, nagtubo met dagiti letteg iti bagbagida ket immasug dagiti tattao kadagiti didiosenda.