Read Iloko 1 Samuel 6 Bible Online

1 Samuel 6 - Iloko bible

1 Samuel 6

¹Pito a bulan a nagyan ti Lakasa ti Tulag ni Yahweh idiay Filistia.

²Kalpasanna, inayaban dagiti tattao dagiti papadi ken dagiti mammadles ket sinaludsodda, “Ania ti aramidenmi iti Lakasa ti Tulag ti Apo ti Israel? Ania ti ipakuyogmi no isublimi iti sigud a yanna?”

³Insungbatda, “No isubliyo ti Lakasa ti Tulag ti Dios ti Israel, masapul a pakuyoganyo iti daton a pakapakawanan ti basolyo. Diyo isubsubli ti Lakasa ti Tulag no diyo pakuyogan iti daton. Wen, masapul a pakuyoganyo iti daton tapno umimbagkayo, ket maammoanyonto no apay a dusdusaennakayo pay laeng ti Apo.”

⁴“Ania ti sagut nga ipakuyogmi?” sinaludsodda. Insungbatda, “Mangtedkayo iti lima a sinan-letteg ken lima a sinan-marabutit a naaramid iti balitok, kas mayannurot iti bilang dagiti ari a Filisteo. Ta maymaysa a didigra ti dimteng kadakay amin ken kadagiti lima nga ari.

⁵Masapul nga aramidenyo dagiti sinan-letteg ken sinan-marabutit a mangdaddadael iti pagilianyo, ket masapul a padayawanyo ti Dios ti Israel. Nalabit nga isardengna ti panangdusdusana kadakayo, kadagiti didiosenyo ken iti dagayo.

⁶Apay a nasukirkayo a kas iti ari ti Egipto ken kadagiti Egipcio? Laglagipenyo ti panangang-angaw ti Dios kadakuada agingga a pinalubosanda dagiti Israelita a pumanaw idiay Egipto.

⁷Mangisaganakayo ngarud iti baro a karison ken dua nga agpaspasuso a baka a dipay nasangolan. Ipakoyo dagiti baka iti karison ket ipanyo dagiti urbonda iti koral.

⁸Alaenyo ti Lakasa ti Tulag ti Apo sayo ikarga iti karison. Ikahonyo dagiti balitok a sinan-letteg ken marabutit ket ikabilyo iti abay ti Lakasa—dagitoy dagiti ipakuyogyo nga agpaay kenkuana a kas daton a pakapakawanan ti basolyo. Iduronyo ti karison ket bay-anyo a magna nga is-isuna.

⁹Kitaenyo: no agpa-Betsemes, kaipapananna a ti Dios dagiti Israelita ti nangyeg kadatayo iti daytoy nakabutbuteng a didigra. Ngem no saan nga agturong sadiay, daytoy ti pakaammoantayo a saan nga isu ti nangyeg iti didigra no di ket nairanrana laeng.”

¹⁰Tinungpalda ti naibaga kadakuada: Nangalada iti dua a baka sada impako iti karison. Impupokda dagiti urbonda iti koral.

¹¹Inkargada ti Lakasa ti Tulag iti karison ken ti kahon a nakaikabilan dagiti balitok nga imahen dagiti marabutit ken dagiti letteg.

¹²Nagna dagiti baka iti dalan nga agpa-Betsemes ket dida simmiasi iti dalan. Agem-emmakda bayat ti pannagnada. Sinursurot ida dagiti lima nga ari a Filisteo agingga iti beddeng ti Betsemes.

¹³Madama idi nga agan-ani dagiti taga-Bet-semes iti trigo iti tanap, ket idi kumitada, nakitada ti Lakasa ti Tulag. Kasta unay ti ragsakda a nakakita iti Lakasa.

¹⁴Dimteng ti karison iti talon ni Josue a taga-Betsemes. Nagsardeng sadiay, iti asideg ti maysa a dakkel a bato. Binalsig dagiti tattao ti karison. Pinartida dagiti baka sada pinuoran a kas daton ken ni Yahweh.

¹⁵Binagkat dagiti Levita ti Lakasa ti Tulag ni Yahweh ken ti kahon a nakaikabilan dagiti nasukog a balitok. Insaadda dagitoy iti dakkel a bato. Iti dayta met la nga aldaw, nagidatag dagiti taga-Betsemes kadagiti daton a mapuoran ken dadduma pay a daton ken ni Yahweh.

¹⁶Binuybuya dagiti lima nga ari a Filisteo ti panangaramidda iti daytoy sada nagsubli idiay Ekron iti dayta met la nga aldaw.

¹⁷Dagitoy dagiti balitok a sinan-letteg nga impaay dagiti Filisteo a kas daton ken ni Yahweh a pakapakawanan ti basolda; maysa iti tunggal siudad ti Asdod, Gaza, Askelon, Gat ken Ekron.

¹⁸Nangipaayda met iti lima a balitok a sinan-marabutit; maysa iti tunggal nasarikedkedan nga ili ken purpurok iti away. Kas pammaneknek iti napasamak, adda pay laeng ti dakkel a bato a nangisaadanda iti Lakasa ti Tulag ni Yahweh iti talon ni Josue a taga-Betsemes.

¹⁹Pinatay ni Yahweh ti 70 nga umili iti Betsemes, gapu ta kinitada ti uneg ti Lakasa ti Tulag. Nagladingit dagiti tattao, agsipud ta adu ti pinatayna kadakuada.

²⁰Daytoy ti gapuna a kinuna dagiti tattao ti Betsemes: “Siasino ti makaitured nga agtakder iti sango ti Apo a nasantoan a Dios? Sadino ti mabalintayo a pangipanan kenkuana tapno mayadayo kadatayo?”

²¹Iti kasta, nangibaonda kadagiti tattao a mapan iti Kiriat Jearim tapno ibagada, “Insubli dagiti Filisteo ti Lakasa ti Tulag ti Apo. Sumalogkayo, ket umayyo alaen.”