Read Iloko 1 Samuel 7 Bible Online

1 Samuel 7 - Iloko bible

1 Samuel 7

¹Napan ngarud innala dagiti taga-Kiryat-Jearim ti Lakasa ti Tulag ni Yahweh, ket impanda iti balay ni Abinadab a nabangon iti turod. Inkonsagrarda ni Eleazar nga anakna tapno isu ti mangaywan iti Lakasa.

²Nabayag a nagtalinaed ti Lakasa ti Tulag ni Yahweh iti siudad ti Jearim. Duapulo a tawen ti kaaddana sadiay. Kadagita a tiempo, immas-asug dagiti Israelita ken ni Yahweh.

³Kinuna ni Samuel kadagiti Israelita, “No naimpusoan ti panagsubliyo iti Apo, masapul nga iwaksiyo dagiti didiosenyo ket ibellengyo dagiti kinitikitan nga imahen ni diosa nga Astarte. Ikonsagraryo a naan-anay ti bagiyo iti Apo ket isu laeng ti pagdaydayawanyo tapno isalakannakayto iti bileg dagiti Filisteo.”

⁴Imbelleng ngarud dagiti Israelita dagiti estatua da Baal ken Astarot a didiosenda, ket ni laeng Yahweh ti nagdaydayawanda.

⁵Kalpasanna, imbilin ni Samuel kadagiti Israelita nga aguummongda idiay Mizpa. “Sadiay, ikararagankayto iti Apo,” kinunana.

⁶Naguummongda ngarud idiay Mizpa. Simmakdoda iti danum sada imbuyat iti imatang ni Yahweh, kas datonda kenkuana. Nagmalmalem a nagayunarda iti dayta nga aldaw. “Nagbasolkami iti Apo,” kinunada. (Idiay Mizpa ti nagrisutan ni Samuel kadagiti parikut ti Israel.)

⁷Idi madamag dagiti Filisteo a naguummong dagiti Israelita idiay Mizpa, nagrubbuat dagiti lima nga ari a Filisteo ken dagiti buyotda tapno rautenda ida. Naammoan daytoy dagiti Israelita ket nagbutengda.

⁸Kinunada ken ni Samuel: “Dika agsardeng nga agkararag iti Apo a Diostayo tapno isalakannatayo kadagiti Filisteo.”

⁹Nangpatay ni Samuel iti kalakian nga urbon ti karnero ket sibubukel a pinuoranna a kas daton ken ni Yahweh. Nagkararag kenkuana a tulonganna koma ti Israel, ket impangag ni Yahweh ti kararagna.

¹⁰Idi agidatdaton, simmangpet dagiti Filisteo a mangdarup kadakuada. Ngem pagammoan la ta manipud iti tangatang, nangparnuay ni Yahweh iti gurruod a namagbuteng kadagiti Filisteo ket nagtatarayda a pimmanaw.

¹¹Rimmuar dagiti Israelita idiay Mizpa. Sinunsonda dagiti Filisteo agingga idiay Bet-kar, ket pinapatayda ida iti dalan nga agturong sadiay.

¹²Kalpasanna, nangala ni Samuel iti maysa a bato sana inkabil iti nagbaetan ti Mizpa ken Sen. Kinunana: “Daytoy ti pakakitaan a tinulongannatayo ti Apo.” Pinanagananna ti bato iti Ebenezer.

¹³Naparmek ngarud dagiti Filisteo. Iti unos ti panagbiag ni Samuel, saan nga impalubos ni Yahweh a serkenda ti daga ti Israel.

¹⁴Napasubli ti Israel ti amin a siudad nga innala dagiti Filisteo manipud Ekron agingga iti Gat, ket naalana ti amin a sakupna, ket nagkappia dagiti Israelita ken dagiti Amorreo.

¹⁵Inturayan ni Samuel ti Israel bayat ti panagbiagna.

¹⁶Tinawen a mapan idiay Betel, Gilgal ken Mizpa ket risutenna dagiti parikut dagiti tattao kadagita a disso.

¹⁷Kalpasanna, agawid iti balayna idiay Rama a pagserbianna pay a kas ukom. Sadiay, nangbangon iti altar a maipaay ken ni Yahweh.