Read Imbabura Highland Quichua GÉNESIS 1 Bible Online

GÉNESIS 1 - Imbabura Highland Quichua bible

GÉNESIS 1

¹Callaripica, Taita Diosmi jahua pachatapash, cai pachatapash rurarca.

²Cai pachaca, imamambash na rijchaj, imapash illajmi carca. Yana yana tutaca, manllanayai ucu ucu yacucunamandaca jahuamanmi carca. Taita Diospaj Espirituca, yacu junda jahuacunamanmi cuyurijurca.

³Shina cajpimi Taita Diosca: “Punchalla tucuchun” nirca. Shina nijpica, punchalla tucurcallami.

⁴Taita Diosca chai punchallataca, aligu cajtami ricujurca. Shinamandami Taita Diosca chai punchallataca, yana yana tutamanda shicanyachirca.

⁵Shina shicanyachishpami Taita Diosca, chai punchallataca: “Punlla” nishpa shutichirca. Yana yana tutataca: “Tuta” nishpami shutichirca. Chashnami chishindi tutamandandi, shuj punlla tucurca.

⁶Chai jipami Taita Diosca, cashna nirca: “Yacu chaupicunapica, shinllipacha shicanyachijuj tiachun. Chai shicanyachijujca, yacucunamanda yacucunata shicanyachijuchun” nircami.

⁷Taita Diosca, shinllipacha shicanyachijujtami rurarca. Shinallata shinllipacha shicanyachijuj ucuman tiaj yacucunatapashmi, shinllipacha shicanyachijuj jahuaman tiaj yacucunamanda shicanyachirca. Chaica chashnami tucurca.

⁸Shinllipacha shicanyachijujtaca, Taita Diosca: “Jahua Pacha” nishpami shutichirca. Chashnami chishindi tutamandandi, ishcai punlla tucurca.

⁹Taita Diosca, cashnatapashmi nirca: “Jahua pachamanda ucuman tiaj yacucunaca shujllapi tandanajuchun, chaquishca pushtupash ricurichun” nircami. Shina nijpica, chashnami tucurca.

¹⁰Taita Diosca chaquishcataca: “Alpa” nishpami shutichirca, yacucuna tandanajushcataca: “Mama Cuchacuna” nishpami shutichirca. Chaicunataca, aligu cajtami Taita Diosca ricujurca.

¹¹Chai jipami Taita Diosca, cashna nirca: “Alpapica verde jihuacunapash, muyuta fucuj jihuacunapash mirachun. Ima micunacunata fucuj yura cashpapash, chai puralla mirachun. Chai granopillata muyu tiashpa, alpa jahuapi cachun” nircami. Shina nijpica, chashnami tucurca.

¹²Alpapica verde jihuapash, muyuta fucuj jihuapash, jihuacuna imashna viñana cashcashnallatami viñarca. Shinallata ima micunacunata fucuj yuracunapashmi viñarca. Chai fucushca granopaj muyuca, chai granopillata cashpami, chai puralla mirarca. Chashna rurashpaca, aligu cajtami Taita Diosca ricujurca.

¹³Chashnami chishindi tutamandandi, quimsa punlla tucurca.

¹⁴Chai jipami, Taita Diosca cashna nirca: “Jahua pachata shinllipacha shicanyachijuj pushtupica tutata, punllata shicanyachingapaj punchayachijuj michacuna tiachun. Chaicunaca, jatun punllacuna, caishuj punllacuna, huatacuna imashna cajta ricuchingapajmi canga.

¹⁵Punchayachijuj chai michacunaca, jahua pachata shinllipacha shicanyachijuj pushtumanda, cai pachata punchayachinajuchun” nircami. Shina nijpica, chashnami tucurca.

¹⁶Taita Diosca, punchayachijuj ishcai jatun michacunatami rurarca: Jatundaca, punllata punchayachishpa mandachun, uchillataca tutata punchayachishpa mandachunmi rurarca. Shinallata luzerocunatapashmi rurarca.

¹⁷Taita Diosca, chaicunataca jahua pachata shinllipacha shicanyachijuj pushtupimi, cai pachata punchayachinajuchun churarca.

¹⁸Shinallata punllata, tutata mandanajuchumbashmi churarca. Punllata, yana yana tutamanda shicanyachishpa tianajuchumbashmi churarca. Shina rurashpaca, aligu cajtami Taita Diosca ricujurca.

¹⁹Chashnami chishindi tutamandandi, chuscu punlla tucurca.

²⁰Taita Diosca, cashnami nirca: “Yacupi causana animalcunapash tiachun. Alpa jahua huairata rij alasyu animalcunapash tiachun. Chai alasyu animalcunaca, jahua pachata shinllipacha shicanyachijuj chushaj pushututami rinajunga” nircami.

²¹Taita Diosca, mama cuchapi causaj jatun manllanayai animalcunatami rurarca. Yacucunapi cuyurinajuj tucui animalcunapashmi, ima animalcuna cashpapash yacucunapica, chai puralla miranajurca. Shinallata alasyu tucui animalcunatapash, chai animal puralla miranajuchunmi rurarca. Shina rurashpaca, aligu cajtami Taita Diosca ricujurca.

²²Taita Diosca, cashna nishpami paicunataca bendiciarca: “Huacharishpa ninanda mirashpa, mama cucha yacucunapi jundaichi. Shinallata cai pachapi causana alasyu animalcunapash, ninanda miraichi” nircami.

²³Chashnami chishindi tutamandandi, picha punlla tucurca.

²⁴Chai jipami Taita Diosca, cashna nirca: “Alpapi causana animalcunaca, ima animalcuna cashpapash, chai puralla tiachun. Tucui animalcunapash, alpata llucashpa purij animalcunapash, sachacunapi causana animalcunapash, cai alpapi animalcunaca chai puralla miranajuchun” nircami. Shina nijpica, chashnami tucurca.

²⁵Chaipaj jipami Taita Diosca, alpapi causana animalcunataca, ima animalcunata cashpapash, chai puratalla, huasipi charina animalcunatapash ima animalcunata cashpapash, chai puratalla rurarca. Shinallata llucashpa purij animalcunatapash, chai animal puratallami rurarca. Shina rurashpaca, aligu cajtami Taita Diosca ricujurca.

²⁶Chaipaj jipami Taita Diosca, cashna nirca: “Ñucanchishnalla rijchajta, ñucanchishnallapacha ricurichun genteta rurashun. Paica, mama cuchapi pijicunata, jahuata rij alasyu animalcunata, sachapi causaj animalcunata, alpapi causaj tucui animalcunata, shinallata alpata llucashpa purij tucui animalcunatapash mandachun” nircami.

²⁷Taita Diosca, gentetaca paishnalla rijchajtami rurarca. Taita Diosman rijchajtapachami rurarca. Paicunataca jaritapash, huarmitapashmi rurarca.

²⁸Taita Diosca, cashna nishpami paicunataca bendiciarca: “Huacharishpa ninanda mirashpa, ashtacacunapacha tucushpa, cai pachapi jundanguichi. Cai pachapi imalla tiajcunata cazuchinguichi. Shinallata mama cuchapi causaj pijicunata, jahuata rij alasyu animalcunata, alpapi causaj tucuilla animalcunatapash mandanguichi” nircami.

²⁹Taita Diosca, cashnami nirca: “Ricuichi, tucui cai pachapi muyucunata fucuj tucui yuracunata, shinallata muyucunata charij granocunata fucuj tucui quirucunatapashmi cangunaman curcani. Chaicunami, cangunapaj micuna canga.

³⁰Ashtahuangarin cai pachapi causaj tucui animalcuna, jahuata rij alasyu animalcuna, alpata llucashpa purij, causaj tucui animalcunaca, tucui verde jihuacunatami micushpa causanga” nircami. Shina nijpica, chashnami tucurca.

³¹Taita Diosca, tucuita pai rurashcatami ricujurca. Chai rurashcacunaca, aligupacha cajtami ricujurca. Chashnami chishindi tutamandandi, sucta punlla tucurca.