Read Imbabura Highland Quichua GÉNESIS 11 Bible Online

GÉNESIS 11 - Imbabura Highland Quichua bible

GÉNESIS 11

¹Cai pachapi causajcunaca, tucuicunami shujlla rimaita chai shimicunatalla rimanajurca.

²Indi llujshimuj ladomanda llujshimushpaca, cashnami ruranajurca: Sinar shuti llactapi tiaj shuj jatun pambata tarishpami, chaipi causai callarinajurca.

³Chaipimi, caishuj chaishuj cashna ninajurca: “Jacuchi, ladrillocunata rurashpa ninapi cusashunchi” ninajurcami. Paicunaca, rumipaj randica ladrillohuan, turupaj randica, asfaltohuanmi ruranajurca.

⁴Chai jipaca, cashnami ninajurca: “Jacuchi, shuj pueblotapash, shuj torretapash rurashunchi. Chai torrepaj umapash, jahua pachaman chayajta rurashunchi. Tucui cai pachapica, caita chaita cachai tucuipajpash canchi. Shina rurashpami, tucuicuna rijsishca tucushunchi” ninajurcami.

⁵Shinamandami Mandaj Diosca pueblota, torreta, huañuna aichayu runacuna ruranajujta ricungapaj uriajumurca.

⁶Mandaj Diosca, cashnami nirca: “Ricuichi, cai runacunaca shujllashnallami causanajun, shinallata shujlla rimaitami rimanajun. Paicunaca, ñami caita rurai callarishca. Cunanga, paicuna rurangapaj yarinajushcataca, imapash na saquichi ushangachu.

⁷Shina cashcamanda cunanga, paicunapaj rimaita chaipillata pandachingapaj uriajushunchi. Shina rurajpimi paicunapaj cumbacuna rimanajujtaca, pipash na entendi ushanajunga” nircami.

⁸Chashnami Mandaj Diosca, chai pambamandaca tucui cai pachaman, caiman chaiman cacharca. Chashna cachajpimi, pueblota ruraitaca saquinajurca.

⁹Shinamandami chai pambataca, Babel shutita shutichirca. Mandaj Diosca, tucui cai pachapi causajcunapaj rimaita chaipi pandachishcamandami, chashna shutichirca. Chai pambamandami paicunataca, tucui cai pachapi causanajuchun, caita chaita cacharca.

¹⁰Sem shuti runapaj miraicunaca, caicunami: Sem shuti runaca, patsaj huatata charishpami, ninanda tamiashca ishcai huata jipaca, Arfaxad shuti churita charirca.

¹¹Sem shuti runaca, Arfaxad shuti churita charishca jipapash, picha patsaj huatata causajushpami, shuj churicunata, ushicunata charircara.

¹²Arfaxad shuti runaca, quimsa chunga picha huatata charishpami, Sala shuti churita charirca.

¹³Arfaxad shuti runaca, Sala shuti churita charishca jipapash, chuscu patsaj quimsa huatata causajushpami, shuj churicunata, ushicunata charircara.

¹⁴Sala shuti runaca, quimsa chunga huatata charishpami, Heber shuti churita charirca.

¹⁵Sala shuti runaca, Heber shuti churita charishca jipapash, chuscu patsaj quimsa huatata causajushpami, shuj churicunata, ushicunata charircara.

¹⁶Heber runaca, quimsa chunga chuscu huatata charishpami, Peleg shuti churita charirca.

¹⁷Heber runaca, Peleg shuti churita charishca jipapash, chuscu patsaj quimsa chunga huatata causajushpami, shuj churicunata, ushicunata charircara.

¹⁸Peleg shuti runaca, quimsa chunga huatata charishpami, Reu shuti churita charirca.

¹⁹Peleg runaca, Reu shuti churita charishca jipapash, ishcai patsaj iscun huatata causajushpami, shuj churicunata, ushicunata charircara.

²⁰Reu shuti runaca, quimsa chunga ishcai huatata charishpami, Serug shuti churita charirca.

²¹Reu shuti runaca, Serug shuti churita charishca jipapash, ishcai patsaj canchis huatata causajushpami, shuj churicunata, ushicunata charircara.

²²Serug shuti runaca, quimsa chunga huatata charishpami, Nacor shuti churita charirca.

²³Serug shuti runaca, Nacorta charishca jipapash, ishcai patsaj huatata causajushpami, shuj churicunata, ushicunata charircara.

²⁴Nacor shuti runaca, ishcai chunga iscun huatata charishpami, Taré shuti churita charirca.

²⁵Nacor runaca, Taré shuti churita charishca jipapash, patsaj chunga iscun huatata causajushpami, shuj churicunata, ushicunata charircara.

²⁶Taré shuti runaca, canchis chunga huatata charishpami, Abram, Nacor, Harán shuti churicunata charirca.

²⁷Taré shuti runapaj miraicunaca, caicunami: Taré shuti runaca: Abram, Nacor, Harán shuti churicunatami charirca. Harán shuti runaca, Lot shuti churitami charirca.

²⁸Harán shuti runaca, Taré shuti paipaj taitapash nara huañujpillatami, pai huacharishca llactapi, caldeocunapaj Ur shuti pueblopi huañurca.

²⁹Abrambash, Nacorpashmi, huarmicunata cazararca. Abrambaj huarmica, Sarai shutimi carca. Nacorpaj huarmica, Milca shutimi carca. Milca shuti huarmica, Harán shuti runapaj ushimi carca. Harán shuti runaca, Milca shuti, Isca shuti huarmicunapajpash taitami carca.

³⁰Ashtahuangarin Sarai shuti huarmica, huahuata tarinata na yachaj huarmi cashpami, huahuata na charirca.

³¹Taré shuti runaca, paipaj churi Abramdapash, paipaj churi Harán shuti runapaj churi Lot runatapash, Abrambaj huarmi paipaj jachun Saraitapash pushashpami llujshirca. Shina llujshishpami, caldeocuna causanajuj Ur pueblomandaca, Canaán llactaman ringapaj paicunandi llujshirca. Shina rinajushpami, Harán shuti puebloman chayashpaca, chaipi causangapaj quedanajurca.

³²Taré shuti runaca, ishcai patsaj picha huatata causashpami, Harán pueblopi huañurca.