Read Imbabura Highland Quichua GÉNESIS 13 Bible Online

GÉNESIS 13 - Imbabura Highland Quichua bible

GÉNESIS 13

¹Abramga, Egiptomandaca paipaj huarmitapash, tucui imata pai charishcatapash apashpami, Neguev llactaman vichai rijurca. Lotpashmi paihuan rijurca.

²Abramga, animaltapash, culquitapash, orotapash, ninandapachami charirca.

³Abramga, Neguev llactamandaca asha asha rishpami, Bet-el shuti pueblo ladoman chayagrirca. Paica, Bet-el shuti, Hai shuti pueblocunahuan chaupipi, paipaj carpa punda tiajushca pushtumanllatami tigrarca.

⁴Altarta punda rurashca pushtumanllatami tigrarca. Chaipimi Abramga, Mandaj Diospaj shutipi mañajurca.

⁵Abramhuan purijuj Lotpashmi, llamacunata, huarmi huagracunata, carpacunata charirca.

⁶Ishcandi causangapaca, alpaca ña na pactarcachu. Paicunapaj ashtaca animalcuna tiashcamandami, chai alpapillata causaitaca na ushanajurca.

⁷Chaimandami, Abrambaj animalcunata michijcunahuan, Lot runapaj animalcunata michijcunahuan fiñanajushpa rimarinajurca. Chai llactapica, cananeo nishca, ferezeo nishca gentecunapashmi causanajurca.

⁸Shinamandami Abramga, Lottaca cashna nirca: “Ñucanchi ishcandica, familia purami canchi. Chaimandami ñucanchica, na fiñanajuna canchi. Shinallata ñuca michijcunahuan, cambaj michijcunahuambash na fiñanajunachu.

⁹¿Nachu cai tucui alpacunaca, cambaj ñaupajpi? Shinamandami, candaca ñuca ladomanda anchuripai nipani. Can lluqui ladoman rijpica, ñucaca ali ladomanmi risha. Can ali ladoman rijpica, ñucaca lluqui ladomanmi risha” nircami.

¹⁰Shina nijpi Lot vichai ricushpaca, Jordán yacu ladopi tiaj tucui pugru pambacunatami ricurca. Tucuilla chai pambacunaca, Mandaj Dios churashca huertashna, Zoar shuti pueblo chimba purapi tiaj Egipto llactashna, yacu jicharijuj pambacunashnami carca. Chai pambacunaca, Sodoma shuti, Gomorra shuti pueblocunata, Mandaj Dios nara tucuchijpimi, chashna juyaillagu carca.

¹¹Shina cajpimi Lotca, Jordán yacu ladopi tiaj tucuilla pugru pambata, paipaj cachun agllarca. Chashnami Lotca, indi llujshimuj ladoman rishpa caishujmanda, chaishujmanda shicanyarinajurca.

¹²Abramga, Canaán llactapimi carpacunata shayachishpa causajurca. Lotca, pugru pambapi tiaj pueblocunapi causajushpami, paipaj carpacunataca, Sodoma pueblo ladocaman shayachijurca.

¹³Ashtahuangarin Sodoma pueblopi causajcunaca, nalicuna cashpa juchatalla rurajcuna cashpami, Mandaj Diostaca ninanda fiñachinajurca.

¹⁴Mandaj Diosca, shicanyashpa Lot rishca jipami, Abramdaca cashna nirca: “Cunan can maipi shayajungui, chai pushtumandaca jahua ladomambash, ura ladomambash, indi llujshimuj ladomambash, indi huashajuj ladomambash vichai ricui.

¹⁵Can ricujungui, chai tucui alpataca canman, cambaj miraicunamambashmi, tucui causaipaj carasha.

¹⁶Cambaj miraicunataca, ñutu alpatashnami mirachisha. Ñutu alpata maijambash cuentai ushashpaca, cambaj miraicunatapashmi cuentanga.

¹⁷Jatarishpa, chai llactataca largomambash, anchomambash purishpa ricugri. Chai llactataca, canmanmi carasha” nircami.

¹⁸Shina nijpimi Abramga, paipaj carpata anchuchishpa, encina nishca quirucuna shayanajuj Mamre shuti pambapi causaj shamurca. Chai Mamre shuti pambaca, Hebrón pueblo ladomanmi carca. Chaipimi, Mandaj Diosman altarta rurarca.