Read Imbabura Highland Quichua GÉNESIS 14 Bible Online

GÉNESIS 14 - Imbabura Highland Quichua bible

GÉNESIS 14

¹Sinar shuti llactata jatun mandaj Amrafel shuti runa mandajui punllacunami, cashna tucurca: Arioc shuti jatun mandajca, Elasar llactatami mandajurca. Quedorlaomer shuti jatun mandajca, Elam llactatami mandajurca. Tidal shuti jatun mandajca, Goim shuti llactatami mandajurca.

²Paicunami, Sodoma pueblota jatun mandaj Bera shuti runahuan, Gomorra pueblota jatun mandaj Birsa shuti runahuan, Adma shuti pueblota jatun mandaj Sinab shuti runahuan, Zeboim pueblota jatun mandaj Semeber shuti runahuan, Zoar nishca Bela shuti pueblota jatun mandajhuambash macanajurca.

³Tucuilla chai mandajcunaca, Sidim shuti jatun pambapimi tandanajurca. Chai pambaca, Cachi tiaj Cuchami.

⁴Quedorlaomer shuti mandajtaca, chunga ishcai huatatami servishpa causanajushca carca. Shina cashpapash chunga quimsa huatapica, chai mandajtaca na cazushpami jariyanajurca.

⁵Shina cajpimi Quedorlaomer shuti runaca, chunga chuscu huatapica, paipaj cumba jatun mandajcunandi shamurca. Shina shamushpami refaíta nishca gentecunataca, Astarot Karnaim shuti llactapi, zuzita nishca gentecunataca, Ham shuti pueblopi, emita nishca gentecunataca, Save-quiriataim shuti pueblopi misharca.

⁶Horeocunataca, Seir shuti urcumanda jichushca pamba ladopi tiaj Parán shuti pugru pambacaman catishpami misharca.

⁷Paicunaca, cutin tigrashpa shamushpami, En-mispat nishca Cades puebloman chayarca. Amalecitacuna causaj llactapi ima tiashcatapash, tucuillami tucuchirca. Shinallata Hazezon-tamar shuti llactapi causanajuj amorreocunatapashmi tucuchirca.

⁸Shina cajpimi Sodoma pueblota, Gomorra pueblota, Adma pueblota, Zeboim pueblota, Zoar nishca Bela shuti pueblota jatun mandajcuna llujshishpaca, Sidim shuti pambapi macanajungapaj alichirinajurca.

⁹Paicunami, Elam pueblota jatun mandaj Quedorlaomer shuti runahuan, Goim shuti pueblota jatun mandaj Tidal shuti runahuan, Sinar shuti pueblota jatun mandaj Amrafel shuti runahuan, Elasar pueblota jatun mandaj Arioc shuti runahuan macanajurca. Chuscu jatun mandajcunaca, caishuj picha jatun mandajcunahuanmi macanajurca.

¹⁰Sidim shuti pugru pambaca, asfalto llujshijuj utujucuna jundami carca. Sodoma pueblota, Gomorra pueblota jatun mandajcuna pacajugrishpaca, huaquingunaca chai utujucunapimi huashajunajurca. Huaquingunaca, urcupi pacajungapajmi calpanajurca.

¹¹Shina rijpimi Sodoma shuti, Gomorra shuti pueblocunapi causajcuna tucui imata charishcata, tucui ima tiashcacunatapash apashpa rinajurca.

¹²Abrambaj huauquipaj churi Lotca, Sodoma pueblopimi causajurca. Chaimandami paitapash, pai ima charishcacunatapash apashpa rinajurca.

¹³Hebreopura Abramga, amorreopura Mamre shuti runapaj encina nishca quirucuna shayanajuj alpapimi causajurca. Mamre shuti runaca, Escol shuti, Aner shuti runacunapaj huauquimi carca. Paicunami, Abramhuanga shujllashnalla imatapash yarinajurca. Chaipimi pacajushpa shamuj shuj runaca, Lotta apashcata Abramman villarca.

¹⁴Abramga, paipaj familiapura prezu tiajujta uyashpami, paita servijcunata, paipaj huasipi huacharishca, quimsa patsaj chunga pusaj runacunata tandachishpa, Dan shuti pueblocaman catirca.

¹⁵Abramhuan, paita servijcunahuanga tuta japigrishpami, paicunahuan macanajurca. Paicunaca, Damasco pueblo jahua ladoman tiaj Hoba shuti pueblocamanmi catinajurca.

¹⁶Tucui ima charishcacunata apashcacunatapash, shinallata paipaj familiapura Lottapash, pai imata charishcacunatapash, huarmicunatapash, shuj gentecunatapashmi quichushpa, cutin muyuchimurca.

¹⁷Quedorlaomer shuti runatapash, paihuan tandanajushca jatun mandajcunatapash, Abram mishashpa tigramujujpimi, Sodoma pueblota jatun mandajca, Save shuti pugru pambapi tuparingapaj llujshirca. Chaica, Jatun Mandajpaj pugru Pambami.

¹⁸Chaipica Melquisedec shuti curami, tandatapash, vinotapash apashpa shamurca. Paica, Salem pueblota jatun mandajpash, jahua pachapi causajuj Taita Diospaj curapashmi carca.

¹⁹Chaipimi, cashna nishpa bendiciajurca: “Jahua pachata, cai pachata ruraj, jahua pachapi causajuj Taita Diosllata, can Abramdaca bendiciapachun.

²⁰Canda fiñajcunata, cambaj maquipi cuj, jahua pachapi causajuj Taita Diosca, alicachi tucushca cachun” nijurcami. Shina nijpimi Abramga, chungamanda shujguta llujchishpa tucui charishcacunamanda curca.

²¹Shinamandami, Sodoma pueblota jatun mandajca, Abramdaca cashna nirca: —Gentecunatalla ñucaman cuhuai. Paicuna ima alicunata charishcataca apailla— nircami.

²²Shina nijpimi Abramga, Sodoma pueblota jatun mandajtaca, cashna nishpa tigrachirca: —Jahua pachata, cai pachata ruraj jahua pachapi causajuj Mandaj Taita Diospajman maquita vichai chutashpami, cashna nircani:

²³‘Shujlla puchatallapash, chaquipi churajushcata huatarina caratallapash, cambaj cajtaca imatallapash na japishachu’ nircanimi. Ama: ‘Abrahamdaca, ñucami charijyachircani’ nichunmi, chashna nircani.

²⁴Chairalla viñai runacuna micushcatallami, na tigrachi ushasha. Ñucahuan rij Aner, Escol, Mamre shuti runacunallami, paicuna japinatallata japinga— nircami.