Read Imbabura Highland Quichua GÉNESIS 15 Bible Online

GÉNESIS 15 - Imbabura Highland Quichua bible

GÉNESIS 15

¹Chai jipacunami Mandaj Diosca, Abrahamman muscuipishna ricurishpa, cai shimicunata cashna nishpa villarca: —Abram, ama manllaichu. Ñucami, can jarcarina escudoshna cani. Can japinapash, ashtaca ashtacami canga— nircami.

²Shina nijpimi Abramga, cashna nishpa tigrachirca: —Jatun Mandaj Dioslla, ¿imatashi carahuangui? Huahuataca na charipanichu. Ñuca huasipi mayordomopash, Damasco pueblomanda chai Eliezermi— nircami.

³Cashnatapashmi Abramga nirca: —Ricui, huahuataca na carahuarcanguichu. Chaimandami ñuca ima charishcacunataca, ñuca huasipi huacharishca ñucapaj gañanlla japinga— nircami.

⁴Chai jipami Mandaj Diosca, cai shimicunata cashna nishpa Abramman villarca: —Can imata charishcacunataca, paica na japingachu, ashtahuangarin cambaj churipachami japinga— nircami.

⁵Shina nishpami, Abramdaca canllaman pushashpa, cashna nirca: —Cunanga, jahua pachata ricui. Chai luzerocunata cuentai ushashpaca, cuentailla— nircami. Shinallata cashnatapashmi nirca: —Cambaj miraicunapash, chai luzerocunashnami canga— nircami.

⁶Mandaj Dios villashcata crijpimi Abramdaca, imatapash cashcatapacha rurashcata ricushpa chasquirca.

⁷Paitaca cashnami nirca: —Ñucami, caldeocuna causanajuj Ur shuti pueblomanda llujchimuj Mandaj Dios cani. Cai llactata cambaj cachun cungapajmi llujchimurcani— nircami.

⁸Shina nijpimi Abramga, cashna nishpa tigrachirca: —Mandaj Jatun Dioslla, ¿ñuca japinataca imashnata yachapashayari?— nircami.

⁹Shina nijpimi, cashna nirca: —Quimsa huatata charij maltun huagrata, quimsa huatata charij shuj huarmi chivota, quimsa huatata charij shuj jari llamata, shuj urpitapash, shuj palomatapash, ñucaman apamui— nircami.

¹⁰Shina nijpimi Abramga, tucui chai animalcunata japirca. Chai animalcunataca chaupishpami, cada chaupihuan chimbapurashpa churarca. Ashtahuangarin urpita, palomataca na chaupircachu.

¹¹Chai huañuchishca aichacunata micungapajmi, ullahuangacuna urai shamunajurca. Abramga, chaicunata manllachishpami calpachijurca.

¹²Ashtahuangarin Abramdaca, ña indi huashajunallapimi, puñui japirca. Paitaca, ashtahuan manllanayai yana tutami ñapash japimurca.

¹³Chashna manllarijujpimi Mandaj Diosca, Abramdaca cashna nijurca: —Cambaj mirai huahuacuna shujcunapaj llactapi causagrinataca, yachanapachami cangui. Chai llactapimi, gañan tucushpa causanajunga. Paicunaca, chuscu patsaj huatacamanmi, llaquichi tucushpa causanajunga.

¹⁴Ashtahuangarin canguna servishpa causana llactataca, ñucami llaquichisha. Chai jipami, cambaj miraicunaca ashtaca charishcacunata apashpa llujshimunga.

¹⁵Canga, imapash na tucushpa, aligutami cambaj taitacunapajman chayamungui. Alipacha rucuyashpami, huañushpa pambai tucungui.

¹⁶Cambaj miraicunaca, chuscu miraicuna tucushcapimi, caiman tigramunga. Amorreocunapash, cunangaman ninan nalicunataca, nara ruranllu— nijurcami.

¹⁷Ña indi huashajushca amsayajujpimi, cashna tucurca: Shuj jornomanda cushni llujshijujtami, Abramga ricurca. Animalcunata chaupishpa churashca sirinajuj chaupita, michumbi ninata japichishca yalijujtapashmi ricurca.

¹⁸Chai punllami Mandaj Diosca, Abramhuan ari nishpa cashna nirca: —Cambaj miraicunamanmi, cai llactata carasha. Egipto llacta jatun yacumandaca, Eufrates jatun yacucamanmi carasha.

¹⁹Ceneo, cenezeo, cadmoneo nishca gentecunapaj llactatapash,

²⁰heteo, ferezeo, refaíta,

²¹amorreo, cananeo, gergeseo, jebuseo nishca gentecunapaj llactatapashmi carasha— nircami.