Read Imbabura Highland Quichua GÉNESIS 17 Bible Online

GÉNESIS 17 - Imbabura Highland Quichua bible

GÉNESIS 17

¹Abramga, iscun chunga iscun huatata charijpimi, Mandaj Dios ricurishpa, cashna nirca: —Ñucami, Tucui Ushaita Charij Taita Dios cani. Ima pandatapash na rurashpa, ñuca ñaupajpi ali purilla.

²Ñuca ari nijushcataca, ñucahuan canhuan pactachingapajmi churasha. Shinamandami canmandaca, ninandapacha mirachisha— nircami.

³Shina nijpimi Abramga, cungurishpa alpaman chayajta cumurirca. Shina cumurijpimi Taita Diosca, Abramdaca cashna nijurca:

⁴—Ricui, ñuca ari nijushcapash canhuanmi. Shinamandami canga ashtaca, ashtaca gentecunapaj taita tucungui.

⁵Chaimandami, cambaj shutica ña na Abram canga. Ashtahuangarin cambaj shutica, Abrahammi canga. Candaca, ashtaca ashtaca gentecunapaj taita cachunmi churarcani.

⁶Canmandaca, ninandapacha mirachishpami, llactacunatapash rurasha. Canmandami, jatun mandajcunapash llujshinga.

⁷Ñuca ari nishcataca, ñucahuan canhuan pactachingapajmi callarichisha. Shinallata cambaj jipa miraicunaman, cati miraicunaman ari nishpa pactachingapajmi, chashna churasha. Cambajpash, cambaj jipa miraicunapajpash, Taita Dios cangapajmi, chashna callarichisha.

⁸Can causangui chai llactataca, canmambash, cambaj jipa miraicunamambashmi carasha. Tucuilla Canaán llactataca, causaita causaicaman cachunmi carasha. Shina carashpami, paicunapaj Taita Dios casha— nijurcami.

⁹Taita Diosca, cutinmi Abrahamdaca cashna nirca: —Canga, ñucahuan ari nishcata cazunami cangui. Cambash, cambaj jipa miraicunapash, cati miraicunapashmi cazuna canguichi.

¹⁰Ñucahuan, canhuan, cambaj jipa miraicunahuan ñuca ari nijushcata pactachinaca, caimi: Canguna puramanda tucui jaricunami, circuncisión nishcata rurana canguichi.

¹¹Canguna charishca asha caraguta fitishpami, circuncisionda rurana canguichi. Chaimi ñucahuan, cangunahuan ari ninajushcata ricuchijunga.

¹²Ungushca punllamanda pusaj punllapimi, canguna purapica tucui mirai jaricuna, circuncisionda rurana canguichi. Chaitaca, huasipi huacharishca cajpipash, culquihuan randishca caru llactamanda na cangunapaj mirai cajpipash, chashnallatami rurana canguichi.

¹³Cambaj huasipi huacharishca cajpipash, culquihuan randishca cajpipash, circuncisionda ruranapachami canguichi. Cangunapaj aichapi chaita rurashcami, ñucahuan ari ninajushcataca, causaita causaicaman ricuchijunga.

¹⁴Maijan jaripash, circuncisionda na rurashpa, asha caraguta fitishpa circuncisionda na rurashca cashpaca, paipaj gente puramanda anchuchi tucushcami canga. Paica, ñucahuan ari nijushcata na cazushcamandami, chashna tucunga— nijurcami.

¹⁵Taita Diosca, cashnatapashmi Abrahamdaca nirca: —Cambaj huarmi Saraitaca, ama ashtahuan Sarai nishpa rimanguichu. Paipaj shutica, Sara[1] shutimi canga.

¹⁶Paita bendiciashpami, paimandapash churita canman carasha. Ari, paitaca bendiciashapachami. Shinamandami, llactacunapaj mama tucunga. Paimandami, gentecunata jatun mandajcunapash miranga— nircami.

¹⁷Shina nijpimi Abramga, alpaman chayajta cumurishpa, paipaj shungupica asishpa, cashna yajurca: “¿Patsaj huatata charij runapashchu, churita charigrini? ¿Sarapash, iscun chunga huatata charij huarmichu, vijsayu tucungrin?” yajurcami.

¹⁸Abrahamga, Taita Diostaca cashnami nirca: —Ismaelca, cambaj ñaupajpica aliguta causajushpami ali canman— nircami.

¹⁹Shina nijpimi Taita Diosca, cashna nirca: —Na llullashpami nini. Sara shuti cambaj huarmica, shuj churiguta ungushpami, canman cunga. Paitaca, Isaac shutita shutichingui. Ñuca ari nijushcataca, paihuan shinllitapacha churashpami, paipaj cati miraicunahuambash, causaita causaicaman pactachijusha.

²⁰Ismaelmandapashmi candaca uyashcani. Ricui, paitapash bendiciashami. Paimandapash mirachishpami, ashtaca ashtaca gentecunata mirachisha. Chunga ishcai mandajcunapaj taitami canga. Paimandaca, shuj jatun llactatami rurasha.

²¹Ashtahuangarin ñuca ari nijushcataca, Isaac runahuanmi callarichisha. Shamuj huatapica, cunan punllashnallatami, Sara shuti cambaj huarmica, shuj churiguta ungushpa canman cunga— nircami.

²²Abrahamhuan parlanata tucuchishpaca, Taita Diosca Abrahambaj ladomandaca vichai rircallami.

²³Chai jipami, Abrahamga paipaj churi Ismaeltapash, paipaj huasipi huacharishca tucuilla servijcunatapash, paipaj culquihuan randishca tucui servijcunatapash, Abrahambaj huasipi servishpa causanajuj tucui jaricunatapash japirca. Shina japishpami, Taita Dios mandashcashnallata, paicuna charishca asha caraguta, chai punllallata fitishpa circuncisionda rurarca.

²⁴Abrahamga, pai charishca asha caraguta fitishpa circuncisionda rurajushpaca, iscun chunga iscun huatatami charirca.

²⁵Paipaj churi Ismaelca, pai charishca asha caraguta fitishpa circuncisionda rurai tucujui punllapica, chunga quimsa huatatami charirca.

²⁶Chai punllapillatami Abrahambash, paipaj churi Ismaelpash, circuncisionda rurai tucunajurca.

²⁷Paipaj huasipi tucuilla jaricunapash, huasipi huacharishca servij jaricunapash, culquihuan randimushca shuj llactamanda jaricunapashmi, Abrahamhuan circuncisionda rurai tucunajurca.