Read Imbabura Highland Quichua GÉNESIS 2 Bible Online

GÉNESIS 2 - Imbabura Highland Quichua bible

GÉNESIS 2

¹Chashnami jahua pachatapash, cai pachatapash, chaicunapi tucui ima tiajcunatapash ruraita tucuchirca.

²Taita Diosca, canchis punllapimi tucui ruranata tucuchirca. Chai canchis punllapimi, tucuita rurajushcamanda samarca.

³Chai canchis punllatami, Taita Diosca bendiciashpa paipajlla cachun shicanyachirca. Tucuita rurashpa callarichishcamanda chai punllapi samashpami, shina shicanyachirca.

⁴Jahua pachata, cai pachata rurai callarishcacunaca cashnami: Cai pachata, jahua pachata, Mandaj Taita Dios rurajui punllapica,

⁵pambapi tucui ima yurapash, pambapi tucui ima jihuapash cai pachapica nara viñarcachu. Mandaj Taita Diosca, cai pachapica nara tamiachishcachu carca. Alpapi imata rurangapajpash, pipash nara tiarcachu.

⁶Shina cajpipash alpa ucumanda yacu samai vichai llujshishpami, tucui cai pachapi jicharijurca.

⁷Shinamandami Mandaj Taita Diosca, runataca ñutu alpamanda rurarca. Chai runapaj singapi fucushpami, causaita cuj samaita curca. Chaimandapachami runaca, causaita callarirca.

⁸Mandaj Taita Diosca, indi llujshimuj ladomanmi, Edén pushtupi shuj huertara rurashpa tarpurca. Chaipimi, pai rurashca runataca churarca.

⁹Mandaj Taita Diosca chai alpapimi, munanayai ricurijuj, micungapaj ali tucui yuracunata viñachirca. Shinallata chai huerta chaupipica, causaita cuj yuratapashmi viñachirca. Alita, nalita yachaita cuj yuratapashmi viñachirca.

¹⁰Edenmandaca, ashtaca yacumi huertaman jicharijurca. Chai huertamandami, chuscupi chaupirishpa ri callarijurca.

¹¹Shuj yacuca, Pisón shutimi. Chai yacuca, oro tiaj Havila shuti tucuilla llactatami muyujun.

¹²Chai llactamanda oroca aligupachami. Chaipica, mishquillagu ashnajuj bedelio nishca jambipash, ónice nishca rumicunapashmi tian.

¹³Ishcaipi chaupirishpa rijuj yacuca, Gihón shutimi. Chai yacumi, Cus shuti tucuilla llactata muyujun.

¹⁴Quimsapi chaupirishpa rijuj yacuca, Hidekel shutimi. Chai yacuca, Asiria llactatami indi llujshimuj ladoman rijun. Chuscupi chaupirishpa rijuj yacuca, Eufrates shutimi.

¹⁵Mandaj Taita Diosca, Edén huertapi imatapash rurashpa cuidachunmi, runataca apashpa churarca.

¹⁶Mandaj Taita Diosca, runataca cashna nishpami mandarca: “Huertapi tiaj tucui yuracunapi fucushcataca micui ushanguimi.

¹⁷Ashtahuangarin alita, nalita yachaita cuj yurapi fucushcataca ama micunguichu. Ima punlla cashpapash, chai yuramanda micushpaca huañunguipachami” nircami.

¹⁸Chai jipami, Mandaj Taita Diosca cashna nirca: “Jarica, pailla causanaca nalichu. Paita ayudashpa causachun, shuj cumbata rurasha” nircami.

¹⁹Shina nishpami Mandaj Taita Diosca, alpamanda rurashca, sachacunapi causaj tucui animalcunata, jahuata rij alasyu tucui animalcunata, Adán ricushpa shutita churachun apamurca. Causaj tucui animalcunaca, Adán shutichijpimi, chai shutihuan quedarca.

²⁰Chashnami Adanga, tucui animalcunata, jahuata rij alasyu animalcunata, pambapi causaj tucui animalcunatapash shutichirca. Ashtahuangarin Adanda cumbashpa paita ayudajca, na tiarcachu.

²¹Shinamandami Mandaj Taita Diosca, ninan puñuita Adanbajman cachamurca. Pai ninanda puñujpimi, shuj costillasta llujchishpa, chai aichataca cutinllata vicharca.

²²Jarimanda llujchishca costillastami, Mandaj Taita Diosca shuj huarmita rurashpa, jaripajman apamurca.

²³Chaimandami Adanga, cashna nirca: “Cunangarimbash, paica ñuca tullumanda rurashca ñuca tullallatami. Ñuca aichamanda rurashca ñuca aichallatami. Shina cashcamanda paica, Huarmi shutimi canga. Paica, jarimanda llujchishcami” nircami.

²⁴Chaimandami jarica, paipaj taitata, paipaj mamata saquishpa, paipaj huarmihuan tandanajushpa, shujlla aicha tucushpa causanajunga.

²⁵Adanbash, paipaj huarmipash ishcandi lluchullacunami carca. Chashna cashpapash, na pingai tucunajurcachu.