Read Imbabura Highland Quichua GÉNESIS 20 Bible Online

GÉNESIS 20 - Imbabura Highland Quichua bible

GÉNESIS 20

¹Chai llactamandami Abrahamga, Neguev llactaman rirca. Cades shuti pueblopi, Shur nishca jichushca pamba chaupipi tiaj Gerar shuti pueblopimi, shuj llactamanda purij runashna causajurca.

²Abrahamga, paipaj huarmi Sarataca: “Ñuca panimi” nijurcami. Chaimandami, Gerar shuti pueblota jatun mandaj Abimelec shuti runaca, Sara huarmita apamugrichun cachashpa, paipaj huarmi cachun japirca.

³Ashtahuangarin Taita Diosca, muscuipi tuta ricurishpami, Abimelectaca cashna nirca: “Ricui, chai huarmita apamushcamandami huañungui. Chai huarmica, cazarashca cusayu huarmimi” nircami.

⁴Ashtahuangarin chai huarmitaca, nara tacarishca cashpami, cashna nirca: “Jatun Dioslla, ¿ima nalita na rurajtapash huañuchinallachu cangui?

⁵¿Nachu chai runaca: ‘Ñuca panimi’ nirca? Shinallata ¿nachu chai huarmipash: ‘Ñuca turimi’ nirca? Ñucaca ali shungu cashpa, ima nalitapash na rurashpami paitaca japircani” nircami.

⁶Shina nijpimi Taita Diosca, muscuipi paiman ricurishpa, cashna nirca: “Ñucapash, can ali shunguhuan chashna rurashcataca yachanimi. Chai huarmipi chayashpa juchata rurashpa, ñucata ama fiñachijuchunmi, ñucapash candaca jarcarcani.

⁷Cunanga, chai huarmitaca paipaj cusaman tigrachilla. Paica, ñuca ima nishcata villajmi. Pai, canmanda ñucata mañajpimi causangui. Chai huarmita na tigrachishpaca cambash, canhuan tucui tiajcunapash, huañunapacha cajtaca yachanami cangui” nircami.

⁸Shina nishca jipami Abimelec runaca, tutamandata jatarishpa, paipaj tucui servijcunata cayashpa, tucuilla cai shimicunataca, paicuna uyajta villajurca. Shina villajpimi chai runacunaca, ninandapacha manllarinajurca.

⁹Chai jipami Abimelec runaca, Abrahamda cayashpa cashna nirca: —¿Imatata ñucanchitaca rurashcangui? ¿Ñucaca, ima juchata rurashpata candaca fiñachircani? Canga ñucamambash, ñuca mandajuj llactamambash, ninan juchata ruranatamari apamushcangui. Canga, ñucahuanga napash ruranatami rurashcangui— nircami. Abimelec runaca, cashnatapashmi Abrahamdaca nirca:

¹⁰—¿Ima yashpata, chashnataca rurarcangui?— nircami.

¹¹Shina nijpimi Abrahamga, cashna nishpa tigrachirca: —Ñucaca cashnami yajurcani: Cai llactapica, Taita Diosta manllajcunaca, napacha tianllu. Shina cashcamanda ñucataca, ñuca huarmimandaca huañuchihuangami yashpami, chashna nircani.

¹²Na llullajunichu. Ñuca mamamandaca na pani cashpapash, ñuca taitamandaca panimi. Chashna cajpimi, ñuca huarmi cachun japircani.

¹³Ñucataca, maipipash purichun, ñuca taitapaj huasimanda Taita Dios llujchijujpillatami, ñuca huarmitaca chashna ningui nijurcani: ‘Ñucaman can alita ruranaca, caimi. Maiman chayashpapash, ñucataca: Ñuca turimi ningui’ nircanimi— nijurcami.

¹⁴Shina nijujpimi Abimelec runaca, llamacunata, huarmi huagracunata, servij jaricunata, servij huarmicunata japishpa Abrahamman cararca. Shinallata paipaj huarmi Saratapashmi tigrachirca.

¹⁵Shina tigrachishpami Abimelec runaca, cashna nirca: —Ricui, ñuca llactaca cambaj ñaupajpimi, can maipi munashcapi chaipi causailla— nircami.

¹⁶Saratapash cashnami nirca: —Ricui, huaranga culquitami cambaj turiman cushcani. Ricui, chai culquimi, canhuan tiajcunapaj ñaupajpipash, tucui gentecunapaj ñaupajpipash, umata quilparina telashna canga. Shinamandami, ima juchachinapash illaj quedangui— nircami.

¹⁷Chai jipami Abrahamga, Taita Diosta mañarca. Chashna mañajpimi, Taita Diosca Abimelec runatapash, paipaj huarmitapash, paita servij huarmicunatapash, huahuata tarichun alichijpi huahuacunata charirca.

¹⁸Mandaj Diosmi, Abimelec runapaj huasipi causaj tucuilla huarmicunataca, huahuata na tari ushanata rurashca carca. Abrahambaj huarmi Saramandami, chashna rurashca carca.