Read Imbabura Highland Quichua GÉNESIS 21 Bible Online

GÉNESIS 21 - Imbabura Highland Quichua bible

GÉNESIS 21

¹Mandaj Diosca, imashna pai villashcashnallatami, Sara shuti huarmita ricungapaj shamurca. Mandaj Diosca, Sara huarmihuanga imashna villashcashnallatami rurarca.

²Chaimandami Sara huarmica, Taita Dios villashca punllapillata, ña payagu cashpapash, shuj jari huahuaguta ungushpa Abrahamman curca.

³Abrahamga, Sara ungushca paipaj churitaca, Isaac shutitami shutichirca.

⁴Taita Dios mandashcashnallatami Abrahamga, pusaj punllapica paipaj churi Isaactaca, circuncisión nishcata rurarca.

⁵Abrahamga, paipaj churi Isaacta ungushca punllapica, patsaj huatatami charirca.

⁶Chaimandami Sara huarmica, cashna nirca: “Taita Diosmi, ñucataca asichihuashca. Shinallatami maijambash caita uyashpaca, ñucatapash asihuanga” nircami.

⁷Ashtahuan cashnatapashmi nirca: “¿Pita Abrahamdaca: ‘Sara huarmica, huahuacunata chuchuchingami’ ningayari? Ña rucu cajpipash, shuj churitami Abrahamman cushcani” nircami.

⁸Huahua Isaac ña viñajpimi, chuchumanda anchuchirca. Isaacta chuchumanda anchuchishca punllami Abrahamga, jatun micuita rurarca.

⁹Egiptomanda Agar shuti huarmi, Abrahamman ungushca churimi, Sarapaj churi Isaacta asishpa ricun carca. Chaitami, Sara huarmica ricujurca.

¹⁰Chaimandami Sara huarmica, Abrahamdaca cashna nirca: “Cai servij huarmitaca, paipaj churindi llujchishpa cachailla. Cai servij huarmipaj churica, ñuca churi Isaac imatalla japinacunatapash, na chaupiringachu” nircami.

¹¹Paipaj churi Ismaelta chashna nishcamandaca, Abraham runapaca, ninan llaquipachami ricurirca.

¹²Chashna cajpimi Taita Diosca, Abrahamdaca cashna nirca: “Chai huahuamandapash, canda servij huarmimandapash, ama ninanda llaquirichu. Sara huarmi tucui imata nishcata rurailla. Isaacmanda miraicunallami, cambaj miraicunami ni tucunajunga.

¹³Shinallata servij huarmipaj churipaj miraimandapachami, cambaj miraillata cashcamandaca, shuj llactata rurasha” nircami.

¹⁴Shina nijpimi Abrahamga, tutamandata jatarishpa tandatapash, cara muchilapi yacutapash japishpa, Agar huarmiman carashpa apachirca. Shinallata huambragutapash cushpami, Agartaca cayacaman nishpa cacharca. Shina cachajpi llujshishpami Agar huarmica, Beerseba shuti jichushca pambapilla, caiman chaiman purijurca.

¹⁵Chashna purijujpimi, cara muchilapi yacupash tucurirca. Chaimandami paipaj churitaca, shuj yura ucupi saquirca.

¹⁶Shina saquishpaca, paipaj churi huañujta ama ricungapajmi, arcohuan flechata cacharijpi urmanapishnalla caruman rishpa tiarirca. Chai chimba purapi mama tiajujpimi, huambraguca ninanda caparishpa huacajurca.

¹⁷Huahua huacajujtami, Taita Dios uyarca. Taita Diospaj angelca, jahua pachamandami Agar huarmita cayashpa cashna nirca: “¿Agar, imashcata cangui? Ama manllaichu. Taita Diosmi, cambaj huahua chaipi huacajujtaca uyarca.

¹⁸Jatarishpa, huahuata japishpa cambaj maquipi charijuilla. Ñucami, chai huahuamandaca, shuj jatun llactata rurasha” nircami.

¹⁹Chai jipami, Agar huarmipaj ñavita pascanshna Taita Dios ricuchijpi, shuj pugyuta ricurca. Shina ricushpami, cara muchilapi yacuta jundachishpa huahuaman ufiachirca.

²⁰Taita Diosca, chai huahuaguhuanmi carca. Chai huahua viñashpaca, jichushca pambapi causashpami, arcohuan flechata shitanatapash ali yachaj tucurca.

²¹Paica, Parán shuti jichushca pambapimi causajurca. Paipaj mamaca, Egipto llactamanda huarmihuanmi cazarachirca.

²²Chai huatacunallatami, cashna tucurca: Abimelec shuti runapash, paipaj soldadocunata mandaj Ficol shuti runapashmi, Abrahamdaca cashna ninajurca: —Tucui imata ruranapipash, Taita Diosca canhuanmi.

²³Cunanga, Taita Diospaj shutipi caipillata juramentuyari. Ñucatapash, ñuca churitapash, ñuca churipaj churitapash na llaquichishachu. Ashtahuangarin ñuca canhuan alita rurashcashnallatami ñucatapash, can maipi causajushcangui, chai llactatapash alita rurasha nishpa juramentuyari— ninajurcami.

²⁴Shina nijpimi, Abrahamga: —Ari, juramentushallami— nishpa tigrachirca.

²⁵Shina nishpapash Abrahamga, Abimelec runata servijcuna yacuta llujchingapaj allashca jatun utujuta quichushcamandami, Abimelectaca shinllita rimarca.

²⁶Shina tacurijpimi Abimelec runaca, cashna nishpa tigrachirca: —Maijan chashna rurashcatapash, na yachanichu. Cambash, ñuca yachachun na villahuashcanguichu. Ñucapash, chaitaca cunangaman na uyashcanichu— nircami.

²⁷Abrahamga llamacunata, huarmi huagracunata japishpami Abimelec runaman cararca. Chashna carashpami, ishcandimanda ari ninajurca.

²⁸Shina rurashpami Abrahamga, canchis huarmi llamacunata shican churarca.

²⁹Shinamandami Abimelec runaca, Abrahamdaca cashna nirca: —Can shican churashca chai canchis huarmi llamacunaca, ¿imatata ricuchinajun?— nircami.

³⁰Shina nijpimi Abrahamga, cashna nishpa tigrachirca: —Cai canchis huarmi llamacunataca, ñuca maquimandami japingui. Yacuta llujchina cai jatun utujutaca, ñuca allashcata ricuchijuchunmi, chashna japingui— nircami.

³¹Chaimandami chai alpataca, Beerseba shutita shutichirca. Chaipi ishcandi juramentushcamandami, chashna shutichirca.

³²Chashnami, Beerseba shuti pambapi ari ninajurca. Chai jipaca, Abimelec runaca paipaj soldadocunata mandaj Ficol shuti runandi jatarishpami, filisteocuna causaj llactaman tigrarca.

³³Beerseba shuti pambapimi Abrahamga, tamarisco nishca shuj yurata tarpurca. Chaipimi, causaita causajuj Mandaj Taita Diospaj shutipi mañajurca.

³⁴Filisteocuna causaj llactapica, Abrahamga ashtaca punllacunatami causajurca.