Read Imbabura Highland Quichua GÉNESIS 22 Bible Online

GÉNESIS 22 - Imbabura Highland Quichua bible

GÉNESIS 22

¹Chai jipacunami, cashna tucurca: Taita Diosca, Abraham imashna crishcata yachangapajmi: —Abraham— nishpa cayarca. Shina cayajpimi paica: —Caipimi capani— nirca.

²Shina nijpimi, cashna nirca: —Cunanga, cambaj juyashca, shujlla churi Isaacta japishpa, Moriah shuti llactaman ri. Tucui urcucunamanda maijan urcuta ñuca ricuchijpipash, chaipi ñucaman cushpa tucuillata rupachinguilla— nircami.

³Shina nijpimi Abrahamga, tutamandata jatarishpa, paipaj burropi apachinata churashpa, paita servij ishcai runacunatapash, paipaj churi Isaactapash pushashpa rirca. Shinallata Diosman animalta cushpa tucuillata rupachina yamdatapash cuchushpami, Taita Dios maiman richun mandashca pushtuman jatarishpa rirca.

⁴Ña quimsa punlla tucujpimi Abrahamga, chai llactataca carumanda vichai ricujurca.

⁵Shina ricujushpami Abrahamga, paita servijcunataca cashna nirca: —Cangunaca, burrohuan caipi shuyaichilla. Ñucahuan huambraguhuanga, chaicamanmi rigrinchi. Diosta chaipi ninanda alicachishpaca, cangunapajman tigramushunllami— nircami.

⁶Shina nishpami Abrahamga, Diosman animalta cushpa tucuillata rupachina yamdata japishpa, paipaj churi Isaacman apachirca. Shinallata paipash ninata japichinata, cuchillota apashpami, ishcandi rinajurca.

⁷Shina rinajushpami Isaacca, paipaj taita Abrahamdaca: —Ñuca taiticu— nirca. Shina nijpimi, Abrahamga: —Caipimi cani. ¿Imatata ningui, ñuca huahualla?— nirca. Shina nijpimi Isaacca, cashna nirca: —Ricui, ninapash, yamdapash caipimi. Shina cajpipash, ¿Diosman cushpa tucuillata rupachina llamaca maipita?— nircami.

⁸Shina nijpimi Abrahamga, cashna nishpa tigrachirca: —Ñuca huahualla, tucuillata rupachina llamataca Taita Diosmi caranga— nircami. Shina nishpami, ishcandi rinajurca.

⁹Taita Dios villashca pushtuman chayashpaca, shuj altartami Abrahamga rurarca. Chai altarpi yamdata churashpami, paipaj churi Isaacta huatashpa, altarpi tiajuj yamda jahuapi churarca.

¹⁰Shina churashca jipami Abrahamga, paipaj churipaj cungata muchungapaj, paipaj maquita chutashpa cuchillota japirca.

¹¹Shina rurajujpimi Mandaj Diospaj angelca, jahua pachamanda: —Abraham, Abraham— nishpa caparirca. Shina caparijpimi paica: —Caipimi capani— nirca.

¹²Shina nijpimi, cashna nirca: —Huambragupaj jahuapica, ama cambaj maquita chutaichu. Paitaca, ama imatapash ruraichu. Taita Diosta can manllajtaca, ñami rijsini. Cambaj shujlla churita ñucaman cunata na mitsashcamandami, ña yachani— nircami.

¹³Shina nijpi Abraham vichai ricushpami, paipaj huashapillata zarza nishca cashapi, cachucunahuan jarcarishca shuj jari llamagu shayajujta ñapash ricurca. Shina ricushpami Abrahamga, paipaj churipaj randica, chai jari llamaguta japingapaj rishpa, Diosman cushpa tucuillata rupachijurca.

¹⁴Chaimandami Abrahamga, chai urcutaca: “Mandaj Diosca caranllami” nishpa shutichirca. Chaimandami cunangaman: “Mandaj Diospaj urcupica caranllami” ninajun.

¹⁵Mandaj Diospaj angelca, Abrahamda jahua pachamanda cutin cayashpami,

¹⁶cashna nirca: —Mandaj Diosca, cashnami nin: ‘Can caita rurashcamandami, ñucamandallata juramenturcani. Cambaj shujlla churita ñucaman cunataca na mitsashcamandami, chashna juramenturcani.

¹⁷Chaimanda candaca bendiciashapachami. Cambaj miraicunataca, jahua pachapi luzerocunatashna, mama cucha manñapi t'iyu alpatashnami mirachisha. Cambaj miraicunami, paicunata fiñajcunata mishashpa, pueblo pungucunapi quichushpa shayanajunga.

¹⁸Cambaj miraicunamandami, cai pachapi tiaj tucui llactacunaca, bendiciai tucunga. Ñuca rimashcata can cazushcamandami, chashna canga’ ninmi— nircami.

¹⁹Paita servijcunapajman Abraham tigrajpimi, paicunaca jatarishpa, Beerseba puebloman paihuan rinajurca. Abrahamga, Beersebapimi causajurca.

²⁰Chai jipacunami, cashna tucurca: Cashna nishpami, Abrahamman villanajurca: “Ricui, Milca shuti huarmipashmi jari huahuacunata ungushpa, cambaj huauqui Nacorman cushca” ninajurcami.

²¹Punda churica, Uz shutimi, paipaj huauquica Buz shutimi, Kemuel shuti churica, Aram runapaj taitami.

²²Shinallata Quesed, Hazo, Pildas, Jidlaf, Betuel shuti churicunatapashmi ungushca.

²³Betuel runami, Rebecapaj taita. Paicunami, Abrahambaj huauqui Nacorpaj huarmi Milca ungushca pusaj churicuna.

²⁴Reúma shuti caishuj huarmipashmi Teba, Gaham, Tahas, Maaca shuti churicunata ungurca.