Read Imbabura Highland Quichua GÉNESIS 23 Bible Online

GÉNESIS 23 - Imbabura Highland Quichua bible

GÉNESIS 23

¹Sara shuti huarmi causashca huatacunaca, patsaj ishcai chunga canchis huatami carca. Sara huarmica, ashtaca huatacunatami causarca.

²Sara huarmica, Canaán llactapi tiaj Quiriat-arba nishca Hebrón pueblopimi huañurca. Shinamandami, Abrahamga ninanda llaquirishpa, Saramanda huacangapaj shamurca.

³Chaipimi Abrahamga, paipaj huarmi huañushcapaj ñaupajpi jatarishpa, Het shuti runapaj miraicunata cashna nijurca:

⁴—Ñucaca, canguna purapica, caru llactamanda shamushca runami cani. Shuj llactamanda purij runami cani. Ñuca huarmi huañushcataca, ñuca ñaupajpillata pambangapaj, canguna puramandaca ñucapaj alpa cachun shuj alpata cuhuaichi— nijurcami.

⁵Het shuti runapaj miraicuna Abrahamman tigrachishpaca, cashnami ninajurca:

⁶—Ñucanchita mandajlla, ñucanchita uyapairi. Canga, ñucanchi purapica, Taita Dios agllashca ali mandajmi cangui. Cambaj huarmigu huañushcataca, ñucanchi pambarina ashtahuan ali utujupi pambapailla. Ñucanchi puramandaca, paita pambachunga pipash na mitsashunllu. Cambaj huarmigu huañushcata pambachunga, pipash na jarcapangachu— ninajurcami.

⁷Shina ninajujpimi, Abrahamga jatarishpa, chai llactapi causanajuj gentecunapaj ñaupajpi urai cumurirca. Paicunaca, Het shuti runapaj miraicunami carca.

⁸Shina cumurishpami, paicunahuanga cashna parlajurca: —Ñuca huarmigu huañushcata, ñuca ñaupajpi pambachun cangunapaj munai cajpica, ali uyahuaichi. Shinallata Zohar shuti runapaj churi Efrón runahuan ñucamanda parlapaichi.

⁹Macpela shuti pambapi tiaj jatun utujuta jatuchun, chashna parlapaichi. Chai utujutaca, paipaj alpa manñapimi charin. Huañushcata pambana alpata canguna purapi ñuca charingapaj, chai alpa mashna valijpipash, chaipajllata jatuhuachunlla— nishpami parlajurca.

¹⁰Cai Efrón runaca, Het shuti runapaj miraicunahuanmi tandanajushca tiajurca. Heteopura Efrón runaca, Het shuti runapaj miraicunapaj ñaupajpi, paipaj puebloman tucui yaicujcunapaj ñaupajpipashmi, Abrahamman tigrachishpa cashna nirca:

¹¹—Ama chashna nihuaichu. Ñucata mandajlla, uyahuayari. Ñucaca alpatapash, chai alpapi tiaj jatun utujutapashmi canman cupani. Ñuca llacta puracunapaj ñaupajpimi, canman cupani. Cambaj huarmigu huañushcataca, chaipi pambapailla— nircami.

¹²Shina nijpimi Abrahamga, chai llactapi causajcunapaj ñaupajpi urai cumurirca.

¹³Shina cumurishpami, chai llactapi causajcunapaj ñaupajpi, Efrón runaman cashna nishpa tigrachirca: —Ashtahuangarin can uyangapaj munashpaca, ñucata uyahuai nipanimi. Cambaj alpa mashna valijpipash, culquita cushallami. Ñuca cushcata japijpimi, ñuca huarmigu huañushcataca chai alpapi pambapasha— nircami.

¹⁴Shina nijpimi Efrón runaca, Abrahamman cashna nishpa tigrachirca:

¹⁵—Ñucata mandajlla, uyahuayari. Alpaca, chuscu kilo chaupi yali culquimi valipan. ¿Chaica cambajpash, ñucapajpash imatayari? Cambaj huarmigu huañushcataca, chaipi pambailla— nircami.

¹⁶Shina nijpimi Abrahamga, Efrón runahuan parlarishpa randirca. Abrahamga, Efrón runa imashna mañashca culquitami, Het shuti runapaj mirai runacunapaj ñaupajpi pezarca. Chai culquitaca, randishpa jatushpa purijcuna ruranshnallatami, chuscu kilo chaupi yali culquita, Efrón runaman curca.

¹⁷Efronbaj alpaca, Mamre shuti pambamandaca, indi llujshimuj ladoman tiaj Macpela shuti pambapimi. Chai alpaca, chaipillata tiaj jatun utujundi, chai tucuilla pamba muyundipi tiaj quirucunandimi,

¹⁸Abrahambaj tucurca. Chai alpaca, Het shuti runapaj mirai runacunapaj ñaupajpi, chai puebloman punguta tucui yaicujcunapaj ñaupajpipashmi, Abrahambaj tucurca.

¹⁹Chai jipami Abrahamga, paipaj huarmi Sarataca, Macpela shuti pambapi tiaj jatun utujupi pambarca. Chai pambaca, Hebrón nishca Mamre shuti pambamandaca, indi llujshimuj ladomanmi. Chai pambaca, Canaán llactapimi tiajun.

²⁰Chashnami chai alpaca, chaipillata jatun utuju tiashcandi, Abrahambaj tucurca. Chai alpaca, huañushcata pambangapaj, Het shuti runapaj miraicunata Abraham randijpimi, paipaj tucurca.