Read Imbabura Highland Quichua GÉNESIS 25 Bible Online

GÉNESIS 25 - Imbabura Highland Quichua bible

GÉNESIS 25

¹Abrahamga, cutin shuj huarmitami japirca. Chai huarmipaj shutica, Cetura shutimi carca.

²Chai huarmica: Zimram, Jocsán, Medán, Madián, Isbac, Súa shuti huahuacunatami ungurca.

³Jocsán shuti runaca, Seba shuti, Dedán shuti churicunatami charirca. Dedán shuti runapaj churicunaca: Asurim, Letusim, Leumim shuticunami carca.

⁴Madián shuti runapaj churicunaca: Efa, Efer, Hamoc, Abida, Elda shuticunami carca. Tucui paicunami, Cetura shuti huarmipaj miraicuna carca.

⁵Abrahamga, tucui imata pai charishcatapash, Isaacmanmi curca.

⁶Ashtahuangarin caishuj huarmicunahuan charishca churicunamanga, ima caranacunatapash ashagutallami cararca. Shina carashpaca, pai causajushpallatami, paipaj churi Isaacmanda caruyachishpa, indi llujshimuj lado caru llactaman cacharca.

⁷Abraham causashca huatacunaca, caicunami: Paica, patsaj canchis chunga picha huatacunatami causarca.

⁸Abrahamga, alipacha rucuyashpa ashtaca huatacunata causashpami, paipaj espíritu llujshijpi huañurca. Huañushpaca, paipaj gentecunahuanmi tandanajugrirca.

⁹Pai huañujpica, Isaac shuti, Ismael shuti paipaj churicunami, Macpela shuti pambapi tiaj jatun utujupi pambarca. Macpela shuti pambaca, heteopura Zohar shuti runapaj churi Efrón shuti runapaj alpa ladopi, Mamre shuti pamba chimba purapimi.

¹⁰Het shuti runapaj miraicunapaj alpataca, Abrahammi randishca carca. Chai alpapimi Abrahambash, paipaj huarmi Sarapash, pambai tucurca.

¹¹Abraham huañushca jipami, cashna tucurca: Taita Diosmi, Abrahambaj churi Isaacta bendiciarca. Isaac runaca, “Ñucata ricushpa Causajujpaj yacuta llujchina jatun utuju” nishca ladopimi causajurca.

¹²Abrahambaj churi Ismael runapaj miraicunaca, caicunami: Ismaeltaca, Sara shuti huarmita servij, Egiptomanda Agar shuti huarmimi ungurca.

¹³Ismaelpaj churicunapaj shuticunaca, caicunami: Paicuna imashna huacharishcapimi, catishpa churashca: Ismaelpaj punda churica, Nebaiot shutimi, cati churicunaca: Cedar, Adbeel, Mibsam,

¹⁴Misma, Duma, Massa,

¹⁵Hadar, Tema, Jetur, Nafis, Cedema shuticunami.

¹⁶Paicunami, Ismaelpaj churicuna. Caicunami, paicunapaj shuticuna. Uchilla pueblocunapi, carpacunapi causanajushpami chashna carca. Paicunapaj familiacunamandaca, chunga ishcai mandajcunami tiarca.

¹⁷Ismael causashca huatacunaca, caicunami: Paica, patsaj quimsa chunga canchis huatatami causajurca. Paipaj espíritu llujshijpi huañushpami, paipaj gentecunahuan tandanajugrirca.

¹⁸Ismaelpaj miraicunaca, Havila shuti llactamandaca Shur shuti llactacamanmi causanajurca. Chai llactacunaca, Asiria llactamanda shamuna, Egipto llacta chimba purapimi. Ismaelca, tucui paipaj huauquicunapaj ñaupajpimi huañurca.

¹⁹Abrahambaj churi Isaac runapaj miraicunaca, caicunami: Abrahamga, Isaac shuti churitami charirca.

²⁰Isaac runaca, chuscu chunga huatata charishpami, Betuel shuti runapaj ushi Rebecataca, paipaj huarmi cachun japirca. Betuel runaca, Padan-aram shuti llactapi causaj arameo purami carca. Rebecapaj turi Labanbash, arameo purallatami carca.

²¹Isaac runaca, paipaj huarmimandami Mandaj Diosta mañajurca. Paipaj huarmica, huahuata tarinata na yacharcachu. Chai mañashcata Mandaj Dios chasquijpimi, paipaj huarmi Rebecapash vijsayu tucurca.

²²Paipaj huahuacunaca, vijsa ucupimi ninanda macanajunajurca. Chaimandami, Rebeca huarmica: “Chashna cajpica, ¿imapajta causashayari?” nishpa, Mandaj Diosta tapugrirca.

²³Shina tapujpimi Mandaj Diosca, cashna nishpa tigrachirca: “Cambaj vijsa ucupica, ishcai llactacunami tian. Cambaj vijsa ucumandapachami, ishcai llactacuna shican shican llujshinga. Shuj llactaca, caishuj llactata ashtahuan yali shinllimi canga. Punda churimi, jipa churita servishpa causanga” nircami.

²⁴Unguna punllacuna pactajpica, paipaj vijsa ucupica ishcai huahuacuna tiajtami, ñapash yachanajurca.

²⁵Punda llujshij huahuaca, puca ajcha, milma junda carashnami carca. Paitaca, Esautami shutichinajurca.

²⁶Chai jipaca, paipaj huauqui Esaupaj chaquipi alipacha charirishcami llujshirca. Paitaca, Jacobo shutitami shutichirca. Isaac runaca, paipaj huarmi ungujui punllapica, sucta chunga huatatami charirca.

²⁷Huahuacunaca, ñami viñarca. Esaú runaca, pambapilla causaj cashpami, animalcunata huañuchinata alipacha yachan carca. Ashtahuangarin Jacoboca, carpacunapi casilla causaj huambragumi carca.

²⁸Isaac runaca, Esautami pai huañuchishca animalcunapaj aichata micuj cashpa, ninanda juyan carca. Ashtahuangarin Rebeca huarmica, Jacobotami ninanda juyan carca.

²⁹Jacoboca, micunayai caldotami yanujurca. Esaú runaca, pambamanda shaijushca tigramushpami,

³⁰Jacobotaca cashna nirca: —Chai pucalla micunaguta micungapaj carahuai nipanimi. Ninandami shaijushcani— nircami. Chaimandami paitaca, Edom shutita shutichirca.

³¹Shina nijpimi, Jacoboca: —Can punda churi cashpa imatalla japinataca, cunan punllallata jatuhuailla— nishpa tigrachirca.

³²Shina nijpimi Esaú runaca, cashna nirca: —Ricui, ñucaca ña huañugrijunimi. Shina cashpaca punda churi cashcapash, ¿imapajta ali cangayari?— nircami.

³³Shina nijpimi, Jacoboca: —Cunan punllallata ñucaman juramentuhuai— nijpi, Esaú runaca juramenturca. Chashna nishpami, pai punda churi cashpa imatalla japinataca, Jacoboman jaturca.

³⁴Chai jipami Jacoboca, tandatapash, lentejas caldotapash, Esauman curca. Esaú runaca, micushpa ufiashpaca, jatarishpa rircallami. Chashnami Esaú runaca, pai punda churi cashpa imatalla japinataca, yangapi churarca.