Read Imbabura Highland Quichua GÉNESIS 26 Bible Online

GÉNESIS 26 - Imbabura Highland Quichua bible

GÉNESIS 26

¹Chai jipami chai llactapica, jatun yarjai tiarca. Abraham causajui punllacunapi yarjai tiashcashnallatami, cutin tiarcara. Shinamandami Isaac runaca, filisteocunata jatun mandaj Abimelec causajuj Gerar shuti puebloman rirca.

²Mandaj Diosca, Isaacman ricurishpami, cashna nijurca: “Ama Egiptoman urai richu. Maijan llactapi ñuca causai nijpipash, chaipi causanguilla.

³Shuj llactamanda purij runashna, cai llactapillata causajuilla. Ñucaca canhuanmi casha, candaca bendiciashami. Cai tucui alpacunataca canmambash, cambaj miraicunamambashmi carasha. Chashna carashpami, cambaj taita Abrahamman juramentushcataca pactachisha.

⁴Cambaj miraicunataca, jahua pachapi luzerocunatashnami, ashtaca ashtacata mirachisha. Cambaj miraicunamanmi, cai tucui alpacunataca carasha. Tucui cai pachapi tiaj llactacunaca, cambaj miraicunamandami bendiciai tucunajunga.

⁵Ñuca rimashcata Abraham uyashcamanda, imata rurai nishcata, ñuca mandashcacunata, ñuca escribichishca shimicunata, ñuca mandashca shimicunata cazushcamandami, bendiciai tucunajunga” nijurcami.

⁶Isaac runaca, Gerar shuti pueblopimi causajurca.

⁷Chaipi causanajuj runacuna, paipaj huarmimanda tapunajujpimi: “Ñuca panimi” nishpa tigrachirca. Chaipi causanajuj runacunaca, Rebecamanda huañuchihuaipajpash yashpami: “Ñuca huarmimi” ningapaca manllarca. Rebeca huarmiguca, juyaillagupachami carca.

⁸Isaac runaca, tauca punllacunata ña chaipi causajujpimi, cashna tucurca: Filisteocunata jatun mandaj Abimelec shuti runaca, shuj ventanamanda ricujushpami Isaac runaca, paipaj huarmita llambuchishpa juyachijujta ricurca.

⁹Chaimandami Abimelec runaca, Isaacta cayashpa cashna nirca: —Ricui, chai huarmica cambaj huarmipachamari cashca. ¿Imamandata: ‘Ñuca panimi’ nircangui?— nircami. Shina nijpimi Isaac runaca, cashna nishpa tigrachirca: —Ñuca huarmimanda huañuchihuaipajpash yashpami, chashna niparcani— nircami.

¹⁰Shina nijpimi Abimelec runaca, cashna nirca: —¿Imapajta ñucanchitaca, caita rurarcangui? Cai pueblopi causaj puramanda huaquingunaca, ashamandallami na cambaj huarmihuan siririshca. Shina cajpica canmi, ñucanchita juchata rurachinguiman carca— nircami.

¹¹Shinamandami Abimelec runaca, tucui gentecunata cashna nishpa mandarca: —Cai runata, na cashpaca paipaj huarmita maijambash tacarillatapash tacarishpaca, huañungapachami— nircami.

¹²Isaac runaca, chai alpapillatami tarpushpa causajurca. Chai huatapica, shujlla granomanda patsaj granotami cozechajurca. Chashnami, Mandaj Diosca bendiciarca.

¹³Isaac runaca, tucuipi ali llujshishpami ninanda charijyarca. Chaimandami paica ninan charij tucushpa, ninan ushaita charirca.

¹⁴Llamacunata, huarmi huagracunata, tarpushca chagracunataca, ashtacatapachami charirca. Shina cajpimi filisteocunaca, ñucanchipash paishna charishcaiman yashpa ricunajurca.

¹⁵Isaacpaj taita Abraham causajui punllacunapimi, Abrahamda servijcunaca yacuta llujchina jatun utujuta allashca carca. Chaitami, filisteocunaca alpata jundachishpa, tucuillata quilpashca carca.

¹⁶Shinamandami Abimelec runapash, Isaactaca cashna nirca: —Canga, ñucanchimanda anchuri. Canga, ñucanchita yali ushaita charijmari tucushcangui— nircami.

¹⁷Isaac runaca, chai llactamanda llujshishpa rishpami, Gerar shuti pueblo lado pugru pambapi carpata shayachishpa, chaipi causajurca.

¹⁸Isaac runaca, paipaj taita Abraham causajui punllacunapi, yacuta llujchingapaj allashca jatun utujucunatami cutin allarca. Chai utujucunataca, Abraham huañushca jipami, filisteocuna quilpashca carca. Chaicunataca, paipaj taita shutichishca shutitallatami shutichirca.

¹⁹Ashtahuangarin Isaacta servij runacunaca, chai pugru pambapi allanajushpami, chaipica yacu jicharijuj jatun utujuta tarirca.

²⁰Gerar shuti pueblomanda michijcunahuan, Isaacpaj michijcunahuan ninandapacha fiñanajushpami: “Yacuca ñucanchipajmi” nirinajurca. Paicuna fiñanajushcamandami, yacuta llujchingapaj allashca chai jatun utujutaca, “Esek” shutita shutichirca.

²¹Shinamandami, shuj jatun utujuta allanajurca. Chai jatun utujumandapashmi, mitsarishpa ninandapacha fiñanajunajurca. Chaimandami, “Sitna” shutita shutichirca.

²²Isaac runaca, chaimanda anchurishpami, shuj jatun utujuta allachirca. Chai yacumandaca, na fiñanajurcachu. Chaimandami chai yacutaca, “Rehobot” shutita shutichirca. Paica cashnami nijurca: “Tucuipi ali llujshichunmi, Mandaj Diosca ayudahuarca. Chaimanda cai alpapillata mirashunchilla” nijurcami.

²³Chai pushtumandami Isaac runaca, Beerseba puebloman vichai rirca.

²⁴Chai tutallatami Mandaj Diosca, Isaacman ricurishpa, cashna nirca: “Ñucami, cambaj taita Abrahambaj Taita Dios cani. Ama manllaichu, ñucami canhuan cani. Ñucata servij Abrahamda juyashcamandami, candaca bendiciasha. Cambaj huahuacunatapash, ashtacatami mirachisha” nircami.

²⁵Shina nijpimi Isaac runaca, chaipi shuj altarta shayachishpa, Mandaj Diospaj shutipi mañajurca. Shinallata paipaj carpatapashmi, chaipi shayachirca. Chaipillatami Isaacta servijcunaca, yacuta llujchingapaj shuj jatun utujuta allarca.

²⁶Abimelec runaca, Gerar shuti pueblomandapachami, paipaj cumba Ahuzat shuti runandi, paipaj soldadocunata mandaj Ficol shuti runandi, Isaacpajman shamurca.

²⁷Shina shamujpimi Isaac runaca, cashna nirca: —¿Imapajta ñucapajman shamunguichi? ¿Nachu ñucataca na ricunayachishpa, canguna puramanda llujchishpa cachahuarcanguichi?— nircami.

²⁸Shina nijpimi, cashna nishpa tigrachinajurca: —Mandaj Diosca, canhuan cajtami ricupashcanchi. Shinamandami, cashna nircanchi: ‘Cunanga cambash, ñucanchipash ñucanchipura juramentupashun. Chashna rurashpami, canhuan ari nipashun.

²⁹Imashnami ñucanchipash candaca, tacaritapash na tacarishpa, alitalla rurashpa casilla aliguta cachamurcanchi, chashnallata ñucanchitapash ima nalitapash ama ruranguichu. Cunanga, Mandaj Dios bendiciashcamari capangui’ nircanchimi— ninajurcami.

³⁰Chai jipaca, jatun micuita Isaac rurajpimi micunajurca, ufianajurca.

³¹Tutamandata jatarishpami caishujmanda, chaishujmanda juramentunajurca. Chashnami Isaacpash, paicunata cayacaman nishpa cacharca. Paicunapash Isaactaca, cayacaman nishpami, casilla aliguta rinajurca.

³²Chai punllacunallatami, cashna tucurca: Isaacta servij runacunaca, yacuta llujchingapaj jatun utujuta paicuna allashcata, Isaacman villaj shamushpami: —Ñucanchica, yacuta tarishcanchimi— ninajurca.

³³Chaitaca, “Seba” shutitami shutichirca. Chaimandami, chai puebloca cunan punllacaman, “Beerseba” shutihuan quedashca.

³⁴Esaú runaca, chuscu chunga huatata charishpami, heteopura Beeri shuti runapaj ushi Judit huarmihuan cazararca. Shinallata heteo puramandallata, Elón shuti runapaj ushi Basemat shuti huarmihuambashmi cazararca.

³⁵Chai huarmicunaca Isaacpaj, Rebecapaj shungupica ninandami llaquichinajurca.