Read Imbabura Highland Quichua GÉNESIS 29 Bible Online

GÉNESIS 29 - Imbabura Highland Quichua bible

GÉNESIS 29

¹Jacoboca, paipaj ñanda catishpa rishpami, indi llujshimuj ladoman causajcunapaj llactaman rirca.

²Shina rijushpami Jacoboca, yacuta llujchingapaj allashca shuj jatun utujuta pambapi ricurca. Chaipillatami, quimsapi shicanyachishca llama canllacunapash sirinajujta ricurca. Chai utujumandami, huagracunaca yacuta ufian carca. Chai utuju jahuapica, shuj jatun rumipashmi tiajushca carca.

³Chaipimi, tucui llamacunata tandachin carca. Chai utuju jahuapi tiajuj rumita anchuchishpa, llamacunaman yacuta ufiachin carca. Chai jipaca, rumi maipimi tiajushca, chai utuju jahuapillatami, cutin churan carca.

⁴Chai michijcunatami, Jacoboca: —Ñuca huauquicuna, ¿cangunaca maimandata canguichi?— nishpa tapurca. Shina tapujpimi, chai michijcunaca: —Ñucanchica, Harán shuti pueblomandami capanchi— ninajurca.

⁵Shina nijpimi, Jacoboca: —¿Nachu Nacorpaj churi Labán shuti runata rijsipanguichi?— nirca. Shina nijpimi, chai michijcunaca: —Ari, rijsinchimi— ninajurca.

⁶Shina nijpimi, Jacoboca: —¿Alillachu causajun?— nirca. Shina nijpimi michijcunaca, cashna ninajurca: Alillami causajun. Ricui, chaitaca paipaj ushi Raquelmi, llamacunahuan shamujun— ninajurcami.

⁷Shina nijpimi Jacoboca, cashna nirca: —Ricuichi, huagracunata tandachina horasca nara chayanllu, yapa punllarami. Llamacunaman yacuta ufiachishpa michingapaj cutin richilla— nircami.

⁸Shina nijpimi michij runacunaca, cashna nishpa tigrachinajurca: —Llamacuna tucuilla tandanajungacaman, yacuta llujchingapaj allashca jatun utuju jahuapi tiajuj rumita anchuchingacaman, llamacunaman yacuta ufiachitaca na ushanllu— ninajurcami.

⁹Michijcunahuan Jacobo chashna parlajujpillatami Raquelca, llamacunata michij cashpa, paipaj taitapaj llamacunahuan shamujurca.

¹⁰Chaipimi cashna tucurca: Jacoboca, paipaj mamapaj turi Labanbaj ushi Raquel shamujujta ricushpa, paipaj mamapaj turi Labanbaj llamacunatapash ricushpami Jacoboca, chai jatun utuju ladoman chayashpa, chai jahuapi tiajuj rumita anchuchirca. Shina anchuchishpami, paipaj mamapaj turi Labanbaj llamacunaman yacuta ufiachirca.

¹¹Jacoboca, Raquelta muchashpami, shinllita caparishpa huacarca.

¹²Jacoboca: “Cambaj taitapaj familia purami cani. Rebecapaj churimi cani” nishpami, Raquelman villarca. Shina villajpimi Raquelca, taitapajman calpashpa tucuita villajurca.

¹³Labán runaca, paipaj panipaj churi Jacobo shamushcata villajpi uyashcandimi, tuparingapaj calparca. Jacobota ña tuparishpaca, ugllashpa muchashpami, huasiman pushamurca. Jacoboca, tucui caicunatami Labán runaman villajurca.

¹⁴Shina villajpimi, Labán runaca: “Ñuca tullupacha, ñuca aichapachamari cashcangui” nijurca. Jacoboca, shuj quillatami Labán runahuan causajurca.

¹⁵Chai jipami Labán runaca, Jacobotaca cashna nirca: —Canga, ¿ñuca familia cashcamandallachu, yanga servishpa causagringui? ¿Mashnatata cuchun nihuangui? Villahuai— nircami.

¹⁶Labán runaca, ishcai ushicunatami charirca. Punda ushica, Lea shutimi carca. Jipa ushica, Raquel shutimi carca.

¹⁷Lea shuti ushica, llaquilla ñavitami charirca. Ashtahuangarin Raquelca, juyailla ricujuj ali huarmigumi carca.

¹⁸Jacoboca, Raquelta ninanda juyashpami, Labán runataca cashna nirca: —Ñucaca, cambaj jipa ushi Raquelmandaca, canchis huatatami canda servipasha— nircami.

¹⁹Shina nijpimi Labán runaca, cashna nishpa tigrachirca: —Shina cashpaca, shuj runaman cunapaj randica, canman cunami ashtahuan ali canga. Ñucahuan quedailla— nircami.

²⁰Shinami Jacoboca, Raquelmandaca canchis huatata servishpa causajurca. Raquelta ninanda juyashcamandaca, Jacobopaj ricuipica huaquinlla punllacunashnallami carca.

²¹Shinamandami Jacoboca, Labán runataca cashna nirca: —Ñuca huarmi tucunataca, paihuan cazarangapaj cuhuailla. Ñuca servina huatacunaca, ñami pactashca— nircami.

²²Shina nijpimi Labán runaca, chaipi causaj tucui jaricunata tandachishpa, jatun micuita rurarca.

²³Chaipica cashnami tucurca: Labán runaca, ña tutayashcapimi, paipaj ushi Lea huarmita, Jacobopajman pushamurca. Shina pushamujpimi paica, chai huarmipi chayarca.

²⁴Labán runaca, paita servij Zilpa shuti huarmitapashmi, paipaj ushi Leata servij cachun curca.

²⁵Cayandi tutamanda ricujpica, Lea huarmimi cashca carca. Chaimandami Jacoboca, Labán runataca cashna nirca: —¿Canga, imatata rurahuashcanguiyari? ¿Nachu candaca, Raquelmanda servijurcani? ¿Imamandata chashna umachihuangui?— nircami.

²⁶Shina nijpimi Labán runaca, cashna nishpa tigrachirca: —Ñucanchi cai llactapica, na can nishcashna ruranata yachanllu. Punda ushitapash nara cazarachishpallata, jipa ushitara cazarachinataca na yachanllu.

²⁷Shina cashpaca, cai cazarai micui semanataca pactachilla. Chai jipaca, shuj canchis huatata ñucata servishpa causachunmi, caishuj ushitapash canman cusha— nircami.

²⁸Shina nijpimi, Jacoboca chashna rurashpa, chai jatun micui semanataca pactachirca. Shina pactachijpimi Labán runaca, paipaj ushi Raqueltaca, paipaj huarmi cachun curca.

²⁹Labán runaca, paita servij Bilha shuti huarmitapashmi, paipaj ushi Raquelta servij cachun curca.

³⁰Jacoboca, Raquel huarmipipash chayashpami, Lea huarmita ashtahuan yalica, Raquelta ninanda juyarca. Jacoboca, Labán runataca shuj canchis huatatami servishpa causajurca.

³¹Mandaj Diosca, Lea shuti huarmitaca yangapi churai tucushca causajujta ricushpami, huahuacunata curca. Ashtahuangarin Raquel huarmica, huahuaguta tarinata na yacharcachu.

³²Lea huarmica, vijsayu tucushpami, shuj jari huahuaguta ungurca. Paica cashnami nirca: “Mandaj Diosmi, ñuca llaquita ricushca. Cunanga, chaimandami ñuca cusaca ñucata juyahuanga” nishpami chai huahuagutaca, Rubén shutita shutichirca.

³³Lea shuti huarmica, cutin vijsayu tucushpami, shuj jari huahuaguta ungurca. Paica cashnami nirca: “Ñucataca, yangapi churai tucushpa causajujta ricushpami, Mandaj Diosca cai huahuatapash carahuashca” nishpami chai huahuagutaca, Simeón shutita shutichirca.

³⁴Cutin vijsayu tucushpami, shuj jari huahuaguta ungurca. Paica cashnami nirca: “Cunanga, ñuca cusaca cutimbashmi ñucapi chayanga. Quimsa churicunata paiman ungushcamandami, chashna chayanga” nishpami chai huahuagutaca, Leví shutita shutichirca.

³⁵Cutin vijsayu tucushpa, shuj jari huahuaguta ungushpaca: “Cunanga, Mandaj Diostami alicachisha” nishpami chai huahuagutaca, Judá shutita shutichirca. Chai jipaca, na ashtahuan huahuata charircachu.