Read Imbabura Highland Quichua GÉNESIS 31 Bible Online

GÉNESIS 31 - Imbabura Highland Quichua bible

GÉNESIS 31

¹Jacoboca, Labán shuti runapaj churicuna cashna nishpa parlanajujtami uyan carca: “Jacoboca, ñucanchi taitapaj tucui ima charishcatami apashca. Ñucanchi taitapaj ima charishcata apashpami, chashnapacha charijyashca” ninajujtami uyan carca.

²Jacoboca, Labán runapaj ñavitapashmi ricurca. Shina ricushpami, punda paihuan ali cashcashnaca, na ali cajta ricujurca.

³Shinallata Mandaj Diospash, Jacobotaca cashnami nirca: “Cambaj taitacuna, cambaj familiacuna causanajuj llactaman tigrailla. Ñucami canhuan casha” nircami.

⁴Shina nijpimi Jacoboca, Raquel shuti, Lea shuti paipaj huarmicunataca, llamacuna micunajuj pambaman shamuichi nishpa cayachun cacharca.

⁵Jacoboca, paipaj huarmicunataca cashnami nirca: —Cangunapaj taitapaj ñavitaca, pundashnalla ñucahuan ali cajtaca, ña na ricunichu. Ashtahuangarin ñuca taitapaj Taita Diosmi, ñucahuan cashca.

⁶Cangunallata yachanguichimi. Tucui ñuca ushaihuanmi, cangunapaj taitataca servishcani.

⁷Cangunapaj taitami, ñucata umachihuashca. Imata rurashcamanda cushami nishpapash, chungacaman umachishpami na cuhuashca. Shina cajpipash pai ñucata nalita rurachunga, Taita Diosca na saquishcachu.

⁸Paica: ‘Pintado llamacunaca, can imatalla rurashcamanda japinami canga’ nircami. Shina nijpica, tucuilla llamacunami pintadocunatalla huachan carca. Shinallata: ‘Listado llamacunami, can imatalla rurashcamanda japina canga’ nircami. Shina nijpica, tucuilla llamacunami listadocunatalla huachan carca.

⁹Chashnami Taita Diosca, cangunapaj taitapaj animalcunata quichushpa ñucaman cuhuarca.

¹⁰Llamacuna japirina punllacunapimi, cashna tucurca: Huarmi llamacunata japinajuj jari llamacunaca, listadocuna, pintadocuna, muru muru color llamacuna japinajujta vichai ricujushpami muscujurcani.

¹¹Chai muscuipimi Taita Diospaj angelca: ‘Jacobo’ nijpi, ñucaca: ‘Caipimi cani’ nircani.

¹²Shina nijpimi chai angelca, cashna nihuarca: ‘Cunanga, jatarishpa vichai ricui. Huarmi llamacunata japinajuj tucui jari llamacunaca, listadocuna, pintadocuna, muru muru color llamacuna cajtami ricungui. Tucui imata Labán canda rurashcata, ñucami ricushcani.

¹³Ñucaca, maipimi aceiteta rumipi talishpa, ñucaman imagutapash carashami nircangui, chai Bet-el shuti pambapi canman ricurij Taita Diosmi cani. Cunanga jatarishpa, cai llactamanda llujshishpa, can huacharishca llactaman tigrailla’ nihuarcami— nircami.

¹⁴Shina nijpimi Raquel shuti, Lea shuti paipaj huarmicunaca cashna nishpa tigrachirca: —Ñucanchica, ñucanchi taitapaj huasipica imata cashpapash, na cashpaca alpata cashpapash, ¿japinachu canchi?

¹⁵¿Nachu ñucanchitaca, na rijsishcacunatashna ña charin? Ñucanchita jatushpami, tucui chai jatushca culquihuan micushpa causajushca.

¹⁶Tucui imatalla ñucanchi taita charishcacunata Taita Dios quichushcacunaca ñucanchipaj, ñucanchi huahuacunapajmi. Cunanga, Taita Dios canman imashna nishcata tucuita rurailla— ninajurcami.

¹⁷Shinamandami Jacoboca jatarishpa, paipaj churicunatapash, paipaj huarmicunatapash, camellocunapi tiachirca.

¹⁸Tucui animalcunata, pai imatalla rurashcamanda cujpi charishcacunatapashmi, ñambi churarca. Padan-aram shuti llactapi pai imatalla rurashcamanda cujpi charishca animalcunatapashmi, ñambi churajurca. Chaicunataca, Canaán llactapi causaj paipaj taita Isaacpajman tigrangapajmi, chashna churajurca.

¹⁹Ashtahuangarin Labán shuti runaca, paipaj llamacunata rutungapajmi rishca carca. Raquel shuti huarmica, paipaj taitapaj yanga dioscunatami shuhuashca carca.

²⁰Jacoboca, pai rigrijushcata na villashpami, arameopura Labán shuti runataca umachirca.

²¹Paica, imatalla charishcacunandimi pacajushpa rijurca. Pai jatarishpa rishpaca, Eufrates jatun yacuta chimbashpami, Galaad urcuman rijurca.

²²Ña quimsa punlla tucujpimi, Jacobo pacalla rishcata Labán runaman villanajurca.

²³Chaimandami Labán runaca, paipaj familiacunata pushashpa, canchis punllacaman catishpa Jacobotaca, Galaad urcupi japigrirca.

²⁴Chai tutami Taita Diosca, arameopura Labán runaman muscuipi ricurishpa: “Jacobota imapash cachun rimanamandaca jarcaringui” nirca.

²⁵Jacobota Labán runa japigrijpica, Jacoboca carpacunata urcupi shayachishcami tiajushca carca. Shinallata Labán runapashmi, Galaad urcupi carpacunata shayachishpa, paipaj familiacunandi tiajurca.

²⁶Chaipimi Labán runaca, Jacobotaca cashna nijurca: —¿Imata rurashpata, ñucataca umahuashcangui? Ñuca ushicunatapash, macanajuimanda prezu apamunshnami apamushcangui.

²⁷¿Imashpata pacalla shamungapaj pacajurcangui? Can llujshinata ñuca ama yachachunmi, umachishpa na villahuashcangui. Can llujshimunata ñuca yachashpaca, jatun cushijuita rurashpami candashcacunahuan, tamborpi, arpapi tocashcacunahuan cayacaman niman carcani.

²⁸Ñuca huahuacunata, ñuca ushicunata muchashpa cayacaman nichunllapash, na saquishcanguichu. Cunanga, juizu illanshnamari shamushcangui.

²⁹Chashna rurashcamanda cangunata llaquichingapaca, ñuca maquipi ushaita charinimi. Ashtahuangarin cunan tutami ñucataca, cambaj taita Isaacpaj Taita Diosca: ‘Jacobota imapash cachun rimanamandaca, jarcarinami cangui’ nihuarca.

³⁰Cambaj taitapaj huasiman rina munaita charishpa, can ña rijushpallataca, ¿imapajta ñuca dioscunata shuhuamurcangui?— nijurcami.

³¹Shina nijpimi Jacoboca, Labán runaman cashna nishpa tigrachirca: —Cambaj ushicunataca munai, na munaimi quichuhuangui yashpami manllarcani.

³²Cambaj dioscunata mascashpa maijambajpipash tarijpica, chaica huañungapachami. Ñuca cambajta imatapash apamushcata rijsishpaca, ñucanchi puracunapaj ñaupajmanda apailla— nircami. Jacoboca, chai dioscunata Raquel huarmi shuhuamushcataca na yacharcachu.

³³Labán runaca, Jacobopaj carpaman, Lea shuti huarmipaj carpaman, chai ishcai servij huarmicunapaj carpaman yaicushpapash, chai dioscunataca na tarircachu. Lea huarmipaj carpamanda llujshishpaca, Raquel huarmipaj carpamanmi yaicurca.

³⁴Ashtahuangarin Raquel huarmica, chai yanga dioscunata japishpami, camelloman apachinapi churashpa, chai jahuapi tiarirca. Labán runaca, tucuilla carpapi mascajushpapash, chai dioscunataca na tarircachu.

³⁵Shina mascajujpimi Raquel huarmica, paipaj taitataca cashna nirca: —Ñucata mandajlla, cambaj ñaupajpi na jatari ushashcamandaca, ama fiñahuanguichu. Huarmicunata japij quilla nanaihuanmi cani— nircami. Labán runaca, chashna mascajushpapash, chai yanga dioscunataca na tarircachu.

³⁶Shina na tarijpimi Jacoboca fiñarishpa, Labán runahuanga ninandapacha fiñanajurca. Chaimandami Jacoboca, Labán runataca cashna nijurca: —¿Ñucaca imatata na cazushcani? Nina japirinshna fiñashpa ñucata catiria shamungapaca, ¿ima juchatata rurashcani?

³⁷Tucui imatalla ñuca charishcacunapimi, chashna mascashcangui. Chashna mascashpapash, cambaj huasipi ima tiashcacunataca, ¿imatata tarishcangui? Ñuca huasi ucu puracunapaj ñaupajpi, canhuan shamushcacunapaj ñaupajpi, ñucanchi imatalla rurashcata paicuna ricuchun, caipi churailla.

³⁸Cai ishcai chunga huatacunatami, canhuan cashcani. Cambaj llamacunapash, huarmi chivocunapash, ima horallapash na shullushcachu. Ñucapash, cambaj llamacunamandaca, shuj jari llamatallapash na micushcanichu.

³⁹Urcu animalcuna huañuchishcataca, ima horapash na apamushcanichu. Ima tucujpipash, ñucami canman tigrachin carcani. Punlla cashpa, tuta cashpa llamata shuhuajpipash, ñucatami tigrachihuai nin carcangui.

⁴⁰Punllapica, rupaimi llaquichin cahuarca. Tutaca, rasu chirimi ñuca ñavimanda puñuita anchurin cahuarca.

⁴¹Chashnami, ishcai chunga huatata cambaj huasipi causarcani. Chunga chuscu huatataca, cambaj ishcai ushicunamandami servijurcani. Cambaj animalcunamanda sucta huatata servijpipash, imatalla rurashcamanda cunataca, chungacaman umashpami na cuhuarcangui.

⁴²Ñuca taita Isaac manllashca Taita Dios, Abrahambaj Taita Dios, na ñucahuan cajpica, cunanga chushaj maquihuambachami cachahuanguiman. Ashtahuangarin ñuca llaquita, ñuca maquihuan imatalla rurashcata Taita Dios ricushca cashpami, tutaca jarcashpa rimashcanga.

⁴³Shina nijpimi Labán runaca, Jacobotaca cashna nishpa tigrachirca: —Ushicunaca ñuca ushicunami, churicunapash ñuca churicunami, llamacunapash ñuca llamacunami. Tucuita can ricujungui, chaicunaca ñucapajmi. Ashtahuangarin cunanga, cai ñuca ushicunata, na cashpaca paicuna ungushca churicunataca, ¿imatata rurai ushashayari?

⁴⁴Shamui, cunanga canhuan ñucahuan ali tucunajushcata ricuchingapaj, ari ninajushun— nircami.

⁴⁵Shina nijpimi Jacoboca, shuj jatun rumita japishpa, chai rumitaca shuj yarichina cachun shayachirca.

⁴⁶Shina shayachishpami Jacoboca, paipaj huasi ucu puracunataca: —Rumicunata tandachipaichi— nirca. Shina nijpi rumicunata tandachishpami, shuj rumi mundunda rurashpa, chai rumi mundun jahuapi micunajurca.

⁴⁷Chai rumi mundundaca Labán runaca, “Jerar Sahaduta” nishpami shutichirca. Jacoboca, “Galaad” shutitami shutichirca.

⁴⁸Labán runaca: —Cai rumi mundunmi, cunanga ñucanchi ishcandimanda villajun— nishpami, chashna shutichirca. Chaimandami chaitaca, “Galaad” shutita shutichirca.

⁴⁹Shinallata, “Mizpa” shutitapash shutichishpami, Labán runaca cashna nirca: —Caishujmanda chaishujmanda ñucanchi shicanyashpa rijpica candapash, ñucatapash Mandaj Diosllata ricushpa cuidapachun.

⁵⁰Shinallata ñuca ushicunata can llaquichijpipash, na cashpaca ñuca ushicunata charishca jahua shuj huarmicunata japijpipash, pipash na ñucanchihuanllu. Ricui, Taita Diosmi ñucanchi ishcandita ricujun— nishpami, chashna shutichirca.

⁵¹Labán runaca, Jacobotaca ashtahuan cashnatapashmi nirca: —Ricui, cai rumi mundumbash, cai jatun rumipash caipimi. Chaitaca canhuan, ñucahuan ari ninajushcata ricuchij cachunmi churarcani.

⁵²Cai rumi mundumbash, cai jatun rumipash chashnapacha cajta ricuchijuj cachun. Cai rumi mundunmandaca, ñucapash canda llaquichingapaj na yalishachu. Shinallata cambash, cai rumi mundunmanda, cai jatun rumimanda yalishpa nalita rurashpa, ñucata na llaquichinguichu.

⁵³Abrahambaj Taita Dios, Nacorpaj Taita Dios, paicunapaj taitacunapajpash Taita Dios ñucanchita ricuchun— nijurcami. Shina nijpimi Jacoboca, paipaj taita Isaac manllashpa causashca Diospaj shutipi juramenturca.

⁵⁴Shinamandami Jacoboca, animalcunata urcupi huañuchirca. Shinamandami, paipaj huauquicunatapash micuchun cayashpa, tandata micunajurca. Chai tutaca, urcupillatami puñunajurca.

⁵⁵Labán runaca, tutamandata jatarishpami, paipaj nietocunata, paipaj ushicunata muchashpa bendiciarca. Chai jipaca, paipaj llactaman tigrarcallami.