Read Imbabura Highland Quichua GÉNESIS 32 Bible Online

GÉNESIS 32 - Imbabura Highland Quichua bible

GÉNESIS 32

¹Paipaj ñanda catishpa Jacobo rijujpimi, Taita Diospaj angelcunaca tuparingapaj llujshinajurca.

²Paicunata ricushpami, Jacoboca: “Caica, Taita Diospaj carpacunamandamari” nishpa chai pambataca, “Mahanaim” shutita shutichirca.

³Jacoboca, Edom shuti pambapi tiaj Seir shuti llactamanmi, paipaj huauqui Esauman villachun, villajcunata ñaupachishpa cacharca.

⁴Paicunataca, cashna nishpami cacharca: “Ñucata mandaj Esautaca, cashna ninguichi: ‘Canda servij Jacoboca, cashnami nin: Labán runahuan causajushpami, cunangaman chaipi causarcani.

⁵Ñucaca, huarmi huagracunata, burrocunata, llamacunatami charini. Jari servijcunata, huarmi servijcunatapashmi charini. Cambaj ñavipi ali ricuringapajmi, ñucata mandajman cashna villachun cachamuni’ ninmi” ninguichi nishpami cacharca.

⁶Villajcunaca cashna nishpami, Jacobopajman tigramunajurca: —Cambaj huauqui Esaupajmandami shamunchi. Paipashmi, canda tuparingapaj shamujun. Paihuanga, chuscu patsaj runacunapashmi shamunajun— ninajurcami.

⁷Shina nijpimi Jacoboca, ninanda manllarishpa llaquirishpa, paihuan shamuj gentecunataca llamacunandi, huarmi huagracunandi, camellocunandi ishcaipi shicanyachirca.

⁸Esaú shamushpa, chaishuj lado carpacunapi tianajujcunata llaquichijpica, caishuj lado carpacunapi tianajujcunaca pacajungami yashpami, chashna rurarca.

⁹Chaimandami Jacoboca, cashna nijurca: “Ñuca taita Abrahambaj Taita Dioslla, ñuca taita Isaacpaj Taita Dioslla. Can Mandaj Diosmi, cashna nihuarcangui: ‘Cambaj llactaman, cambaj familiacunapajman tigrailla. Ñucami, candaca alita rurasha’ nihuarcanguimi.

¹⁰Ñucata ninanda llaquihuachunga, ima alitapash na rurashcanichu. Shina cajpipash cambajta rurajmanmi, na llullashpa alita rurapashcangui. Cai Jordán yacutaca, ñuca tauna caspihuanllami yalircani. Cunanga, ishcai ladomanmi carpacunata charini.

¹¹Cunanga, ñuca huauqui Esaupaj maquimanda cacharichihuayari, paitami manllani. Pai shamushpaca mamatapash, huahuacunatapashmi chugrichinga.

¹²Canllatami cashna nircangui: ‘Ñucami, candaca alita rurasha. Cambaj miraicunaca, mama cucha manñapi tiaj t'iyu alpashna ashtacapacha cajpi, na cuentai ushanallami canga’ nircanguimi” nijurcami.

¹³Chai tutaca Jacoboca, chaipillatami puñurca. Imatalla japinallacunata charishcatami, paipaj huauqui Esauman carangapaj japirca:

¹⁴Paica, ishcai patsaj huarmi chivocunata, ishcai chunga jari chivocunata, ishcai patsaj llamacunata, ishcai chunga jari llamacunata,

¹⁵quimsa chunga huarmi camellocunata, paicuna huachashca huahuacunandi, chuscu chunga huarmi huagracunata, chunga shicucunata, ishcai chunga huarmi burrocunata, chunga jari burrocunatami japirca.

¹⁶Chashna japishpami, chaicunataca paipaj servijcunaman shican shican cushpa, paita servijcunataca cashna nirca: —Animalcunataca shican shican churashpa, ñucata ñaupashpa richi— nircami.

¹⁷Ñaupashpa rijuj runataca, cashnami nirca: —Ñuca huauqui Esaú canda tuparishpaca, cashna nishpa tapungapashchari: ‘¿Pihuanda causangui? ¿Maimanda rijungui? ¿Can ñaupachishpa rijungui, caicunataca pimanda apajungui?’ nijpica,

¹⁸cashna ningui: ‘Canda servij Jacobomi, ñucata mandaj Esauman carachun cachamujun. Ricui paipashmi, ñucanchita catishpa shamujun’ ningui— nircami.

¹⁹Shinallata chaipaj cati catijuj runata, ishcaipaj cati catijuj runata, shicanyachishca chai animalcunapaj huashata catinajuj tucuilla gentecunatami, cashna nishpa mandashpa cacharca: —Esauta canguna tuparishpaca, cangunapash chashnallata ninguichi.

²⁰Shinallata cashnatapash ninguichi: ‘Canda servij Jacoboca, ñucanchita catishpami caiman shamujun’ ninguichi— nircami. Jacoboca, cashnatami yarijurca: “Caranacunata punda ñaupachijpica, Esaú ninanda fiñashcataca, ashatallapash yalichingami. Chai jipami, paipaj ñavitaca ricusha. Chashna rurajpica, ñucata chasquingapashchari” yajurcami.

²¹Chai caranacunataca, ñaupachishpa cachashpami paica, chai tutaca carpapi puñurca.

²²Jacobo, chai tuta jatarishpaca, paipaj ishcandi huarmicunata, paita servij ishcandi huarmicunata, paipaj chunga shuj churicunata pushashpami, yali ushanalla Jaboc shuti yacuta chimbarca.

²³Paicunata japishpami paicunatapash, tucui imatalla pai charishcacunatapash, jatun larca yacuta yalichirca.

²⁴Shinami Jacoboca, pailla quedarca. Chaipi cajpimi shuj runaca, Jacobohuan punllayangacaman macanajujurca.

²⁵Chai runaca, Jacobohuan macanajuita na ushashpaca, huasha changa angupimi huactarca. Shina huactajpi Jacobopaj changa mucucunaca, chai runahuan macanajujpillata cacharirirca.

²⁶Chai runaca, Jacobotaca: —Saquihuai, punllayamunmari— nircami. Shina nijpimi, Jacoboca: —Ñucata na bendiciajpica, candaca na cacharishachu— nishpa tigrachirca.

²⁷Shina nijujpimi chai runaca, Jacobotaca: —¿Ima shutita cangui?— nirca. Shina nijpimi: —Jacobomi cani— nishpa tigrachirca.

²⁸Chai runaca, Jacobotaca cashnami nirca: —Cambaj shutica, ña na Jacobo cangachu. Ashtahuangarin Israel shutimi canga. Taita Dioshuan, runacunahuan macanajushpa can mishashcamandami, chashna canga— nircami.

²⁹Shina nijpimi Jacoboca, cashna nishpa tapurca: —Cunanga, cambaj shutita villahuai— nijpimi, chai runaca: —Ñuca shutitaca, ¿imamandata tapuhuangui?— nirca. Chai jipami, paitaca chaipillata bendiciarca.

³⁰Chaimandami Jacoboca, cashna nirca: “Taita Diostaca, ñavi ñavimi ricurcani. Ñuca almapash, cacharichi tucurcami” nishpami chai pambataca, “Peniel” shutita shutichirca.

³¹Peniel shuti pambata pai ña yalishcapimi, indica llujshimurca. Jacoboca, paipaj cinturas nali cashpami jangajurca.

³²Chashnamandami israelcunaca, huasha changa angupi tiaj angutaca, cunan punllacaman na micun. Jacoboca, paipaj changa racu angupi huactajpimi, janga tucurca.