Read Imbabura Highland Quichua GÉNESIS 33 Bible Online

GÉNESIS 33 - Imbabura Highland Quichua bible

GÉNESIS 33

¹Jacobo vichai ricushpaca, chuscu patsaj runacunandi Esaú runa shamujujtami ñapash ricurca. Shina ricushpami Jacoboca, Lea shuti, Raquel shuti paipaj huarmicunata, ishcandi servij huarmicunatapash, paicunapaj huahuacunandi, shican shican churarca.

²Servij huarmicunataca, paicunapaj huahuacunandimi pundapi churarca. Paicunapaj huashapica Lea huarmitami, paipaj huahuacunandi churarca. Chaipaj cati ashtahuan huashamanmi Raqueltapash, Josetapash churarca.

³Chashna churashpami Jacoboca, paicunata ñaupashpa rishpa, canchiscaman alpaman chayajta urai cumurijurca. Paipaj huauquipajman chayangacamanmi, chashna rurashpa rijurca.

⁴Ashtahuangarin Esaú tuparingapaj calpashpami, Jacobotaca ugllarca. Paipaj rigra jahuapi marcarishpami, muchashpa ishcandi huacanajurca.

⁵Esaú runa vichai ricushpami huarmicunata, huahuacunata ricushpa: —¿Caicunaca picunata?— nirca. Shina nijpimi, Jacoboca: —Canda servij ucaman, Taita Dios carashca huahuacunami capan— nirca.

⁶Chai jipami, servij huarmicunapash, paicunapaj huahuacunandi shamushpa cumurinajurca.

⁷Shinallata Lea huarmipash, paipaj huahuacunandi shamushpami cumurinajurca. Chaipaj catica Josepash, Raquel huarmipashmi chayamushpa cumurinajurca.

⁸Chaimandami Esaú runaca, cashna nirca: —Candaca, cai tucui tandanajushcatami tuparij shamushcani. Caicunahuanga, ¿imatata rurangapaj munangui?— nircami. Shina nijpimi, Jacoboca: —Ñucata mandajpaj ñaupajpi ali ricuringapajmi munapani— nishpa tigrachirca.

⁹Shina nijpimi Esaú runaca, cashna nirca: —Ñuca huauquilla, ñucaca yapallapashmi charini. Can charishcacunaca, cambajllata quedachunlla— nircami.

¹⁰Shina nijpimi Jacoboca, cashna nirca: —Ama chashna nihuaichu nipanimi. Cambaj ñavipi cunan ñuca ali ricurishca cajpica, ñuca carashcacunata chasquipayari. Cambaj ñavitaca, Taita Diospaj ñavita ricushcashnami ricushcani. Canga, ninan cushijuihuanmi chasquihuashcangui.

¹¹Canman carangapaj ñuca apamushcacunataca chasquipailla nipanimi. Ñuca nali cajpipash, Taita Diosmi cashna carahuashca. Tucui caipi tiashcacunaca, ñucapajllami— nircami. Chashna nijujpillatami Esaú runaca, carashcacunata japirca.

¹²Chaimandami, Esaú runaca: —Rishunchilla, jacuchi ñucami canda ñaupashpa risha— nirca.

¹³Shina nijpimi Jacoboca, cashna nirca: —Ñucata mandajlla, huahuacuna llullura cajtaca yachapanguimi. Shinallata llamacuna, huarmi huagracunapash, chairalla huachashcacunatami charini. Paicuna shaijushpaca, shuj punllapillami tucuilla llamacuna huañunga.

¹⁴Chaimanda cunanga, ñucata mandajlla, canda servijta ñaupashpa ripailla. Ñucaca, animalcuna imashna ñuca ñaupajta rijpipash, huahuacuna imashna rijpipash, asha asha rishpa, Seir shuti llactaman ñuca amopajman chayangacaman ripashallami— nircami.

¹⁵Shina nijpimi, Esaú runaca: —Cunanga, ñucahuan shamushca gentecunataca, canhuan saquingapajmi munani— nirca. Shina nijpimi, Jacoboca: —Ñucata mandajpaj ñaupajpi ñuca ali ricurishca cajpica, ¿paicunataca imapajta saquipanguiri?— nirca.

¹⁶Shina nijpimi Esaú runaca, chai punllallata paipaj ñanda Seir shuti llactaman tigrarca.

¹⁷Jacoboca, Sucot shuti llactamanmi rirca. Chaipimi, paipaj huasita shayachirca. Paipaj animalcuna shayanacunatapashmi rurarca. Shinamandami chai pambataca, “Sucot” shutita shutichirca.

¹⁸Chai jipami Jacoboca, Canaán llactapi tiajuj Siquem shuti puebloman, ima llaquipash na japijpi aliguta chayarca. Padan-aram shuti llactamanda shamujushpami, chai pueblo chimba purapi, carpacunata shayachishpa tianajurca.

¹⁹Siquem shuti runapaj taita Hamor shuti runapaj churicunatami, shuj asha alpata patsaj culquipaj randirca. Paica, chaipimi carpacunata shayachirca.

²⁰Chaipimi, shuj altarta rurarca. Chai altartaca, “El-elohe-Israel” shutitami shutichirca. Dina shuti cuitsata huaglichishcamandami llaquichishca