Read Imbabura Highland Quichua GÉNESIS 34 Bible Online

GÉNESIS 34 - Imbabura Highland Quichua bible

GÉNESIS 34

¹Lea shuti huarmipaj ushi Dina shuti cuitsami, chai llactapi causanajuj cuitsacunata rijsingapaj llujshirca. Leami, chai ushitaca Jacoboman ungushca carca.

²Chai llactapi causajcunata mandaj heveopura Hamor shuti runapaj churi Siquem shuti huambrami, Dina shuti cuitsata japirca. Shina japishpa paihuan siririshpami, chai cuitsataca huaglichirca.

³Paica, Leapaj ushi Dinata tucui almahuan ninandapacha juyashpami, chai cuitsata ninanda munashpa, paipaj shungupi chayajta rimajurca.

⁴Siquem shuti huambraca, paipaj taita Hamor shuti runahuan parlashpami: —Cai cuitsagutaca, ñucapaj huarmi cachun cazarachihuailla— nijurca.

⁵Ashtahuangarin Jacoboca, paipaj ushi Dinata, Siquem shuti huambra nalita rurashpa mapayachishcatami uyarca. Paipaj churicunaca, animalcunata pambapi michinajujpimi, paicuna shamungacaman Jacoboca, upalla shuyajurca.

⁶Siquem shuti huambrapaj taita Hamor shuti runaca, Jacobohuan parlangapajmi rijurca.

⁷Jacobopaj churicunaca, pambamanda tigramushpami chaitaca yacharca. Jacobopaj ushihuan siririshpa, napash ruranata rurashpa, Israel puracunapi jatun pinganayaita rurashcamandami, paicunaca llaquirishpa ninanda fiñarirca.

⁸Hamor shuti runaca, cashna nishpami paicunahuan parlajurca: —Ñuca churi Siquem shuti huambrapaj shungupica, cangunapaj ushitaca ninandapachami juyapan. Chaimandami, paipaj huarmi cachun cazarachipaichi nipani.

⁹Ñucanchihuan familiapura tucupaichilla. Cangunapaj ushicunata ñucanchiman cushpa, cangunapash ñucanchi ushicunahuan cazaraichilla.

¹⁰Shina rurashpaca, ñucanchihuan causaichilla. Alpacunapash cangunapajmi canga. Chai alpacunapi causashpaca, randishpa jatushpa causaichilla. Chai alpacunataca, cangunapaj cachun japipaichilla— nijurcami.

¹¹Shinallata Siquem shuti huambrapashmi, Dina shuti cuitsapaj taitatapash, paipaj turicunatapash, cashna nirca: —Cangunapaj ñavipi ñuca ali ricurishca capashcaiman. Shina cashpaca, imata canguna mañashcatapash cupashallami.

¹²Shuj huarmimanda imatalla cuna cajpipash, ashtahuan mirachishpa mañahuaichilla. Ñucaca, mashnata nijpipash cupashallami. Cuitsagutaca, ñuca huarmi cachun cuhuaichilla— nircami.

¹³Ashtahuangarin Jacobopaj churicunaca, paicunapaj pani Dinata nalita rurashpa mapayachishcamandami Siquem shuti huambratapash, paipaj taita Hamor shuti runatapash umachitalla umachinajurca.

¹⁴Shinamandami cashna ninajurca: —Ñucanchica, ñucanchi panitaca, circuncisión nishcata na rurashca runahuan cazarachitaca, na ushanachu canchi. Chashnata ruranaca, ñucanchi purapica millanayaipachami.

¹⁵Ashtahuangarin cashna rurana cajpica, chasquishunllami: Cangunapash, ñucanchishnallatami rurana canguichi. Canguna puramanda tucui jaricunami, circuncisionda rurana canguichi.

¹⁶Shina rurajpica, ñucanchi ushicunata cangunaman cushunllami. Shinallata ñucanchipash, cangunapaj ushicunahuan cazarashunllami. Shina rurashpaca, shujlla llactami tucushun.

¹⁷Ashtahuangarin circuncisionda ruranata na uyanayachijpica, ñucanchi ushitaca pushashpa rishunllami— ninajurcami.

¹⁸Paicuna nishca shimicunaca Hamor shuti runapajpash, Hamorpaj churi Siquem shuti runapajpash alimi uyarirca.

¹⁹Jacobopaj ushita ninanda alicachinamandami, Siquem shuti huambrapash, circuncisionda uchalla rurachirca. Paica, paipaj taitapaj huasi ucu purapica, tucuillata yali alicachi tucushcami causarca.

²⁰Chashnamandami Hamor shuti runapash, paipaj churi Siquem shuti huambrapash, paicunapaj puebloman yaicuna punguman shamushpa, paicunapaj pueblopi causaj runacunaman, cashna nishpa villanajurca:

²¹—Cai runacunaca, ñucanchihuanga casilla ali causaitami charin. Paicunami, ñucanchi llactapi causashpa, randishpa jatushpa caipi causanajunga. Ricuichi cai llactaca, paicunapajpash pactana jatunmi. Ñucanchimi, paicunapaj ushicunataca, ñucanchi huarmi cachun japishun. Ñucanchi ushicunatapashmi, paicunapaj huarmi cachun cushun.

²²Ashtahuangarin cai runacunaca, ñucanchihuan shujlla llacta tucungapaca, cashnata rurajpimi ñucanchihuanga causai ushanga: Ñucanchi puramanda tucui jaricunami, paicuna rurashcashnallata circuncisionda rurana canchi.

²³Paicunapaj animalcunapash, paicuna imatalla charishcacunapash, paicunapaj tucui animalcunapash, ñucanchipajmi canga. Paicuna nishcatalla pactachishunchi. Paicunaca ñucanchihuan causangallami— ninajurcami.

²⁴Hamor shuti runahuan, paipaj churi Siquem shuti runahuan chashna ninajushcataca, pueblo punguta yalijcunaca tucuillami cazurca. Paicunapaj pueblo punguta mashnacuna llujshijpipash, tucuilla jaricunatami circuncisionda ruranajurca.

²⁵Ashtahuangarin quimsa punlla tucujpimi, cashna tucurca: Paicuna ninanda nanachijujpimi, Simeón shuti, Leví shuti, Jacobopaj ishcai churicunaca, paicunapaj espadacunata japinajurca. Paicunaca, Dinapaj turicunami carca. Shina japishpami, chai pueblopi causajcunataca, cungashcapi shamushpa, tucuilla jaricunata huañuchirca.

²⁶Hamor shuti runatapash, paipaj churi Siquem shuti runatapashmi, espadahuan huañuchirca. Shina huañuchishpami Dinataca, Siquem shuti runapaj huasimanda apashpa rinajurca.

²⁷Jacobopaj churicunaca, paicunapaj panita nalita rurashpa mapayachishcamandami, huañushca sirinajujcunapajman shamushpa, chai pueblopi imalla tiashcatapash apanajurca.

²⁸Paicunapaj llamacunata, huarmi huagracunata, burrocunata, chai pueblopi imalla tiashcacunata, pambapi tucui imalla tiashcacunatami apanajurca.

²⁹Paicuna imatalla charishcacunataca, tucuillata apashpami, paicunapaj tucuilla huahuacunatapash, paicunapaj huarmicunatapash prezu apanajurca. Huasicunapi imalla tiashcacunatapash, tucuillatami shuhuashpa apanajurca.

³⁰Chashna rurashcamandami Jacoboca, Simeondapash, Levitapash cashna nijurca: —Ñucataca, cai llactapi causanajuj cananeo nishca, ferezeo nishca gentecunapi millanayachi tucushpa causachun saquishpami pandachihuashcanguichi. Ñucaca, huaquinlla runacunahuan cajpimi, ñucata fiñajcunaca tandanajushpa shamushpa, ñucahuan macanajunga. Shinami ñucapash, ñuca huasi ucu purapash, tucuchi tucushun— nijurcami.

³¹Ashtahuangarin paicunaca, cashna nishpami tigrachinajurca: —Ñucanchi panitaca, ¿culquimanda huainayaj huarmitashnachu, paica nalita rurana carca?— ninajurcami. Taita Diosca, Bet-el shuti pambapimi Jacobota bendiciashca