Read Imbabura Highland Quichua GÉNESIS 36 Bible Online

GÉNESIS 36 - Imbabura Highland Quichua bible

GÉNESIS 36

¹Edom nishca Esaú runapaj miraicunaca, caicunami:

²Esaú runaca, Canaán llactapi causajcunapaj ushicunatami, paipaj huarmi cachun japirca: Heteopura Elón shuti runapaj ushi Ada shuti huarmita, heveopura Zibeón shuti runapaj churi Aná shuti runapaj ushi Aholibama huarmita,

³Ismael shuti runapaj ushi, Nebaiot shuti runapaj pani Basemat shuti huarmitapashmi japirca.

⁴Ada shuti huarmica, Elifaz shuti churitami Esaú runaman ungurca. Basemat shuti huarmica, Reuel shuti churitami ungurca.

⁵Aholibama shuti huarmica: Jeús, Jaalam, Coré shuti churicunatami ungurca. Paicunami, Canaán llactapi causajushpa Esaú charishca churicuna.

⁶Esaú runaca, paipaj huarmicunata, paipaj churicunata, paipaj ushicunata, paipaj huasipi tucui causajcunata, paipaj animalcunata, ashtahuan tucui shuj animalcunata, Canaán llactapi ima charishcacunatapashmi tandachirca. Shina tandachishpami, paipaj huauqui Jacobomanda shicanyashpa, shuj llactaman rirca.

⁷Paicuna charishcacunaca ashtacapacha cajpimi, chashna apashpa rirca. Shina ashtaca cajpimi, ishcandi causaitaca na ushanajurca. Paicunapaj animalcuna ashtacapacha cajpimi, paicuna maipi causanajushca alpaca na pactarca.

⁸Chaimandami Esaú runaca, Seir shuti urcuman rishpa, chaipi causajurca. Paica, Edom nishca Esaú runami.

⁹Seir shuti urcupi causajcunapaj taita Esaú runapaj miraicunaca, caicunami:

¹⁰Esaú runapaj churicunapaj shuticunaca, caicunami: Esaú runapaj huarmi Adapaj churica, Elifazmi carca. Esaú runapajllata huarmi Basematpaj churica, Reuel shutimi carca.

¹¹Elifaz shuti runapaj churicunaca: Temán, Omar, Zefo, Gatam, Cenaz shuticunami carca.

¹²Timna shuti huarmimi, Esaú runapaj churi Elifazpaj caishuj huarmi carca. Chai huarmimi, Amalec shuti churita ungurca. Esaú runapaj huarmi Ada huarmipaj mirai huahuacunaca, caicunami.

¹³Reuel shuti runapaj churicunaca: Nahat, Zera, Sama, Miza shuticunami carca. Paicunami, Esaú runapaj huarmi Basematpaj huahuacuna carca.

¹⁴Esaupaj huarmi Aholibamapaj churicunaca, caicunami: Aholibama shuti huarmica, Zibeón shuti runapaj churi Aná shuti runapaj ushimi. Paimi Jeús, Jaalam, Coré shuti churicunata ungurca. Paicunaca, Esaú runapaj churicunami.

¹⁵Esaú runapaj huahua puramanda mandajcunaca, caicunami: Elifaz huarmihuan charishca Esaupaj punda churicunaca, caicunami mandajcuna carca: Temán, Omar, Zefo, Cenaz shuticunami carca.

¹⁶Coré, Gatam, Amalec shuti, Elifazpaj churicunami, Edom llactapi mandajcuna carca. Paicunami, Ada shuti huarmipaj churicuna carca.

¹⁷Esaú runapaj churi Reuelpaj churicunaca, caicunami: Nahat, Zera, Sama, Miza shuti churicunaca, mandajcunami carca. Paicunaca, Reuel shuti runamanda catishpa mirashca mandajcuna carca. Paicunaca, Esaú runapaj huarmi Basematpaj mirai huahuacunami.

¹⁸Caicunami, Esaú runapaj huarmi Aholibamapaj mirai churicuna: Jeús, Jaalam, Coré shuti churicunaca, mandajcunami carca. Paicunaca, Aná shuti runapaj ushi, Esaupaj huarmi Aholibamanda mirashca mandajcunami carca.

¹⁹Paicunami, Esaú runamanda mirai mandajcuna carca. Paica, Edom nishca Esaú runami.

²⁰Chai llactapillata causanajuj horeopura Seir shuti runapaj churicunaca, caicunami: Lotán, Sobal, Zibeón, Ana,

²¹Disón, Ezer, Disán shuticunami. Paicunami, Edom llactapi causaj Seir shuti runapaj mirai horeocunata mandajcuna carca.

²²Lotán shuti runapaj churicunaca: Hori shuti, Hemam shutimi carca. Timna shuti huarmica, Lotán shuti runapaj panimi carca.

²³Sobal shuti runapaj churicunaca: Alván, Manahat, Ebal, Sefo, Onam shuticunami carca.

²⁴Zibeonbaj churicunaca: Aja shuti, Aná shutimi carca. Cai Aná shuti runami, paipaj taita Zibeonbaj burrocunata michijushpa, jichushca pambapi yacu llujshijujta tarishca carca.

²⁵Aná shuti runapaj huahuacunaca: Disón shuti churipash, Aholibama shuti ushipashmi carca.

²⁶Disón shuti runapaj churicunaca, caicunami: Hemdán, Esbán, Itrán, Querán shuticunami carca.

²⁷Ezer shuti runapaj churicunaca, caicunami: Bilhán, Zaaván, Acán shuticunami carca.

²⁸Disán shuti runapaj churicunaca, caicunami: Uz shuti, Arán shutimi carca.

²⁹Horeocunata mandajcunaca, caicunami: Lotán, Sobal, Zibeón, Aná,

³⁰Disón, Ezer, Disán shuticunami carca. Paicunami, horeocunata mandajcuna carca. Seir shuti llactapica, paicuna mandajpimi causanajurca.

³¹Israelcunata jatun mandaj nara tiajpillatami, Edom llactapica caicuna mandanajurca:

³²Edom llactataca, Beor shuti runapaj churi Bela shuti runami mandajurca. Pai mandajuj pueblopaj shutica, Dinaba shutimi carca.

³³Bela shuti runa huañujpica, Bosra shuti pueblopi causajuj Zera shuti runapaj churi Jobab shuti runami, paipaj randi mandajurca.

³⁴Jobab runa huañujpica, Temán shuti llactapi causajuj Husam shuti runami, paipaj randi mandajurca.

³⁵Husam shuti runa huañujpica, Bedad shuti runapaj churi Hadadmi paipaj randi mandajurca. Paimi, madianitacunataca, Moab pambacunapi macanajushpa misharca. Pai mandajuj llactapaj shutica, Avit shutimi carca.

³⁶Hadad shuti runa huañujpica, Masreca shuti pueblomanda Samla shuti runami, paipaj randi mandajurca.

³⁷Samla shuti runa huañujpica Saulmi, paipaj randi mandajurca. Paica, Eufrates jatun yacu ladollapi tiaj Rehobot pueblomandami carca.

³⁸Saúl huañujpica, Acbor shuti runapaj churi Baal-hananmi, paipaj randi mandajurca.

³⁹Acbor shuti runapaj churi Baal-hanán shuti runa huañujpica, Hadar shuti runa paipaj randi mandajurca. Pai mandajuj puebloca, Pau shutimi carca. Paipaj huarmica, Matred shuti huarmipaj ushi Mehetabel shutimi carca. Matred shuti huarmica, Mezaab shuti runapaj ushimi carca.

⁴⁰Esaú runapaj miraicunata catishpa ricujpica, mandajcunapaj shuticuna, paicuna causajushca llactacunapaj shuticunapash, paicunapaj shuticunapash, caicunami: Timna, Alva, Jetet,

⁴¹Aholibama, Ela, Pinón,

⁴²Cenaz, Temán, Mibzar,

⁴³Magdiel, Isam shuticunami carca. Paicunami, Edom llactataca paicunapaj cachun japishpa, chaipillata causashpa mandanajurca. Edom nishca Esaú runaca, paillatami edomitacunapaj taita carca. Josetaca, paipaj huauquicunallatami jatushca