Read Imbabura Highland Quichua GÉNESIS 38 Bible Online

GÉNESIS 38 - Imbabura Highland Quichua bible

GÉNESIS 38

¹Chai huatacunami cashna tucurca: Judá shuti runaca, paipaj huauquicunamanda anchurishpami, Adulam shuti pueblopi causajuj Hira shuti runapajpi causagrirca.

²Chaipimi Judá runaca, cananeopura Súa shuti runapaj ushita rijsirca. Chai huarmitaca, paipaj huarmi cachun japishpami, chai huarmipi chayarca.

³Chai huarmi vijsayu tucushpami, shuj jari huahuaguta ungurca. Chai huahuagutaca, Er shutitami shutichirca.

⁴Cutin vijsayu tucushpaca, shuj jari huahuagutallatami ungurca. Chai huahuagutaca, Onán shutitami shutichirca.

⁵Cutin vijsayu tucushpapash, shuj jari huahuagutallatami ungurca. Chai huahuagutaca, Sela shutitami shutichirca. Huahuata unguna punllapica, Quezib shuti pueblopimi carca.

⁶Chai jipami Judá runaca, Er shuti paipaj punda churiman huarmita japirca. Chai huarmica, Tamar shutimi carca.

⁷Judá runapaj punda churi Er shuti runaca, Mandaj Diospaj ñaupajpica, nali runami carca. Chaimandami Mandaj Diosca, causaita quichurca.

⁸Chai jipami Judá runaca, Onán shuti runataca cashna nirca: —Cambaj huauquipaj huarmipi chayashpa, paihuan cazarailla. Shina cazarashpaca, cambaj huauquipaj miraicuna tiachun mirachilla— nircami.

⁹Onán shuti runaca, chai miraicunaca, na paipaj canata yachashpami, cashna rurajurca: Paica, paipaj huauquipaj huarmipi chayashpapash, paipaj huauquipaj miraicuna ama tiachunmi, alpapilla shutuchijurca.

¹⁰Chashna nalita rurajushcacunaca, Mandaj Diospaj ñaupajpica nalipachami ricurirca. Chaimandami, paitapash causaita quichurca.

¹¹Judá runaca, paipaj jachun Tamartaca cashnami nirca: —Ñuca churi Sela viñangacaman, cambaj taitapaj huasipi sapalla causajuilla— nircami. “Sela shuti runapash, paipaj huauquicunashnallata huañuipajpash” yashpami, chashna nirca. Shina nijpimi Tamarca, paipaj taitapaj huasiman rishpa chaipi causajurca.

¹²Tauca punllacuna yalishca jipaca, Súa shuti runapaj ushi, Judá runapaj huarmipashmi huañurca. Shina huañujpi llaquilla cashca jipa, cutin cushilla tucushpami Judá runaca, paipaj llamacunata rutujcunapajman Timnat shuti puebloman vichai rijurca. Paica, Adulam shuti pueblomanda Hira shuti paipaj cumba runahuanmi rijurca.

¹³Chaitami, Tamarman cashna nishpa villanajurca: “Ricui, cambaj suedroca, paipaj llamacunata rutuchingapajmi, Timnat shuti puebloman vichai rijun” ninajurcami.

¹⁴Chaimandami paica, sapalla huarmi cashpa churajushca churajunacunata anchuchirca. Shina anchuchishpaca, umata quilparina telahuan quilparishpa, baitahuan ali pillurishpami, Enaim shuti puebloman yaicuna pungu ladopi, Timnat shuti puebloman rina ñan ladopi tiarirca. Sela shuti huambratapash, ña viñashcata ricushpa, paipaj suedropash chai huambrahuan na cazarachishcamandami, chashna rurajurca.

¹⁵Tamar huarmi avita quilparishcata Judá runa ricushpami, culquimanda huainayaj huarmimi yajurca.

¹⁶Judá runaca, chai ñanmanda anchurishpa, chai huarmipajman rishpami: —Cambi cunan ñuca chayangapaj saquihuailla— nijurca. Paipaj jachun cajtaca na yachashpami, chashna nijurca. Shina nijpimi, chai huarmica: —¿Ñucapi chayashpaca, imatashi cuhuangui?— nirca.

¹⁷Shina nijpimi Judá runaca, cashna nishpa tigrachirca: —Ñuca animalcunamandaca, huarmi chivopaj shuj huahua chivotami canman cachamusha— nircami. Shina nijpimi, chai huarmica: —Can chaita cachamungacaman, imatapash ñucaman saquihuayari— nirca.

¹⁸Shina nijpimi, Judá runaca: —¿Imatata saquichun munangui?— nirca. Shina nijpimi chai huarmica, cashna nishpa tigrachirca: —Cambaj sellota, racuta caupushca cambaj puchata, cambaj maquipi charijuj tauna caspita cuhuayari— nircami. Shina nijpimi Judá runaca, chaicunata cushpa chai huarmipi chayajpi chai huarmica, paipajta vijsayu tucurca.

¹⁹Chai jipaca, jatarishpa rircallami. Shina rishpami, umata quilparina telahuan quilparishcata anchuchishpa, sapalla huarmi cashpa churajuna, paipaj churajunacunatallata cutin churajurca.

²⁰Judá runaca, huarmi chivocunapaj huahua chivotami, Adulam shuti pueblomanda paipaj cumbahuan cacharca. Chai huarmiman saquishcacunata cutin japimuchunmi, shina cacharca. Ashtahuangarin chai huarmitaca, na tuparircachu.

²¹Chaimandami, Enaim shuti pueblopi causaj runacunataca, cashna nishpa tapujurca: —Enaim pueblo ladolla ñambi tiaj, ¿culquimanda huainayaj huarmica maipita?— nijurcami. Shina tapujpimi paicunaca, cashna ninajurca: —Caipica, culquimanda huainayaj maijan huarmipash na tiashcachu— ninajurcami.

²²Shina nijpimi chai runaca, Judá runapajman tigrashpa cashna nirca: —Chai huarmitaca, na tuparinichu. Chai pueblopi causaj runacunapash: ‘Caipica, culquimanda huainayaj huarmica na tiashcachu’ nihuarcami— nircami.

²³Shina nijpimi Judá runaca, cashna nirca: —Ñucanchita pipash ama yangapi churashpa ricuchunga, chaicunataca can japilla. Ricui, cai huahua chivota cuchun cachajpipash, canga na tuparishcanguichu— nircami.

²⁴Ña quimsa quillashna tucujpimi, cashna tucurca: Judá runamanmi, cashna nishpa villanajurca: —Cambaj jachun Tamarca, huainayashpami causajushca. Shinamandami cunanga, vijsayupacha purijun— ninajurcami. Shina nijpimi, Judá runaca: —Paitaca, llujchishpami rupachina canguichi— nirca.

²⁵Ashtahuangarin paita ña llujchinajujpimi chai huarmica, paipaj suedroman cashna nishpa villachun cacharca: “Caicunapaj dueño runapajtami, vijsayu cani. Cunanga sellotapash, racuta caupushca puchatapash, tauna caspitapash ricui. ¿Caicunaca pipajta?” nishpami cacharca.

²⁶Shina cachajpimi Judá runaca, chaicunata rijsishpa cashna nirca: “Paica, ñucatapash ashtahuan yali imatapash cashcatapachami rurashpa causajushca. Ñucami, Sela shuti ñuca churitaca, na paihuan cazarachircani” nircami. Judá runaca, chai huarmipica cutinga na chayarcachu.

²⁷Huahuata unguna punlla ña pactajpimi, cashna tucurca: Paipaj vijsa ucupica, ishcai huahuacunami tiashca carca.

²⁸Shinamandami cashna tucurca: Huahuata ungujujpica, shuj huahuarami maquita llujchirca. Shina llujchijpi, huahuata unguchij huarmi japishpami: “Caimi punda huacharirca” nishpa, paipaj maquipi shuj puca puchahuan huatachirca.

²⁹Ashtahuangarin maquita llujchij huahuaca, maquita cutin ucuman aisajpimi, paipaj huauquira llujshirca. Shina llujshijpimi, unguchij huarmica: “¡Maitata canra punda llujshimunguiyari!” nishpa, Fares shutita shutichirca.

³⁰Chaipaj catica, puca puchata paipaj maquipi huatashca, paipaj huauquimi llujshirca. Chai huahuataca, Zara shutitami shutichirca. Josemandapash, Potifarpaj huarmimandapashmi villajun