Read Imbabura Highland Quichua GÉNESIS 39 Bible Online

GÉNESIS 39 - Imbabura Highland Quichua bible

GÉNESIS 39

¹Egiptoman José apai tucujpica, cuidaj soldadocunata mandashpa Faraonda servij, Egipto llactamanda Potifar shuti runami randirca. Chai llactaman apaj ismaelitacunapaj maquimandami randirca.

²Ashtahuangarin Mandaj Diosca, Josehuanmi carca. Chaimandami, pai imata rurashcapash ali llujshin carca. Paica, Egiptomanda paipaj amopaj huasipimi causajurca.

³Mandaj Diosca, Josehuanmi carca. Chaimandami, tucui imata José rurajpipash Mandaj Diosca, paipaj maquipillata ali llujchijurca. Chaitami, Josepaj amoca ricujurca.

⁴Joseca, Potifar shuti runapaj ñavipi ali ricurishpami, paita servishpa causajurca. Potifar runaca, paipaj huasipi mayordomo cachun Joseta churashpami, tucui ima charishcatapash paipaj maquipi churarca.

⁵Paipaj huasita, tucui ima charishcacunata ricuchun mingashca punllamandapachami, cashna tucurca: Mandaj Diosca, Egiptopi causaj runapaj huasitaca, Josemandallami bendiciajurca. Mandaj Diosca, chai runapaj huasipi, pambapi tucui imatalla charishcatami bendiciajurca.

⁶Chaimandami tucui ima charishcatapash, Josepaj maquipi churarca. Potifar runaca pai ricujujpimi, huasipi ima tiashcatapash na yarishpa, pai imata micunatalla yarin carca. Joseca ali ñavi, juyailla huambragumi carca.

⁷Chai jipacunami, cashna tucurca: Paipaj amopaj huarmica, Joseta ninanda munashpa ricushpami: —Ñucahuan puñushun— nirca.

⁸Shina nijpimi Joseca, chaita rurangapaj na munashpa, paipaj amopaj huarmitaca cashna nirca: —Ricui, ñuca amoca ñucahuanga cai huasi ucupi ima tiashcatapash, na yarijunllu. Tucui imatalla pai charishcatapash, ñuca maquipimi saquishca.

⁹Cai huasipica, shuj ñucata yalica na tianllu. Shina cajpimi, imatallapash na pacashpa alichishpa tucuita saquihuashca. Ashtahuangarin candallami, paipaj huarmi cajpi, imatapash na nihuashca. Shina cashpaca, ¿imashpata ñucaca cai jatun nalita rurashpa juchata rurashpa, Taita Diosta fiñachishayari?— nircami.

¹⁰Chai huarmica, punllandi Joseta paihuan puñungapaj siririshun nijujpipash Joseca, chai huarmihuan siririshpa, paipaj ladopi cangapaca na munarcachu.

¹¹Chai jipami, cashna tucurca: Shuj punllami Joseca, huasi ucupi ruranacunata rurangapaj yaicurca. Chai huasipi causajcunaca, pipash illarcami.

¹²Chaipimi chai huarmica Josetaca, paipaj churajunamanda aisashpa: —Ñucahuan puñushun— nirca. Shina nijujpimi Joseca, paipaj churajunata chai huarmipaj maquipi saquishpa, calpashpa llujshirca.

¹³Paipaj maquipi churajunata saquishpa canllaman calpajta ricushpami chai huarmica,

¹⁴huasipi tiajcunata cayashpa, cashna nirca: —Ricuichi, hebreopura shuj runatami, ñucanchita nalita rurachun ñucanchipajman apamushca. Chai runaca, ñucahuan puñungapaj munashpami quimirimurca. Chaimandami, ñucaca ninanda caparircani.

¹⁵Chashna ninanda caparijpimi, paipaj churajunata caipi saquishpa, calpashpa llujshirca— nircami.

¹⁶Chai jipaca, paipaj cusa shamungacamanmi, Josepaj churajunataca paipaj ladopi charijurca.

¹⁷Cusa chayamujpimi, huasipi tiajcunaman villashcashnallata, cashna nishpa villajurca: —Ñucanchita servichun can apamushca hebreo runaca, ñuca alicachi tucushcata huaglichingapaj munashpami shamurca.

¹⁸Paica, ñuca ninanda caparijpimi, paipaj churajunata ñuca ladopi saquishpa, canllaman calparca— nijurcami.

¹⁹Chaipimi cashna tucurca: “Canda servijca, chashnami rurangapaj munarca” nishpa, paipaj huarmi villajta uyashpami Josepaj amoca, nina japirinshna ñapash fiñarirca.

²⁰Paipaj amoca, Joseta japishpami, jatun mandaj churajpi prezu tianajuj prezuna huasipillata churarca. Joseca, chai prezuna huasipimi tiajurca.

²¹Ashtahuangarin Mandaj Diosca, Josehuan cashpami, paitaca ashtahuan llaquijurca. Shinamandami prezuna huasipi mandajpaj ñavipipash, ali ricurichun rurarca.

²²Shina cajpimi prezuna huasipi mandaj runaca, chai prezuna huasipi prezu tiajcunataca, tucuillata José ricuchun churarca. Chaipi tucui imatalla ruranacunataca, paimi rurachijurca.

²³José ricushpa cuidajushcamandaca, prezuna huasipi mandaj runaca, imata ruranatapash na charircachu. Mandaj Diosmi, Josehuan carca. Chaimandami imata pai rurajpipash, Mandaj Diosca tucuipi ali llujchijurca. Ishcai muscuicuna ima tucunatami, Joseca villashca