Read Imbabura Highland Quichua GÉNESIS 40 Bible Online

GÉNESIS 40 - Imbabura Highland Quichua bible

GÉNESIS 40

¹Chai jipacunami, cashna tucurca: Egipto llactata jatun mandajman vinota yalichij runapash, tandata ruraj runapashmi, paicunapaj amo, Egipto llactata jatun mandajta ninanda fiñachirca.

²Faraonga, ishcai servijcunahuanmi ninanda fiñarirca. Vinota yalichijcunata mandajhuan, tandata rurajcunata mandajhuanmi chashna fiñarirca.

³Shina fiñarishpami, cuidaj soldadocunata mandajpaj huasipi prezu churarca. José prezu tiajuj prezuna huasipimi churarca.

⁴Cuidaj soldadocunata mandaj runaca, prezuna huasipi tiajcunata José ricuchunmi mingarca. Paimi, chaipi runacunataca servijurca. Tauca punllacunatami, prezu tianajurca.

⁵Egipto llactata jatun mandajman vinota yalichij runapash, tandata ruraj runapash, prezu churai tucushca chai ishcai runacunami, shuj muscuita charirca. Paicunaca, chai tutallatami paicuna ima tucunatallata muscushca carca. Chai muscushcacunaca, caishujpash chaishujpash paicunallata ima tucunata ricuchij muscuimi carca.

⁶Tutamandata paicunapajman José shamushpaca, llaquilla tianajujtami ñapash ricurca.

⁷Shina ricushpami, paipaj amopaj huasipi prezu tianajuj Faraonda servijcunataca: —¿Imamandata cunanga, nali ñavihuan tianajunguichi?— nirca.

⁸Shina nijpimi paicunaca, cashna ninajurca: —Shuj muscuitami charircanchi. Chai muscui ima canataca, pipash na villai ushanllu— ninajurcami. Shina nijpimi Joseca, cashna nirca: —Chai muscui ima canata villanaca, ¿nachu Taita Diospaj? Cunanda ñucaman villaichilla— nircami.

⁹Shina nijpimi, vinota yalichijcunata mandaj runaca, pai muscushcata Joseman cashna nishpa villajurca: —Ñucaca, ñuca ñaupajpi shuj uvas yura shayajujtami muscurcani.

¹⁰Chai uvas yurapica, quimsa malquicunami viñarca. Chai yurapica, fangacuna jundashpa sisajunshnami ricurirca. Chai sisacunaca, uvas racimocuna tucushpami fucunajurca.

¹¹Faraonbaj copaca, ñuca maquipimi carca. Ñucaca, uvasta japishpami, Faraonbaj copapi capijurcani. Shina capishpami chai copataca, Faraonbaj maquipi curcani— nijurcami.

¹²Shina nijpimi Joseca, cashna nirca: —Chai muscui ima canapash, cashnami: Quimsa malquicunaca, quimsa punllami.

¹³Quimsa punlla jipami candaca, umata alsachinshna cushichishpa, punda imata can rurajurcangui, chaitallata rurachun cutin churanga. Paipaj copata yalichij cashpa, punda imashna yalichin carcangui, shinallatami Faraonbaj maquipi cutin cungui.

¹⁴Chai alita can japigrijushpaca, ñucatapash yarihuangui. Ñucata llaquishpa, ñucamanda Faraonman villapangui. Shina villashpa, cai huasimanda ñucata llujchihuangui.

¹⁵Ñucaca, hebreocuna causanajuj llactamanda shuhuamui tucushcami cani. Ñucata prezu churachunga, caipipash ima nalitapash na rurashcanichu— nircami.

¹⁶Chai muscuica alipaj cajta José villajta ricushpami, tandata rurajcunata mandajpash, cashna nishpa Joseman villajurca: —Ñucapashmari, quimsa yuraj canastacuna ñuca umapi tianajujta ricushpa muscurcani.

¹⁷Ashtahuan jahuaman tiajuj canastapica, Faraonman rurashca micunayai mishquilla tucui tandacunami tianajurca. Ñuca umapi tiajuj chai canastamandaca, alasyu animalcunami micunajurca— nijurcami.

¹⁸Shina nijujpimi Joseca, cashna nishpa tigrachirca: —Chai muscui ima canapash, cashnami: Quimsa canastacunaca, quimsa punllami.

¹⁹Quimsa punlla tucujpica, Faraonga cambaj umata anchuchishpami, candaca sipina caspipi huarcunga. Shina huarcujpimi, alasyu animalcuna shamushpa, cambaj aichata micunajunga— nircami.

²⁰Quimsa punlla jipaca, Faraón huacharishca punlla chayashca cajpimi jatun mandajca, paipaj tucuilla servijcunaman jatun micuita rurajurca. Shina rurajushpami, chai servij puramandaca, vinota yalichijcunata mandajtapash, tandata rurajcunata mandajtapash yarirca.

²¹Shina yarishpami, vinota yalichijcunata mandajtaca, punda pai imata rurajujshcapillata cutin churarca. Chaimandami chai runaca, Faraonbaj maquipi copata cujurca.

²²Ashtahuangarin tandata rurajcunata mandajtaca, pai imashna tucunata José villashcashnallatami sipichun mandarca.

²³Vinota yalichijcunata mandaj runaca, Josetaca na yarircachu. Ashtahuangarin paitaca cungarcami. Faraón muscushca ima tucunatami, Joseca villashca