Read Imbabura Highland Quichua GÉNESIS 41 Bible Online

GÉNESIS 41 - Imbabura Highland Quichua bible

GÉNESIS 41

¹Ishcai huata yalishca jipami, cashna tucurca: Faraonga, shuj muscuitami charirca: Paica, jatun yacu manñapimi shayajuni yarijurcami.

²Chai jatun yacumandaca, juyailla ricurijuj, ninan vira, canchis huarmi huagracuna llujshinajujmi ricurirca. Chai huarmi huagracunaca, jihua pambapimi micunajurca.

³Chai huagracunapaj catipica, nali ricurijuj, tullu tullu shuj canchis huarmi huagracunami, jatun yacumanda llujshinajurca. Chai huagracunaca, juyailla huagracunapaj ladopimi, jatun yacu manñapi shayanajurca.

⁴Chai nali ricurijuj tullu tullu huagracunami, juyailla ninan vira canchis huagracunata langanshna tucuchirca. Shinata muscujushpami, Faraonga rijcharirca.

⁵Cutin puñushpaca, cashnatami cutin muscurca: Shuj trigo yuramandalla, grano junda juyailla, canchis trigo caspacuna viñanajujtami muscurca.

⁶Chaipaj catica, rupajlla huairahuan huaglishpa jupayashca, shuj canchis trigo caspacunami llujshirca.

⁷Chai canchis caspa trigo huaglishpa jupayashcacunaca, grano junda canchis racu trigo caspacunatami langanshna tucuchirca. Shinata muscujushpa Faraón rijcharijpica, chaica muscuillami carca.

⁸Chashna muscushcamanda cayandi tutamanda paipaj shungupi ninanda llaquilla cashpami, cashna rurarca: Paica, Egiptopi causanajuj tucui yachajcunata, tucuilla alipacha yachajushcacunata cayachunmi cacharca. Paicunamanmi, Faraonga pai muscushcacunata villajurca. Ashtahuangarin chai muscuicuna ima cajta Faraonman villaitaca, pipash na ushanajurcachu.

⁹Chaimandami, vinota yalichijcunata mandaj runaca, Faraondaca cashna nirca: —Nalicunata ñuca rurashcataca, cunanmi yarini.

¹⁰Quiquin Faraonga, canda servijcunata fiñashpami, ñucatapash, tandata rurajcunata mandajtapash, cuidaj soldadocunata mandajpaj huasipi prezu churarcangui.

¹¹Chaipimi paipash, ñucapash chai tutallata shuj muscuita charircanchi. Chai muscuicunaca, ishcandillatami ima tucunata ricuchijurca.

¹²Chaipica, cuidaj soldadocunata mandaj runata servishpa causaj hebreopura, chairalla viñai shuj runami ñucanchihuan carca. Chai muscuita paiman villajpimi, ñucanchi muscuicuna ima cajtapash villajurca. Ñucanchi imashna muscushcatallatami, chaitapacha villajurca.

¹³Chaipica cashnami tucurca: Ñucanchi muscuicuna ima tucunata pai villashcapash, shinapachami tucurca. Ñucaca, punda imata rurajushca pushtupillatami, cutin churai tucurcani. Chaishujca, sipishpami huarcui tucurca— nircami.

¹⁴Shina nijpimi Faraonga, Joseta cayachun cacharca. Shina cachajpimi, prezuna huasimanda ucha llujchinajurca. Shina llujchijpimi, barbasta muchurishpa, churajunacunatapash shujta churajushpa Faraonbajman shamurca.

¹⁵Faraonga, Josetaca cashnami nirca: —Ñucami, shuj muscuita charishcani. Chai muscui ima cajtaca, pipash na villai ushahuanllu. Ashtahuangarin candami, muscuicunata villajpi uyashpa, chai muscuicuna ima cajta villanlla nijta uyashcani— nircami.

¹⁶Shina nijpimi Joseca, Faraonman cashna nishpa tigrachirca: —Caitaca, na ñucamandalla villai ushanichu. Taita Diosllami, chashna canatapacha Faraonman tigrachinga— nircami.

¹⁷Shina nijpimi Faraonga, Josetaca cashna nijurca: —Ñuca muscuipica, jatun yacu manñapi cashcatashnallami yani:

¹⁸Chai jatun yacumandaca, ninan racu, juyailla ricurijuj, canchis huarmi huagracunami vichai llujshinajurca. Chai huagracunaca, jihua pambapimi micunajurca.

¹⁹Chai huagracunapaj catica, tullu tullu, ninambacha nali ricurijuj canchis huagracunami, jatun yacumanda vichai llujshinajurca. Chashnapacha nali ricurijuj, tullu tullu huagracunataca, tucui cai Egipto llactapica maipipash na ricushcanichu.

²⁰Chai tullu tullu, nali huagracunaca punda llujshishca, ninan racu, canchis huagracunatami langanshna tucuchinajurca.

²¹Chai huagracunata micushpa vijsaman yalichijpipash, micushcashnallapash na ricurircachu. Chai tullu tullu huagracunaca, pundashnallata ninan nalillatami ricurinajurca. Shinata muscujushpami rijcharircani.

²²Cutin muscushpaca, shuj yuramandalla, grano junda, canchis juyailla trigo caspacuna viñanajujtami ricujurcani.

²³Chaipaj catica, rupajlla huairahuan huaglishpa jupayashca shuj canchis trigo caspacunami viñanajurca.

²⁴Huaglishpa jupayashca chai caspacunami, juyailla canchis caspacunataca langanshna tucuchinajurca. Chaitaca yachajcunaman villashcanimi, ashtahuangarin chai muscui ima cajtaca, pipash na villai ushahuanllu— nijurcami.

²⁵Shina nijpimi Joseca, Faraonman cashna nishpa tigrachirca: —Quiquin Faraonbaj muscuicunaca shujllami. Taita Diosmi, pai imata ruranata Faraonman ricuchishca.

²⁶Chai canchis juyailla huarmi huagracunaca, canchis huatami. Juyailla trigo caspacunapash, canchis huatallatami. Chai muscuicunaca shujllami.

²⁷Shinallata juyailla huagracunapaj catipi llujshishca, nali ricurijuj, tullu tullu canchis huarmi huagracunapash canchis huatallatami. Rupajlla huairahuan huaglishpa jupayashca caspacunaca, canchis huatata yarjai tianatami ricuchijun.

²⁸Caitami Faraonman villani. Taita Dios imatalla ruranatami, Faraonman ricuchishca.

²⁹Ricui, tucui Egipto llactapimi, canchis huatacaman granocuna ninanda fucunga.

³⁰Chaipaj catica, canchis huatacaman yarjai tianami catimunga. Egipto llactapica, chai tucui granocuna fucushcataca cungangami. Yarjaimi llactataca tucuchijunga.

³¹Chashna yarjai huatacuna catimushcamandami, ninanda fucushca granocunaca, imapash na ricuringa. Chai huatacunaca, manllanayai ninan llaquimi canga.

³²Taita Diosca chashnatapacha pactachina cajpimi, quiquin Faraonga ishcai muscuita charishcangui. Taita Diosca, chaitaca uchami ruragrijun.

³³Shina cashcamanda cunanga, alipacha yarishpa purij, ali yachajushca shuj runata agllashpa, Egipto llactata mandachun, quiquin Faraonllata churailla.

³⁴Quiquin Faraonga, cashna rurai: Cai llactata mandachunga, mandajcunata churai. Canchis huatata Egipto llactapi ninanda fucujujpica, chai fucushca granocunataca, paicunami pichapi shicanyachishpa alichinajunga.

³⁵Shinallata tucui ima tiashca granocunatami, cai shamuj ali huatacunapica tandachinajunga. Quiquin Faraonllata ricushpa mandajujpimi, pueblocunapi causajcunapaj micuna tiachun, trigota alichinajunga.

³⁶Tucui ima tiashca granocunaca, canchis huatata, Egipto llactapi yarjai tiana punllacunapajmi alichishca tiajunga. Granocunata chashna alichijpimi, llactapi causajcunaca yarjaimanda na huañunga— nijurcami. Joseca, Egiptopi mandajmi tucushca

³⁷Shina nishcacunaca Faraonbajpash, paita servijcunapajpash alimi ricurirca.

³⁸Faraonga, paita servijcunataca cashnami nirca: —¿Taita Diospaj Espirituta charij paishnalla shuj runata tarishunllu imashi?— nircami.

³⁹Faraonga, Josetami cashna nirca: —Taita Diosmi tucui caicunata canman yachachishca. Canshnalla entendij, alipacha yachajushca runaca na tianllu.

⁴⁰Canmi, ñuca huasipi mandangui. Canmi, tucuilla ñuca gentecunataca rimashpa mandangui. Ñuca mandangapaj tiarinapi tiajushcamandallami, candaca yali casha— nircami.

⁴¹Faraonga, Josetaca cashnatapashmi nirca: —Ricui, candaca tucui Egipto llactata mandachunmi churani— nircami.

⁴²Shina nishca jipami Faraonga, paipaj maquimanda surtijasta surcushpa, Josepaj maquipi churachirca. Shinallata lino puchata ahuashca alipacha churajunacunata churachishpami, cungapipash oro churajunata churachirca.

⁴³Josetaca, paipaj cati carretapimi vitsiachirca. Chai jipami, paipaj ñaupajpillata: “¡Cungurichi!” nishpa caparinajurca. Chashnami Josetaca, tucui Egipto llactata mandachun churarca.

⁴⁴Chaipaj jipaca Faraonga, Josetaca cashnami nirca: —Ñucami Faraón cani. Tucui cai Egipto llactapi can na mandajpica, maijanllapash na paipaj maquita, chaquita alsangachu— nircami.

⁴⁵Faraonga, Josetaca, Zafnat-panea shutitami shutichirca. On shuti pueblopi causaj Potifera shuti curapaj ushi Asenattami, paipaj huarmi cachun curca. Joseca, tucui Egipto llactata muyungapajmi llujshirca.

⁴⁶Joseca, Egipto llactata jatun mandaj Faraonbaj ñaupajman pushai tucushca punllapica, quimsa chunga huatatami charirca. Joseca, Faraonbaj ñaupajmanda llujshishpami, tucuilla Egipto llactata muyungapaj rijurca.

⁴⁷Granocuna ninanda fucushca chai canchis huatapica, alpacunapica ninandapachami fucujurca.

⁴⁸Egipto llactapi canchis huatata ninanda fucushca, micuna tucui granocunataca, Josemi tandachishpa alichijurca. Micuna granocunataca, pueblocunapimi alichijurca. Chai pueblocunapaj muyundi pambacunapi fucushca granotaca, chai tucuilla pueblocunapillatami alichijurca.

⁴⁹Joseca, mama cucha manñapi t'iyu alpatashnami, trigotaca ninandapacha tandachijurca. Cuentaitapash na ushanalla cajpimi, cuentaitapash na ushangacaman tandachijurca.

⁵⁰Joseca, yarjai callari huata nara chayamujpillatami, ishcai huahuata charirca. Chai huahuacunataca, On shuti pueblopi causaj Potifera shuti curapaj ushi Asenat shuti huarmimi ungurca.

⁵¹Joseca, cashnami nijurca: “Taita Diosmi ñucataca, tucui llaquita cungachihuashca. Shinallata ñuca taitapaj huasi ucu purutapashmi, tucuillata cungachihuashca” nijurcami. Shina nishpami, paipaj punda churitaca, Manasés shutita shutichirca.

⁵²Joseca cashnami nijurca: “Taita Diosmi, llaquilla causajuj llactapi ñuca churicunata mirachinata rurahuashca” nijurcami. Shina nishpami, paipaj cati churitaca Efraín shutita shutichirca.

⁵³Shinami, Egipto llactapi granocuna ninanda fucuna canchis huataca pactarca.

⁵⁴Chai jipaca, José villashcashnallatami, canchis huatata yarjai tiai callarirca. Shinamandami tucuilla llactacunapi yarjai tiarca, ashtahuangarin tucui Egipto llactapica micuna tiarcami.

⁵⁵Tucui Egipto llactapi causajcunata yarjai japijpimi, Faraondaca micunamanda caparinajurca. Shina caparinajujpimi Faraonga, Egiptopi tucuilla causajcunataca cashna nijurca: “Josepajman richi. Pai imata nishcata ruranguichilla” nijurcami.

⁵⁶Yarjaica, tucui llactapimi tiarca. Shina cajpimi Joseca, tucui pueblocunapi granocunata alichishca ucucunata pascashpa, Egiptopi causajcunaman jatujurca. Egipto llactapica, yarjaica ashtahuanmi mirashpa catirca.

⁵⁷Chaimandami, tucuilla llactacunamandaca, Egiptoman Josepaj maquimanda randingapaj shamunajurca. Tucui cai pachapi yarjai mirashcamandami, chashna shamunajurca. Josepaj huauquicunaca, granocunamanmi shamushca