Read Imbabura Highland Quichua GÉNESIS 43 Bible Online

GÉNESIS 43 - Imbabura Highland Quichua bible

GÉNESIS 43

¹Chai llactapica, ashtahuan ninan yarjaimi tiarca.

²Egiptomanda apamushca trigota micushpa tucuchishca jipami, cashna tucurca: Paicunapaj taita Jacoboca: —Ñucanchi micungapaj, asha granota randingapaj tigrarichi— nircami.

³Shina nijpimi Judá runaca, cashna nishpa tigrachirca: —Chai runaca, cangunaca pactachinapachami canguichi nishpami, ñucanchita cashna nirca: ‘Cangunapaj huauquita cangunahuan na pushamushpaca, ñuca ñavipica napacha ricurimunachu canguichi’ nircami.

⁴Ñucanchi huauquita ñucanchihuan cachajpica, urai rishpa granota canman randimugrishunllami.

⁵Ashtahuangarin paita na cachajpica, na urai rishunllu. Chai runaca, ñucanchitaca: ‘Cangunapaj huauquita na pushamushpaca, ñuca ñavipica na ricurimunachu canguichi’ nircamari— nijurcami.

⁶Shina nijpimi taita Israelca, cashna nirca: —¿Imashpata shuj huauquitapash charinchimi nishpa, chai runaman villashpa, chashnapacha llaquichihuanguichi?— nircami.

⁷Shina nijpimi paicunaca, cashna nishpa tigrachinajurca: —Chai runamari ñucanchimandapash, ñucanchi familiamandapash callarishpa cashna tapuchirca: ‘¿Cangunapaj taitaca causanrachu? ¿Nachu shuj huauquita charinguichi?’ nijurcamari. Shina nijpimi, pai tapushcashnallata tigrachircanchi. Chai runa ñucanchita: ‘Cangunapaj huauquita pushamugrichi’ ningataca, ¿imatata yachashunyari?— ninajurcami.

⁸Shina nishca jipami Judá runaca, paipaj taita Israeltaca cashna nijurca: —Chairalla viñai huambragutaca, ñucahuan cachapailla. Shina cachajpimi, ñucanchica jatarishpa rishun. Ñucanchipash cambash, ñucanchi huahuacunapash na huañushpa, causai ushangapajmi chashna rishun.

⁹Paitaca ñucami canman tigrachipasha, ñucata tigrachihuai nishpa mañahuanguilla. Chairalla viñai huambraguta ñuca na cambajman tigrachimushpa, cambaj ñaupajpi na churamushpaca, ñucami can taitapaj ñaupajpica, tucui causaipi nalitapacha rurashca casha.

¹⁰Na shuyanajushpaca, ña ishcaicamanmi tigramunchiman carca— nijurcami.

¹¹Shina nijpimi paipaj taita Israelca, cashna nijurca: —Shina cashpaca, chashna ruraichilla. Chai runaman carangapaca, cai llactapi ima ashtahuan ali tiashcata japishpa, cangunapaj costalpi churashpa apaichilla. Bálsamo nishca asha jambiguta, asha balun mishquiguta, mishquillagu ashnajuj jambicunata, mirra nishca jambita, tucticunata, almendracunata apaichilla.

¹²Culquitaca, ashtahuan shuj chaupita mirachishpa apashpa ringuichi. Shinallata cangunapaj costal shimipi punda tigrachimushca culquitapash apaichilla. Chai culquitaca, pandashpapashchari cachamurca.

¹³Cangunapaj huauquitapash pushashpa jatarishpa, chai runapajman tigraichilla.

¹⁴Tucuita Rurai Ushaj Diosca, cangunata llaquishpa chai runa ricuchun ayudashpami ali canman. Shinallata cangunapaj chaishuj huauquitapash, cai Benjamín huambragutapash cacharimushpami ali canman. Ñuca huahuacuna illaj quedana cajpica, shina cachun— nijurcami.

¹⁵Shina nijpimi chai runacunaca, ima caranatapash, chaupi yali culquitapash, Benjamindapash japinajurca. Shina japishpa ña jatarishpami, Egiptoman urai rishpa, Josepaj ñaupajpi ricurinajurca.

¹⁶Joseca, Benjamín huambragu paicunahuan cajta ricushpami, paipaj huasipi mayordomotaca cashna nirca: —Chai runacunata ñuca huasiman pushashpa shuj huagrata, cungata muchushpa huañuchishpa aichata yanungui. Chai runacunami, chaupi punllapica ñucahuan micunga— nircami.

¹⁷Chai runaca, José imashna nishcashnallata rurashpami chai runacunataca, Josepaj huasiman pusharca.

¹⁸Chai runacuna Josepaj huasiman pushai tucushpaca, ninanda manllarishpami cashna ninajurca: —Punda shamuipi ñucanchi costalcunapi culquita tigra apashcamanda lazupishna japishpa macangapajmi, ñucanchitaca caiman pushamushca. Shinallata ñucanchipash, ñucanchi burrocunapash, paita servijcuna cachun japingapajmi pushamushca— ninajurcami.

¹⁹Chaimandami, Josepaj huasipi mayordomopajman quimirishpa, huasiman yaicuna pungupi paihuan parlanajurca.

²⁰Paitaca cashnami ninajurca: —Aij, ñucanchita mandajlla. Ñucanchica, na llullashpami nipanchi. Pundaca, micuna granoguta randingapajpachami, urai shamuparcanchi.

²¹Samana pushtuman chayashpa, ñucanchi costalcunata pascanajupimi, cashna tucurca: Chashna pascashpa ricushpaca, tucuicunapaj culquitami tucuicunapaj costal shimicunapi tiajujta ñapash ricurcanchi. Ñucanchi culquica, imashna pezashpa apamushcashnallatami tiajushca carca. Chai culquitaca, cutinmi tigrashpa apamuparcanchi.

²²Ñucanchica, micuna granocunata randingapajmi, shuj culquitapash ashtahuan apamuparcanchi. Ñucanchica, chai culquita ñucanchi costalcunapi maijan churashcatapash, na yachashpami tianajurcanchi— ninajurcami.

²³Shina ninajujpimi chai runaca, cashna nishpa tigrachirca: —Cangunapaca, casilla ali causai tiapachun, imatapash na manllanachu canguichi. Cangunapaj Taita Dios, cangunapaj taitapaj Taita Diosmi, cangunapaj costalcunapi chai culquita cangunaman carashca. Ñucami, cangunapaj culquitaca japircani— nishpami, Simeonda llujchishpa paicunaman tigrachirca.

²⁴Chai runaca, Simeondaca caishujcunapajmanmi, Josepaj huasiman pusharca. Shina pushashpa yacuta paicunaman cujpimi, paicunapaj chaquita maillanajurca. Paicunapaj burrocunamambashmi, micuchun churarca.

²⁵Chaupi punllacaman José chayamuna cajpimi, caranacunataca aliguta churanajurca. Paicunaca, paicunapash chaipi micuna cashcata yachashpami, chashna ruranajurca.

²⁶Huasiman José shamujpica, maquipi charinajushca caranacunata huasi ucuman apamushpami, Josepaj ñaupajpi alpaman chayajta cumurinajurca.

²⁷Chai jipami, Joseca paicuna imashna cashcata tapushpa cashna nirca: —Cangunaca, cangunapaj rucu taitagu tianmi nishpami villahuarcanguichi. ¿Chai taitaca alillachu, cunangaman causajunrachu?— nircami.

²⁸Shina nijpimi paicunaca, cashna nishpa tigrachinajurca: —Canda servij ñucanchi taitaca alillami capan. Paica causajupanrami— ninajurcami. Shina nishpami, paita cazushcata ricuchingapaj urai cumurinajurca.

²⁹Shinallata Josepash vichai ricushpami, paipaj mamapaj churi, paipaj huauqui Benjaminda ricurca. Shina ricushpami: —¿Caichu ñucaman parlanajushca cangunapaj jipa huauqui?— nirca. Shina nishpami, Benjamindaca: —Ñuca huahualla, Taita Dios candaca llaquipachun— nirca.

³⁰Joseca, paipaj huauquita ricushpa, paipaj shungu ucupi ninanda llaquirishpami, ucha llujshishpa maipi huacanata mascarca. Paica, pai puñuj ucuman yaicushpami, chaipi huacajurca.

³¹Paipaj ñavita maillarishpa llujshishpaca, huacanayaipash yalijpimi: “Micunata churamuichi” nirca.

³²Paipaj micunataca, shicanmi churarca. Paicunamambash shicambacha churashpami, paihuan micun cashca Egiptopi causajcunamambash, shican churarca. Egiptopi causajcunaca, hebreocunahuan micuitaca na ushanllu carca. Paicunahuan micunaca, Egiptopi causajcunapaca millanayai cajpimi, chashna ruranajurca.

³³Josepaj ñaupajpimi, punda churimanda callarishpa jipa churicaman, catipi catipi tiarinajurca. Shina tiarishpami, chai runacunaca manllarishpa, caishuj chaishuj ricurinajurca.

³⁴Joseca, paipaj ñaupajmandami, micunacunataca paicunaman cujurca. Ashtahuangarin Benjaminbaj micunaca paicuna purapajtaca, pichacaman yali ashtacami carca. Shinami Josehuan micushpa, ufiashpa cushijunajurca. Josepaj copatami villajun