Read Imbabura Highland Quichua GÉNESIS 45 Bible Online

GÉNESIS 45 - Imbabura Highland Quichua bible

GÉNESIS 45

¹Joseca, paipaj ladopi tucui tianajujcunapaj ñaupajpica, ninandami huacanayachijurca. Shinamandami, na jarcari ushashpa: “Ñuca ñaupajmanda tucuicunata llujchipaichi” nishpa caparirca. Paipaj huauquicunaman José rijsirijujpica, pipash na paihuanga quedarcachu.

²Chaipimi paica, shinllita caparishpa huacarca. Shina huacajtaca, Egiptopi causajcunapash, Faraonbaj huasipi causajcunapashmi uyarca.

³Joseca, paipaj huauquicunataca: —Ñucaca, Josemi cani. ¿Ñuca taitaca causajupanrachu?— nircami. Shina nijpimi paipaj huauquicunaca, paipaj ñaupajpi musparishpa, imata nitapash na ushanajurca.

⁴Shinamandami Joseca, paipaj huauquicunataca: —Cunanga, ñucapajman quimirimuichi— nirca. Shina nijpi paicuna quimirijpimi Joseca, cashna nirca: —Ñucaca, canguna Egiptoman jatushpa cachamushca, cangunapaj huauqui Josemi cani.

⁵Cunanga, na llaquirinachu canguichi. Ñucata caiman jatumushcamandapash, na fiñanajunachu canguichi. Cangunata causaihuan charingapajmi, Taita Diosca cangunata ñaupachishpa cachamuhuarca.

⁶Cai llactapica, ñami ishcai huatata yarjai tiashca. Shina cajpipash picha huatacaman yarjai tiangarami. Chai huatacunapica yapunapash, cozechanapash na tiangachu.

⁷Cai pachapi cangunapaj miraicunata causaihuan charingapajmi, Taita Diosca cangunapaj punda cachamuhuarca. Shinallata ninan ushaihuan cacharichishpa, causaita cungapajmi chashna cachamuhuarca.

⁸Shinamandami ñucataca, na canguna caiman cachamushcanguichi. Ashtahuangarin Taita Diosmi, Faraonbaj taitashna cachun, Faraonbaj huasipipash tucuita mandajuchun, tucuilla Egipto llactatapash mandaj cachun churahuashca.

⁹Ñuca taitapajman ucha rishpa, cashna nishpa villagripaichi: ‘Cambaj churi Josemi, cashna nin: Taita Diosmi ñucataca, tucuilla Egiptopi mandaj cachun churahuashca. Shina cashcamanda, na ashtahuan shuyashpa ñucapajman ucha shamuilla.

¹⁰Gosén shuti llactapi causangapaj shamuilla. Chaipi causashpami, ñuca ladollapi causangui. Cambash, cambaj churicunapash, cambaj churicunapaj churicunapash, cambaj animalcunapash, huarmi huagracunapash shamuichilla. Shinallata can tucui imatalla charishcacunandi shamuilla.

¹¹Chaipimi, micunata carashpa charisha. Yarjai huatacunaca, picha huata tianrami. Cambash, cambaj huasi ucu purapash, can tucui charishca animalcunapash, ama yarjaimanda huañuchunmi, chashna charisha nijunmi’ nipaichi.

¹²Ricuichi, cangunapaj ñavihuan, ñuca huauqui Benjaminbaj ñavihuambachami, cangunahuan ñuca rimajujtaca ricuhuanguichi.

¹³Egiptopi ninanda alicachi tucushca tiajujtapash, tucui imatalla ricushcatapash ñuca taita yachachun villagripaichi. Ucha rishpa, ñuca taitata caiman pushamugripaichi— nircami.

¹⁴Shina nishpami, paipaj huauqui Benjaminbaj cungapi ugllarishpa huacarca. Benjaminbashmi, paipaj cungapi ugllarishpa huacarca.

¹⁵Tucuilla paipaj huauquicunatapash muchashpami, ugllarishpa huacarca. Chai jipami, paipaj huauquicunaca paihuan parlanajurca.

¹⁶“Josepaj huauquicunami shamushca” ninajujmi, Faraonbaj huasipica uyarirca. Chaita uyashpami Faraonbash, paita servijcunapash cushijunajurca.

¹⁷Shinamandami Faraonga, Josetaca cashna nirca: —Cambaj huauquicunataca, cashna ni: ‘Caita ruraichi: Cangunapaj animalcunaman apachishpa, Canaán llactaman tigraichi.

¹⁸Cangunapaj taitata, cangunapaj familiacunata pushashpa, ñucapajman tigramuichi. Ñucami, Egipto llactapi ima ashtahuan ali tiashcata carasha. Cai llactapi imalla ashtaca tiashcatapashmi micunguichi’ ni.

¹⁹Canga, cashna nishpa mandangui: ‘Cashna ruraichi: Cai Egipto llactamanda carretacunata apashpa, cangunapaj huahuacunata, cangunapaj huarmicunata, cangunapaj taitatapash pushashpa tigramugrichi’ nishpa mandangui.

²⁰Canguna imatalla charishcacunata saquishpapash, na llaquirinachu canguichi. Egipto llactapi imalla tiashcacunapash, cangunapajmi canga— nircami.

²¹Shina nijpimi, taita Israelpaj churicunaca chashna ruranajurca. Joseca, Faraón imashna mandashcashnallatami carretacunatapash, ñambi imata micuchumbash paicunaman curca.

²²Tucui paicunamanmi, mudarichun churajunacunata curca. Benjaminmanmi, quimsa patsaj culquicunatapash, mudarichun picha churajunatapash curca.

²³Paipaj taitamambash, caicunatami cacharca: Egiptopi ima ashtahuan ali tiashcatami, chunga burrocunapi apachishpa cacharca. Shinallata paipaj taita ñambi micuchumbash, chunga huarmi burrocunapimi micunata, trigota, tandata cacharca.

²⁴Paipaj huauquicunataca: “Ñambi na fiñanajushpami rina canguichi” nishpa, cayacaman nishpa cachajpimi, paicunaca rinajurca.

²⁵Shina cachajpimi Egiptomanda Canaán llactaman vichai rishpa, paicunapaj taita Jacobopajman chayanajurca.

²⁶Shina chayashpaca, ali villaitami cashna nishpa villanajurca: “Joseca causajunrami, paica tucuilla Egipto llactata mandajmi” ninajujpimi, Jacoboca paicunata na crishpa, shungupi ninanda llaquirirca.

²⁷Chaimandami paicunaca, tucui imatalla José paicunaman parlashcacunata paiman villanajurca. Jacoboca, paita pushachun José cachamushca carretacunata ricushpami, shungupi ninandapacha cushijurca.

²⁸Shina cashpami taita Israelca, cashna nirca: “Chaitallami yachangapaj munarcani. Ñuca churi Joseca causajupashcarami. Nara ñuca huañushpallata rishpami, paitaca ricusha” nircami.