Read Imbabura Highland Quichua GÉNESIS 46 Bible Online

GÉNESIS 46 - Imbabura Highland Quichua bible

GÉNESIS 46

¹Chashnami taita Israelca, tucui imatalla charishcacunandi llujshishpa, Beerseba shuti puebloman shamurca. Chaipimi, paipaj taita Isaacpaj Taita Diosman animalcunata cushpa huañuchirca.

²Chaipimi Taita Diosca, muscuipishna tuta ricurishpa, taita Israeltaca: —Jacobo, Jacobo— nirca. Shina nijpimi paica: —Caipimi capani— nirca.

³Shina nijpimi Taita Diosca, cashna nirca: —Ñucami Taita Dios cani, cambaj taitapaj Taita Diosmi cani. Egiptoman urai rinataca, ama manllaichu. Chaipimi canmandaca, shuj jatun llactata rurasha.

⁴Ñucami, canhuan Egiptoman urai risha, ñucallatami candaca tigrachimusha. Can huañujpica, Josepaj maquimi cambaj ñavitaca vichachinga— nircami.

⁵Shina nijpimi, Israel nishca Jacoboca, Beerseba shuti pueblomanda ringapaj jatarirca. Taita Israelpaj churicunaca, paicunapaj taita Jacobotapash, paicunapaj huahuacunatapash, paicunapaj huarmicunatapash pushashpami, pushamuchun Faraón cachamushca carretacunapi tiachishpa rinajurca.

⁶Paicunapaj huagracunatapash, Canaán llactapi causashpa paicuna imatalla charishcacunatapash japishpami Jacobopash, tucui paipaj miraicunapash Egiptoman shamunajurca.

⁷Jacoboca, paipaj churicunatapash, paipaj churicunapaj churicunatapashmi paihuan pushamujurca. Paipaj ushicunatapash, paipaj churicunapaj ushicunatapash, tucuilla paipaj miraicunatapashmi, paihuan Egiptoman pushamujurca.

⁸Taita Israelpaj churicunapaj shuticunaca, caicunami: Jacoboca, cai churicunahuanmi Egiptoman yaicurca: Jacobopaj punda churica, Rubenmi.

⁹Rubenbaj churicunaca: Hanoc, Falú, Hezrón, Carmi shuticunami.

¹⁰Simeonbaj churicunaca: Jemuel, Jamín, Ohad, Jaquín, Zohar shuticunami. Shinallata cananea huarmipaj churi Saulpashmi, paipaj churi carca.

¹¹Levipaj churicunaca: Gersón, Coat, Merari shuticunami.

¹²Judá runapaj churicunaca: Er, Onán, Sela, Fares, Zara shuticunami. Ashtahuangarin Er runapash, Onán runapash, Canaán llactapillatami huañurca. Fares shuti runapaj churicunaca: Hezrón shuti, Hamul shuticunami carca.

¹³Isacarpaj churicunaca: Tola, Fúa, Job, Simrón shuticunami.

¹⁴Zabulonbaj churicunaca: Sered, Elón, Jahleel shuticunami.

¹⁵Paicunaca, Lea shuti huarmipaj churicunami carca. Paicunatami, Padan-aram shuti llactapi Jacoboman ungurca. Dina shuti paipaj ushitapashmi charirca. Tucui churicunandi, ushicunandica, quimsa chunga quimsami carca.

¹⁶Gad runapaj churicunaca: Zifión, Hagui, Ezbón, Suni, Eri, Arodi, Areli shuticunami.

¹⁷Aser shuti runapaj churicunaca: Imna, Isúa, Isúi, Bería shuticunami. Paicunapaj panica, Sera shutimi carca. Bería shuti runapaj churicunaca: Heber shuti, Malquiel shuticunami carca.

¹⁸Paicunami, Zilpa shuti huarmipaj churicuna carca. Paicunataca Labán runa, paipaj ushi Leata servichun cushca huarmimi, Jacoboman ungurca. Cai tucuicunaca, chunga sucta miraicunami.

¹⁹Jacobopaj huarmi Raquelpaj churicunaca: José shuti, Benjamín shutimi carca.

²⁰Joseca, Egipto llactapimi, Asenat shuti huarmihuan causajushpa, Manasés shuti, Efraín shuti churicunata charirca. Asenat shuti huarmica, On shuti pueblopi causaj Potifera shuti curapaj ushimi carca.

²¹Benjaminbaj churicunaca: Bela, Bequer, Asbel, Gera, Naamán, Ehi, Ros, Mupim, Hupim, Ard shuticunami.

²²Paicunaca, Raquel shuti huarmi, Jacoboman ungushca churicunami. Cai tucuicunaca, chunga chuscu miraicunami.

²³Dan shuti runaca: Husim shuti churitallami charirca.

²⁴Neftalipaj churicunaca: Jahzeel, Guni, Jezer, Silem shuticunami.

²⁵Paicunami, Bilha shuti huarmipaj churicuna carca. Paicunataca Labán runa, paipaj ushi Raquelta servichun cushca huarmimi, Jacoboman ungurca. Cai tucuicunaca, canchis miraicunami.

²⁶Jacobomanda mirashca tucuilla huahuacunami, Jacobohuan Egiptoman shamunajurca. Jacobopaj churicunapaj huarmicunata na cuentashpa, tucuilla caishujcunata cuentajpica, canchis chunga sucta gentecunami carca.

²⁷Joseca, Egiptopi causajushpami, ishcai churicunata charirca. Egiptoman yaicushca Jacobopaj huasi ucupura tucuilla gentecunaca, canchis chunga gentecunami carca.

²⁸Jacoboca, Gosén shuti llactapi José paita tuparij shamuchun nishpami, Judá runata ñaupachishpa cacharca. Shinami paicunaca, Gosén llactaman chayanajurca.

²⁹Joseca, paipaj carretata caballocunapi huatashpami, paipaj taita Israelta tuparingapaj Gosén shuti llactaman shamurca. Shina shamushpami Joseca, taitapaj ñaupajpi ricurishpa, cungapi ugllarirca. Shina ugllarishpami, unaita huacajurca.

³⁰Shina huacajujpimi taita Israelca, Josetaca cashna nirca: —Cambaj ñavita ña ricushpami, can causajushcataca yachani. Cunanga, ñucaca huañushallami— nircami.

³¹Joseca, paipaj huauquicunata, paipaj taitapaj huasi ucu puracunataca cashnami nirca: —Faraonbajman vichai rishpami, cashna nisha: ‘Canaán llactapi causanajushca ñuca huauquicunapash, ñuca taitapaj huasi ucu puracunapashmi ñucapajman shamushca.

³²Jaricunaca, animalcunata charijcuna cashpami, llamacunata michishpa causan. Chaimandami paicunapaj llamacunata, huarmi huagracunata, paicuna imata charishcatapash, tucuilla apamushca’ nishami.

³³Cangunata, Faraón cayashpa: ‘Cangunaca, ¿imatata ruranata yachanguichi?’

³⁴nishpa tapujpica, cashna ninguichi: ‘Canda servijcunaca, chairalla viñaimandapacha cunangamanmi ñaupa taitacunamanda callarishpa, animalcunata charijcuna capanchi’ ninguichi. Egiptopi causajcunaca, llamata michijcunataca tucuillacunatami millanayachin. Cangunaca, Gosén llactapi causangapajmi, chashna villana canguichi— nircami.