Read Imbabura Highland Quichua GÉNESIS 47 Bible Online

GÉNESIS 47 - Imbabura Highland Quichua bible

GÉNESIS 47

¹José shamushpaca, Faraón yachachunmi cashna nishpa villajurca: “Ñuca taitahuan, ñuca huauquicunahuanga, paicunapaj llamacunata, huarmi huagracunata, paicuna imatalla charishcatapash apashpami, Canaán llactamanda shamushca. Ricui, paicunaca Gosén shuti llactapimi” nircami.

²Joseca, caishuj huauquicunapaj cati picha huauquicunataca, Faraonbaj ñaupajman pushashpami rijsichirca.

³Faraonga, Josepaj huauquicunataca: —Cangunaca, ¿imatata ruranata yachanguichi?— nishpami tapurca. Shina tapujpimi paicunaca, Faraonman cashna nishpa tigrachinajurca: —Canda servijcunaca, ñucanchi ñaupa taitacunashnallata ñucanchipash, llamacunata michijcunami capanchi— ninajurcami.

⁴Faraondaca, cashnatapashmi ninajurca: —Canaán llactapica, ninan yarjai tiajpimi, canda servijcunapaj llamacuna micuchun jihua illajpi, cai llactapi causangapaj shamupanchi. Chaimandami cunanga, canda servijcunataca Gosén shuti llactapi causachun saquihuayari nipanchi— ninajurcami.

⁵Shina nijpimi Faraonga, Josetaca cashna nirca: —Cambaj taitapash, cambaj huauquicunapashmi, cambajman shamushca.

⁶Egipto llactaca, cambaj ñaupajpimi. Cambaj taitata, cambaj huauquicunataca, ashtahuan ali alpapi causachun churailla. Paicunataca, Gosén shuti llactapi causachun churailla. Paicuna puramandaca imata rurangapajpash, ali yachajta can ricushpa, ñuca animalcunata cuidajcunata mandajcuna cachun churailla— nircami.

⁷Joseca, paipaj taita Jacobotapashmi ucuman pushashpa, Faraonbaj ñaupajpi rijsichirca. Chaipimi Jacoboca, Faraonda bendiciarca.

⁸Faraonga, Jacobotaca: —¿Mashna huatacunatata causajungui?— nircami.

⁹Shina nijpimi Jacoboca, Faraonman cashna nishpa tigrachirca: —Caipi chaipi purishpa causashca huatacunaca, patsaj quimsa chunga huatacunami capan. Ñucapaj causai punllacunaca ashalla huatacuna, nali huatacunami cashca. Shina cashpapash, ñuca taitacuna causashca huatacunatashna causangapaca, nara chayanichu. Paicunapash, caipi chaipi purishpami causashca— nijurcami.

¹⁰Jacoboca, Faraonda bendiciashpami, Faraonbaj ñaupajmanda llujshirca.

¹¹Chashnami Joseca, paipaj taitatapash, paipaj huauquicunatapash, chaipi causachun cayashpa, Egipto llactapi ashtahuan ali alpata curca. Faraón mandashcashnallatami, Ramesés shuti llactapi ashtahuan ali alpata curca.

¹²Joseca, paipaj taitamambash, paipaj huauquicunamambash, paipaj taitapaj huasi ucu puracunamambash tucuillamanmi, paicuna mashna cajpipash, micunata carashpa charirca.

¹³Tucuilla llactapi micuna na tiajpimi, yarjaica ashtahuan llaquichijurca. Chaimandami, Egipto llactapi causajcunapash, Canaán llactapi causajcunapash, yarjaimanda huañunallacuna tucunajurca.

¹⁴Joseca, Egipto llactapi, Canaán llactapi tucui tiashca culquitami, paipaj maquimanda granocunata randinajujpi japijurca. Chai culquitaca Joseca, Faraonbaj huasipimi alichijurca.

¹⁵Egipto llactapi, Canaán llactapi culqui tucurijpica, Egiptopi causajcunaca tucuillami Josepajman shamushpa, cashna ninajurca: —Granota ñucanchiman carayari. ¿Imashpata culqui tucurijllapi, cambaj ñaupajpi huañushunyari?— ninajurcami.

¹⁶Shina ninajujpimi Joseca, cashna nirca: —Culqui tucurishca cajpica, cangunapaj animalcunata cuhuaichilla. Cangunapaj animalcunamandaca, granota cushallami— nircami.

¹⁷Shina nijpimi paicunaca, paicunapaj animalcunata Josepajman apamunajurca. Shina apamujpimi Joseca, paicunapaj caballocunamanda, llamacunamanda, huarmi huagracunamanda, burrocunamandaca, granocunata cujurca. Shinami chai huatapica, paicunapaj tucui animalcunamandaca, granocunata cushpa charirca.

¹⁸Chai huata tucurijpi, cati huatapimi Josepajman shamushpa cashna ninajurca: —Culqui tucurishcataca na pacashpami, ñucanchita mandajman villapanchi. Animalcunapash, ña ñucanchi amopajmari. Ñucanchita mandajpaj ñaupajpica, ña imapash na tiapanllu. Ashtahuangarin ñucanchihuan, ñucanchi alpahuanllami tiapanchi.

¹⁹¿Imashpata ñucanchipash, ñucanchi alpapash can ricujta tucuripashunyari? Ñucanchitapash, ñucanchi alpatapash, granopaj randipaillayari. Ñucanchica, Faraonbaj servijcunami tucushun. Ñucanchi alpacunapash, paipajmi tucunga. Shina cashpaca ñucanchipash na huañushpa causangapaj, tarpuna muyuta ñucanchiman cuillayari. Shinami alpapash, na llaquinayaita tucuchi tucushca quedanga— ninajurcami.

²⁰Shina ninajujpimi Joseca, Egiptopi tiaj tucui alpacunataca, Faraonman randirca. Egiptopi causajcunaca, ashtahuan ninan yarjai japijpimi, tucuicuna paicunapaj alpacunata jaturca. Shina jatujpimi alpacunaca, Faraonbaj tucurca.

²¹Gentecunataca, pueblocunapi causanajuchunmi yalichirca. Egipto llacta shuj ladomandaca, caishuj lado manñacamanmi chashna rurarca.

²²Curacunapaj alpacunatallami, Faraonga na randirca. Curacunaca, Faraón micunata carajpimi causanajurca. Paicunaca, Faraón micunata carajpi micushpami, paicunapaj alpacunataca na jatunajurca.

²³Joseca, gentecunataca cashnami nirca: —Cunanga cangunatapash, cangunapaj alpacunatapashmi, Faraonman randircani. Ricuichi, tarpuna muyuca caipimi, alpacunapi tarpunguichilla.

²⁴Fucushca granotaca, pichapi shicanyachishpa shujtaca, Faraonman cunguichi. Chuscupi shicanyachishcataca, cangunapaj alpacunapi tarpungapaj japinguichi. Shinallata cangunapash, cangunapaj huasipi tiajcunapash, cangunapaj huahuacunapash micushpa causangapajmi canga— nircami.

²⁵Shina nijpimi paicunaca, cashna nishpa tigrachinajurca: —Ñucanchitaca causaihuanmi charishcangui. Ñucanchita mandajpaj ñavipica, alimi ricuripashcanchi. Ñucanchica, Faraonbaj servijcunami cashunchi— ninajurcami.

²⁶Shinami Joseca, Egipto llactapica pichapi shicanyachishca granocunamanda shujtaca, Faraonbaj cachun mandashpa cunangaman saquirca. Curacunapaj alpacunallami, na Faraonbaj tucurca.

²⁷Chashnami israelcunaca, Egipto llactapi tiaj Gosén shuti llactapi causanajurca. Chaipimi chai alpacunataca, paicunapaj cachun japishpa paicunaca, ninandapacha mirashpa causanajurca.

²⁸Jacoboca, Egipto llactapica chunga canchis huatatami causarca. Jacobo causashca punllacunaca, patsaj chuscu chunga canchis huatacunami carca.

²⁹Taita Israelca, pai huañuna punlla pactajpimi, paipaj churi Joseta cayashpa cashna nirca: —Cunanga, cambaj ñaupajpi ñuca ali ricurishca cajpica, ñuca changapi cambaj maquita churapai. Canga, ñucata llaquishpa cashnatapacha rurapangui nipanimi. Egiptopica ama pambahuanguichu nipanimi.

³⁰Ashtahuangarin ñuca taitacunahuan tandanajujpica, Egiptomanda apashpa, paicunata pambashca ladopillata pambahuangui— nircami. Shina nijpimi, Joseca: —Can nishcashna rurashallami— nishpa tigrachirca.

³¹Shina nijpimi, taita Israelca: —Juramentuhuayari— nijpi, Joseca juramenturca. Chai jipami taita Israelca, uma sauna jahuapi urai cumurirca.