Read Imbabura Highland Quichua GÉNESIS 48 Bible Online

GÉNESIS 48 - Imbabura Highland Quichua bible

GÉNESIS 48

¹Chai jipami, cashna tucurca: Josetaca: “Ricui, cambaj taitaca huañujunmi” ninajurcami. Shina nijpimi Joseca, Manasés shuti, Efraín shuti, paipaj ishcai churicunata pushashpa rirca.

²Jacobo yachachunmi: “Ricui, cambaj churi Joseca, cambajman shamujunmi” nishpa villarca. Shina villajpimi taita Israelca, shinlli tucushpalla jatarishpa camapi tiarirca.

³Shina tiarishpami Josetaca, cashna nijurca: —Tucuita Rurai Ushaj Taita Diosmi, Canaán llactapi tiaj Luz shuti pueblopi ricurishpa bendiciashpa,

⁴cashna nihuarca: ‘Ricui, ñucami candaca mirachishpa, ashtacatapacha rurasha. Candaca, llactacunata callarichij cachunmi rurasha. Cai llactataca, cambaj cati mirai huahuacunamanmi, causaita causaicaman paicunapaj cachun carasha’ nihuarcami.

⁵Cunanga, Egipto llactaman cambajman ñuca nara shamujpillata, Egipto llactapi can charishca Efraín shuti, Manasés shuti cambaj ishcai huahuacunaca ñucapajmi. Paicunaca, Rubén shuti, Simeón shuti ñuca churicunashnallatami ñucapaj canga.

⁶Paicunapaj cati charishca huahuacunami cambaj canga. Paicunaca, paicunaman carashca llactapica, paicunapaj huauquicunapaj shutipimi rijsishca canga.

⁷Padan-aram shuti llactamanda ñuca shamujujpimi, Raquel shuti cambaj mamaca, Canaán llactapi huañuparca. Efrata shuti puebloman chayangapaca, ashalla rina tiajpillatami ñambi huañuparca. Shina huañujpimi, Efrataman rina ñan ladopi pambarcani. Chai pushtuca, Belén shutimi— nijurcami.

⁸Taita Israelca, Josepaj churicunata ricushpaca: —¿Caicunaca picunata?— nircami.

⁹Shina nijpimi Joseca, paipaj taitataca: —Taita Dios ñucaman cai llactapi carashca churicunami— nirca. Shina nijpimi Jacoboca, cashna nirca: —Cunanga, paicunata bendiciangapaj ñuca ladoman quimichimupai— nircami.

¹⁰Taita Israelca, ña rucugu cashpa, paipaj ñavipash ashtahuan nali cashpami, na ricui ushajurca. Chaimandami paicunata, Jacobopajman quimichijpi Jacoboca, paicunata muchashpa ugllarca.

¹¹Chai jipami taita Israelca, Josetaca cashna nirca: —Cambaj ñavita ricunataca, na yarcanichu. Ricui, Taita Diosmi caipi cambaj miraicunatapash ricuchun saquihuashca— nircami.

¹²Shina nishca jipami Joseca, chai churicunataca Jacobopaj cunguri chaupimanda anchuchishpa, alpaman chayangacaman cumurirca.

¹³Joseca, ishcandi churicunatami, Efraindaca ali lado maquihuan, Manasestaca lluqui lado maquihuan japishpa, Jacobopajman quimichirca. Shina quimichijpimi Efrainga, taita Israelpaj lluqui ladoman, Manasesca ali ladoman quedarca.

¹⁴Shina cajpimi taita Israelca, paipaj ali lado maquita chutashpa, jipa churi Efrainbaj umapi churarca. Paipaj lluqui lado maquitaca, Manasespaj umapimi churarca. Shinami Manasesca, punda churi cajpipash, paipaj maquita cruzashpa chashna churajurca.

¹⁵Josetaca, cashna nishpami bendiciajurca: “Taita Abrahambash, ñuca taita Isaacpash, Taita Diospaj ñaupajpimi purinajurca. Ñuca tiashca punllamandapacha cunangamanmi, Taita Diosllata charijuhuan.

¹⁶Tucui nalimanda ñucata huacaichishpa charijuj Angelca, chairalla viñai cai huambragucunata bendiciapachun. Ñuca shutica, paicunapi causaita causaicaman tiapachun. Shinallata taita Abrahambaj shutipash, ñuca taita Isaacpaj shutipash, paicunapi causaita causaicaman tiapachun. Cai pachapipash, ninanda miranajupachun” nijurcami.

¹⁷Ashtahuangarin paipaj taitapaj ali lado maquita, Efrainbaj umapi churajta ricujushpami, Joseca nalicachirca. Shinamandami, paipaj taitapaj maquitaca, Efrainbaj umamanda Manasespaj umaman yalichingapaj japirca.

¹⁸Joseca, paipaj taitataca cashnami nirca: —Ñuca taitalla, mana cashnachu. Caimari punda churi capan. Cambaj ali lado maquitaca, paipaj umapi churapai— nircami.

¹⁹Ashtahuangarin paipaj taitaca, na chashna rurangapaj munashpami, cashna nirca: —Chaitaca yachanimari, ñuca huahualla, yachanimari. Manasespashmari, ashtaca gentecuna tucushpa, jatunyachi tucushca canga. Ashtahuangarin paipaj jipa huauquimi, paitaca yalishpa ashtahuan jatun canga. Paipaj mirai huahuacunami, ashtacapacha llactacuna tucunga— nircami.

²⁰Chai punllami, cashna nishpa bendiciajurca: —Canmandami israelcunaca, cashna nishpa bendicianajunga: ‘Taita Diosca Efrainda, Manasesta bendiciashcashnallata candapash bendiciachun’ ninajungami— nishpami bendiciarca. Shina nishpami Efraindaca, Manasespaj pundapi churarca.

²¹Chai jipami taita Israelca, Josetaca cashna nirca: —Ricui, ñucaca ñami huañugrini. Ashtahuangarin Taita Diosmi cangunahuan canga. Shinamandami cangunataca, cangunapaj taitacunapaj llactaman tigrachinga.

²²Ñucaca canmanmi, cambaj huauquicunaman carashca alpatapash ashtahuan yalishpa cararcani. Chai llactataca, ñucami amorreocunapaj maquimanda ñuca espadahuan, ñuca arcohuan macanajushpa quichurcani— nircami.