Read Imbabura Highland Quichua GÉNESIS 49 Bible Online

GÉNESIS 49 - Imbabura Highland Quichua bible

GÉNESIS 49

¹Paipaj churicunata Jacobo cayashpaca, cashnami nijurca: “Jipa punllacunapi canguna ima tucunata villangapaj tandanajumuichi:

²Jacobopaj churicuna, tandanajushpa uyaichi, cangunapaj taita Israel ima nijujta uyaichi.

³Rubén, canmi ñuca punda churi cangui. Canmi, ñuca shinllipacha cashcata ricuchij, ñuca shinllipacha cashpa charishca punda churi cangui. Canmi, pundapi alicachi tucunatapash, mandana ushaitapash charingui.

⁴Ninanda rijuj yacucunashna cashpapash, cambaj taitapaj camaman vitsiashcamandami, na pundapi cangui. Ñuca siririna pushtuman vitsiashcamandami, canga yangapi churai tucushcangui.

⁵Simeonhuan, Levihuanga huauqui purami. Paicunapaj macanajunacunaca, nalita rurana macanajunacunami.

⁶Paipura parlanajushcataca, ñuca shungupica napacha alicachishachu. Paicunahuan tandanajunataca, yaritapash na yarishachu. Paicuna ñapash fiñarishpami, runacunataca huañuchirca. Chashna manllanayaicuna cashpami, huagracunapaj chaqui angucunatapash fitirca.

⁷Paicuna ñapash fiñarishcapash, ninan nali cashcamanda paicuna fiñarishcapash, shinllipacha cashcamandaca, ninanda nalicachi tucushca cachun. Ñucami, Jacobomandaca shicanyachisha. Israel puramandaca, caita chaitami cachasha.

⁸Judá, candaca cambaj huauquicunami alicachinajunga. Canmi, canda fiñajcunataca, cambaj maquihuan cunga tullupi llapingui. Cambaj taitapaj churicunami, cambaj ñaupajpi cumurinajunga.

⁹Judá, canga leonbaj huahuashnami cangui. Ñuca huahualla, animalcunata japishpami, vichai tigramurcangui. Canga, leonshna curcuyashpami, rucu leonshna micushpa sirijurcangui. Chashna sirijujtaca, ¿pita rijchachingayari?

¹⁰Judá mandana vara caspitaca, na quichungachu. Paipaj chaqui chaupimandaca, Siloh shamungacaman, maijan mandajpash na quichungachu. Paipajmanmi, llactacunapi causajcunaca tandanajunga.

¹¹Paipaj huahua burrotaca, uvas yurapi huatashpa, paipaj burropaj huahua burrotaca, uvas sapipi huatashpami, paipaj churajunataca vinopi tajsharca. Paipaj jahualla churajunatapash, yahuarshna puca vinopimi tajsharca.

¹²Paipaj ñavica, vinotapash yali pucami. Paipaj quirucunapash, lechetapash yali yurajmi.

¹³Zabulón runaca, mama cuchaman chayana manñacunapimi causanga. Barcocuna chayana pueblomi canga. Paipaj llactaca, Sidón pueblocamanmi canga.

¹⁴Isacar runaca, animalcunata pacarichina chugllapi samangapaj siririj shinlli burroshnami.

¹⁵Samanaca aligu cajta, llactapash juyaillagupacha cajtami ricurca. Shina cashpapash huasha curcuyajta aparishpami, impuestota cushpa servijurca.

¹⁶Dan runaca, Israel aillu purashnallatami, paipaj miraicunata mandanga.

¹⁷Dan runaca, ñan ladopi chapaj culebrashnami canga. Chaqui ñan ladopi caballopaj talonda canishpa, caballo jahuapi tiajujta huashaman urmachinshnami canga.

¹⁸Mandaj Dioslla, can quishpichinatami shuyajurcani.

¹⁹Gad runataca, soldadocunami, cungashcapi macaj shamunga. Ashtahuangarin paimi jipamanga, cungashcapi macanga.

²⁰Aser runapaj granocunaca, ali micunacunami canga. Paimi micunayai granocunata, jatun mandajman cunga.

²¹Neftalí runaca, tarugata cacharishcashnami, juyailla shimicunata rimanga.

²²Joseca, ninanda fucuj yurashnami. Pugyu ladopi ninanda fucuj yurashnami. Chai yurapaj malquicuna, ashtahuan viñashpa pata jahuata rijunshnami.

²³Paitaca ninandami llaquichinajurca. Flechacunahuanmi cacharinajurca. Paitaca, arcohuan flechata cacharijcunami na ricunayachirca.

²⁴Ashtahuangarin paipaj arcoca, shinllipacha tiajurcallami. Paipaj rigrapash, paipaj maquipash shinllipachami carca. Jacoboman ushaita cuj Diospaj maquimandami, shina carca. (Israelcunapaj jatun Rumishna, paicunata Michij Diospaj shutimandami shina carca).

²⁵Cambaj taitapaj Taita Diosmandami, shina canga. Paimi candaca ayudanga. Tucuita Rurai Ushaj Taita Diosmandami, shina canga. Paimi candaca bendicianga. Jahua pachamandapash, manllanayai ucu ucu yacucunamandapash, yacuta cachamushpami bendicianga. Shinallata mamapaj chuchutapash, mamapaj vijsatapashmi bendicianga.

²⁶Cambaj taita bendiciashcacunaca, ñucapaj ñaupa taitacuna bendiciashcatapash ashtahuan yalimi carca. Chai bendiciashcacunaca, causaita causaicaman tiaj urcu pundacunacaman chayashpami, Josepaj uma jahuapipash, frentepipash canga. Paica, paipaj huauqui puramanda shicanyachi tucushcami carca.

²⁷Benjaminga, imatapash quichujlla atujshnami. Tutamandata aichataca japishpa micunga. Chishipica, macanajushpa quichushcacunatami chaupinga” nijurcami.

²⁸Tucui paicunami, chunga ishcai Israel aillucuna carca. Caitami, paicunapaj taita bendiciajushpaca nirca. Tucuicunatami, imashna bendicianashnallata bendiciarca.

²⁹Chaipaj jipami, churicunataca cashna nishpa mandarca: “Ñucaca, ñuca llacta puracunahuanmi tandanajugrini. Heteopura Efrón shuti runata randishca pambapi tiaj utujupi, ñuca taitacunapaj ladopi pambahuanguichi.

³⁰Macpela shuti pambapi tiaj utujupi pambahuanguichi. Chai pambaca, Canaán llactapimi Mamre shuti pueblomanda, indi llujshimuj ladomanmi tiajun. Chai alpatami Abrahamga, heteopura Efrón runata randirca. Chai pambataca, pambana alpa cachunmi randirca.

³¹Chaipimi Abrahamdapash, paipaj huarmi Saratapash pambarca. Chaipillatami Isaactapash, paipaj huarmi Rebecatapash pambarca. Ñucapash, Leataca chaipillatami pambarcani.

³²Chai alpandi, chai alpapillata tiaj jatun utujundi randishcacunaca, Het shuti runapaj miraicunapajmi carca” nijurcami.

³³Jacoboca, paipaj churicunata chashna mandashpa tucuchishpaca, paipaj camapi chaquita vichai curpashpa huañushpami, paipaj taitacunahuan tandanajurca.