Read Imbabura Highland Quichua GÉNESIS 5 Bible Online

GÉNESIS 5 - Imbabura Highland Quichua bible

GÉNESIS 5

¹Cai libropica, Adán shuti runapaj miraicunatami villajun: Runata Taita Dios rurai punllapica, Taita Diosman rijchajtami rurarca.

²Jaritapash, huarmitapash rurashpami paicunataca bendiciarca. Paicunata rurai punllapillatami, Adán nishpa shutichirca.

³Adanga, patsaj quimsa chunga huatata causajushpami, paishnalla rijchaj shuj churita charirca. Paitaca, Set shutitami shutichirca.

⁴Adanga, Set shuti churita charishca jipapash, pusaj patsaj huatata causajushpami, shuj churicunata ushicunata charircara.

⁵Adanga tucuimandaca, iscun patsaj quimsa chunga huatata causashpami huañurca.

⁶Set shuti runaca, patsaj picha huatata causashpami, Enós shuti churita charirca.

⁷Set shuti runaca, Enós shuti churita charishca jipapash, pusaj patsaj canchis huatata causajushpami, shuj churicunata, ushicunata charircara.

⁸Set runaca tucuimandaca, iscun patsaj chunga ishcai huatata causashpami huañurca.

⁹Enós shuti runaca, iscun chunga huatata causajushpami, Cainán shuti churita charirca.

¹⁰Enós runaca, Cainán shuti churita charishca jipapash, pusaj patsaj chunga picha huatata causajushpami, shuj churicunata ushicunata charircara.

¹¹Enós runaca tucuimandaca, iscun patsaj picha huatata causashpami huañurca.

¹²Cainán shuti runaca, canchis chunga huatata causajushpami, Mahalaleel shuti churita charirca.

¹³Cainán shuti runaca, Mahalaleel shuti churita charishca jipapash, pusaj patsaj chuscu chunga huatata causajushpami, shuj churicunata, ushicunata charircara.

¹⁴Cainán shuti runaca, tucuimandaca iscun patsaj chunga huatata causashpami huañurca.

¹⁵Mahalaleel shuti runaca, sucta chunga picha huatata causajushpami, Jared shuti churita charirca.

¹⁶Mahalaleel runaca, Jared shuti churita charishca jipapash, pusaj patsaj quimsa chunga huatata causajushpami, shuj churicunata, ushicunata charircara.

¹⁷Mahalaleel runaca, tucuimandaca pusaj patsaj iscun chunga picha huatata causashpami huañurca.

¹⁸Jared shuti runaca, patsaj sucta chunga ishcai huatata causajushpami, Enoc shuti churita charirca.

¹⁹Jared shuti runaca, Enoc shuti churita charishca jipapash, pusaj patsaj huatata causajushpami, shuj churicunata, ushicunata charircara.

²⁰Jared shuti runaca, tucuimandaca iscun patsaj sucta chunga ishcai huatata causashpami huañurca.

²¹Enoc shuti runaca, sucta chunga picha huatata causajushpami, Matusalén shuti churita charirca.

²²Enoc runaca, Taita Dioshuan aligutami purijurca. Enoc runaca, Matusalén shuti churita charishca jipapash, quimsa patsaj huatata causajushpami, shuj churicunata, ushicunata charircara.

²³Enoc runaca, tucuimandaca quimsa patsaj sucta chunga picha huatata causashpami huañurca.

²⁴Enoc runaca, Taita Dioshuanga aligutami purijurca. Chaimandami paitaca, Taita Dios apajpi, cutinga na ricurirca.

²⁵Matusalén shuti runaca, patsaj pusaj chunga canchis huatata causajushpami, Lamec shuti churita charirca.

²⁶Matusalén runaca, Lamec shuti churita charishca jipapash, canchis patsaj pusaj chunga ishcai huatata causajushpami, shuj churicunata, ushicunata charircara.

²⁷Matusalén runaca, tucuimandaca iscun patsaj sucta chunga iscun huatata causashpami huañurca.

²⁸Lamec shuti runaca, patsaj pusaj chunga ishcai huatata causajushpami, shuj churita charirca.

²⁹Chai churitaca, cashna nishpami Noé shutita shutichirca: “Mandaj Dios cai alpata ninanda nalicachishcamanda, ñucanchi maquihuan alpapi imatapash rurashpa, ninan llaquita apanajujpimi, cai churiguca samachinga” nircami.

³⁰Lamec shuti runaca, Noé shuti churita charishca jipapash, picha patsaj iscun chunga picha huatata causajushpami, shuj churicunata, ushicunata charircara.

³¹Lamec shuti runaca, tucuimandaca canchis patsaj canchis chunga canchis huatata causashpami huañurca.

³²Noé runaca, picha patsaj huatata charishpami Sem, Cam, Jafet shuti churicunata charirca.